ސްޕެނިޝް ލަލީގާގައި ރޭ ސެލްޓަވީގޯ އާއި ދެކޮޅަށް ރެއާލް މެޑްރިޑް ކުޅުނު މެޗުގެ ފަހު ވަގުތު ފެޑެރީކޯ ވަލްވާޑް ކާމިޔާބުކޮށްދިން ލަނޑުން 2-1 ގެ ނަތީޖާއަކުން ރެއާލް މެޑްރިޑް މޮޅުވެއްޖެ އެވެ.
ރަށުން ބޭރުގައި ރެއާލް މެޑްރިޑް ކުޅުނު މި މެޗަށް ނިކުތްއިރު އަނިޔާގެ ސަބަބުން އެ ޓީމުގެ ފޯވަޑް ކިލިއަން އެމްބާޕޭ މި މެޗުގައި ނުކުޅެ އެވެ.
ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައިވާ މި މެޗުގެ 11 ވަނަ މިނިޓުގައި ރެއާލް މެޑްރިޑް އިން ވަނީ ލަނޑެއް ޖަހާ ކުރި ހޯދާފަ އެވެ. މި ލަނޑު އެ ޓީމަށް ކާމިޔާބު ކޮށްދީފައިވަނީ އައުރެލިއެން ޗޫމޭނީ އެވެ.
ރެއާލް މެޑްރިޑް އިން ލަނޑެއް ޖަހާ ކުރި ހޯދިތާ 14 މިނިޓު ފަހުން ސެލްޓަވީގޯ ގެ ބޯހާ އިގްލޭސިއަސް ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ.
މި މެޗުން ރެއާލް މެޑްރިޑަށް ތިން ޕޮއިންޓް ކަށަވަރުވެފައިވަނީ މެޗުގެ ފުރިހަމަ ވަގުތު ހަމަވެ އިންޖަރީ ވަގުތުގެ ކުޅުމުގައި ފެޑެރީކޯ ވަލްވާޑް ކާމިޔާބުކޮށްދިން ލަނޑުންނެވެ.
މި ލަނޑާކީ ވަލްވާޑް ފޮނުވާލި ބޯޅައެއް ސެލްޓަވީގޯގެ ޑިފެންޑަރ މާކަސް އަލޮންސޯގެ ގައިގައި ޖެހިފައި ބޯޅައިގެ މިސްރާބު ބަދަލުވެގެންގޮސް ގޯލުގެ ތެރެއަށް ވަދެފައިވާ ލަނޑެކެވެ.
ރެއާލް މެޑްރިޑް މި މެޗުން މޮޅުވެފައިވާއިރު މިއީ ލީގުގައި އެ ޓީމު އެންމެ ފަހުން ކުޅުނު ތިން މެޗުގެ ތެރެއިން މޮޅުވި ފުރަތަމަ ލަނޑެވެ.
މި ނަތީޖާ އާއިއެކު ރެއާލް މެޑްރިޑަށް ވަނީ ލީގުގައި މިހާތަނަށް ކުޅުނު 27 މެޗުން ޖުމްލަ 63 ޕޮއިންޓާއެކު ތާވަލުގެ ދެވަނަ މަގާމް ލިބިފަ އެވެ. އެއްވަނައިގައި އޮތް ވާދަވެރި ބާސެލޯނާ އެއް މެޗު މަދުން ކުޅެގެން އެ ޓީމަށް ލިބިފައިވަނީ 64 ޕޮއިންޓެވެ.