ތިން އަހަރަށްފަހު އެފްއޭއެމްގެ އޯޑިނަރީ ކޮންގްރެސް ބާއްވައިފި

ރާއްޖޭގެ އެންމެ ގިނަ ބަޔަކު ބަލާ އަދި އެންމެ ގިނަ ބައެއްގެ ޝައުގުވެރިކަން ހުއްޓިފައިވާ ކުޅިވަރު، ފުޓުބޯޅައިގެ ރާއްޖޭގެ ބެލެނިވެރި ފަރާތް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ އޯޑިނަރީ ކޮންގްރެސް، ތިން އަހަރަށްފަހު ބާއްވައިފިއެވެ.

މީރުމާ ހޮޓަލުގައި ހޮނިހިރު ދުވަހުގެރޭ ބޭއްވި މި ކޮންގްރެސްގައި، އެފްއޭއެމް މެމްބަރު ކުލަބުތަކުގެ ތެރެއިން ފުރަތަމަ ޑިވިޝަނުގެ އަށް ކުލަބާއި ދެވަނަ ޑިވިޝަނުގެ 11 ކުލަބަކުން ބައިވެރިވެފައިވެއެވެ. ކޮންގްރެސްގައި ބައިވެރި ނުވަނީ ދެވަނަ ޑިވިޝަނުގެ ތިން ކުލަބެކެވެ.

ފުރަތަމަ ޑިވިޝަނުން އަށް ކުލަބެއްގެ 16 މަންދޫބަކާއި، ދެވަނަ ޑިވިޝަނުގެ 14 ކުލަބަކުން 14 މަންދޫބަކާއެކު، ޖުމްލަ 30 މަންދޫބުންނަށް ވޯޓު ލުމުގެ ހައްގު ކޮންގްރެސްގައި ލިބެއެވެ.

ކޮންގްރެސްގެ ކޯރަމް ހަމަވުމަށް ބޭނުންވަނީ 16 މަންދޫބުންނެވެ. ކޮންގްރެސްގައި 26 މަންދޫބަކު ބައިވެރިވެފައިވެއެވެ.

މި ކޮންގްރެސްގައި ޖުމްލަ 18 ކަމެއް ހުށަހަޅާފައިވެއެވެ. މީގެތެރެއިން ވޯޓަށް އެހި ހުރިހާ ކަމެއް ވެސް، ކޮންގްރެސްގައި ބައިވެރިވި މެމްބަރުންގެ އަގުލަބިއްޔަތުން ވަނީ ފާސްކޮށްފައެވެ.

އޭގެ ތެރޭގައި، އެފްއޭއެމްގެ 2026 ވަނަ އަހަރު ބަޖެޓު ފާސްކުރުން ވެސް ހިމެނެއެވެ. އެފްއޭއެމް އިން ފާސްކޮށްފައި ވަނީ 48،458،511ރ ގެ ބަޖެޓެކެވެ.

ތިން އަހަރަށްފަހު އެފްއޭއެމް އިން އޯޑިނަރީ ކޮންގްރެސް ބާއްވާފައިވާއިރު އެންމެފަހުން އޯޑިނަރީ ކޮންގްރެސްއެއް ބޭއްވީ 2023 ވަނަ އަހަރުގެ މެއި މަހުއެވެ.

ހިންގުމުގައި އައި ގޯސްތަކާއި އެކިއެކި ނުރަނގަޅު ކަންތައްތަކުގެ ސަބަބުން އެފަހުން ކޮންގްރެސް ބޭއްވިފައި ނުވިނަމަވެސް، ނޯމަލައިޒިން ކޮމިޓީއާ އެފްއޭއެމްގެ ހިންގުން ހަވާލުކުރިފަހުން މިދިޔަ އަހަރުގެ ތެރޭގައި ތިން ފަހަރެއްގެ މަތިން ހާއްސަ ކޮންގްރެސްތަކެއް ނުވަތަ އެކްސްޓްރާއޯޑިނަރީ ކޮންގްރެސްތަކެއް ބާއްވާފައިވެއެވެ.

އެގޮތުން، މިދިޔަ އަހަރުގެ މާރިޗު މަހުގެ ތެރޭގައި އެފްއޭއެމުން ޚާއްސަ ކޮންގްރެސްއެއް ބޭއްވިއިރު، ޖޫން މަހުގެ ތެރޭގައި އެފްއޭއެމްގެ އަސާސީ ގަވާއިދު އިސްލާހުކުރުމަށް ، "ކޮންސްޓިޓިއުޝަނަލް ކޮންގްރެސް" އެއް ބާއްވާފައިވެއެވެ. މީގެއިތުރުން ޖެހިގެން އައި ޖުލައި މަހު، އިންތިޚާބީ ކޮންގްރެސްއެއް ވެސް އެފްއޭއެމް އިން ބޭއްވިއެވެ.

އެފްއޭއެމްގެ އައު ޒައާމަތުން އެފްއޭއެމްއާ ހަވާލުވީ އެ ކޮންގްރެސްއަށް ފަހުއެވެ.