އަސަދުﷲ ޢަބްދުﷲ ގެ ހެޓްރިކާއެކު މާޒިޔާއިން ފަސޭހަކަމާއެކު ވިކްޓްރީ ސްޕޯޓްސް ކްލަބްގެ މައްޗަށް ކުރި ހޯދާ އުރީދޫ ދިވެހި ޕްރިމިއަރ ލީގު ތާވަލްގެ އެއްވަނާގައި 8 ޕޮއިންޓްގެ ލީޑެއް ނަގައިފިއެވެ.
ރޭ މާޒިޔާ ސްޕޯޓްސް ކްލަބާ ވިކްޓްރީ ސްޕޯރޓްސް ކްލަބް ބައްދަލުކުރި މެޗް މާޒިޔާ ކާމިޔާބުކުރީ ފަސޭޙަކަމާއެކު 5 ލަނޑު 1 ލަނޑުންނެވެ. މެޗްގައި މާޒިޔާއިން ޖެހި 5 ލަނޑުގެ ތެރެއިން ތިން ލަނޑު އަސަދުﷲ ޢަބްދުﷲ ކާމިޔާބުކޮށްދިންއިރު އަނެއް ދެ ލަނޑު ކާމިޔާބުކޮށްދިނީ ޢަލީ އަޝްފާޤާއި އަޙްމަދު ރަޝީދުއެވެ. މި މެޗްގައި އަސަދުﷲ ކާމިޔާބުކޮށްދިން ތިން ގޯލާއެކު އޭނާ ޖަހާފައިވާ ލަނޑުގެ އަދަދުވަނީ އެކާވީހަށް އަރާ، ލަނޑު ލިސްޓުގެ އެއްވަނައަށް އަރާފައެވެ. ދެވަނާގައި 20 ލަނޑާއެކު އޮތީ ޓީސީ ސްޕޯރޓްސް ކްލަބް ޢަލީ ފާސިރުއެވެ.
ރޭގެ މެޗްގައި ވިކްޓްރީގެ ހަމައެކަނި ލަނޑު ކާމިޔާބުކޮށްދިނީ މެޗްގެ އިތުރު ވަގުތުގައި އަޙްމަދު ޙަސަންއެވެ. މި މެޗުން ލިބުނު ތިން ޕޮއިންޓާއެކު މާޒިޔާ ތާވަލްގެ އެއްވަނާގައި އޮތީ 40 ޕޮއިންޓާއެކުއެވެ. ދެވަނާގައި އޮތް ކްލަބް އީގަލްސްއަށް ލިބެނީ 32 ޕޮއިންޓެވެ. ރޭގެ މެޗުން ބަލިވި ވިކްޓްރީ އޮތީ ތާވަލްގެ 7 ވަނާގައި 13 ޕޮއިންޓާއެކުއެވެ.