ފުޓްބޯޅަ އެސޯސިއޭޝަންގެ ޖެނެރަލް ސެކްރެޓަރީ ކަމުގެ މަޤާމަށް ބައްސާމް އަދީލް ޖަލީލް އަލުން ހަމަޖެއްސުމަށް ފީފާއިން އަންގައިފިއެވެ.
ފީފާއިން މިކަން އަންގާފައިވަނީ އެފް.އޭ.އެމްގެ ރައީސްކަމުގެ މަޤާމުގައި ކުރިން ހުންނެވި އަޙުމަދު ތާރިޤަށް މިއަދު ފޮނުވާފައިވާ ސިޓީއެއްގައެވެ.
ފީފާގެ ސެކްރެޓަރީ ޖެނެރަލް ފާތްމާ ސަމޯރާ ސޮއިކުރައްވާ ފޮނުވާފައިވާ ސިޓީގައި ބުނެފައިވަނީ ބައްސާމް އެފް.އޭ.އެމްގެ ޖެނެރަލް ސެކްރެޓަރީގެ މަޤާމުން ވަކިކޮށްފައިވަނީ އެކަން ކުރަން އޮންނަ އުޞޫލުގެ ތެރެއިން، އެފް.އޭ.އެމްގެ އެގްޒެކެޓިވް ކޮމެޓީގެ ނިންމުމެއްގެ ދަށުން ނޫންކަން ފީފާއަށް އެނގިފައިވާކަމަށެވެ.
އަދި، އެ މަޤާމު ބައްސާމާއި ޙަވާލުކުރަން ޖެހޭކަމަށެވެ.
ބައްސާމްއަށް މަޤާމާ ހަވާލުވުމަށްފަހު މިހާރު އޮތް އެންމެ ބޮޑު މަސްއޫލިއްޔަތަކަށްވާނީ އުވިފައިވާ އެފް.އޭ.އެމްގެ އެގްޒެކެޓިވް ކޮމެޓީއަށް މެމްބަރުން ހޮވުމަށް އެފް.އޭ.އެމްގެ އެކްސްޓްރާ އޯޑިނަރީ ކޮންގްރެސްއަކާއެކު އިންތިޙާބެއް ބޭއްވުމެވެ.
އެފް.އޭ.އެމްގެ އެގްޒެކެޓިވް ކޮމެޓީ އުވުނީ އެ ކޮމެޓީގެ ފަސް މެމްބަރުން އިސްތިއުފާ ދިނުމާއި ގުޅިގެންނެވެ.
ފީފާއިން ބުނެފައިވަނީ އަވަސް މުސްތަޤްބަލެއްގައި އެފް.އޭ.އެމްގެ އާ އިންތިޙާބެއް ބޭއްވޭނެކަމަށް އުންމީދުކުރާ ކަމަށެވެ.