ރާއްޖޭގެ އެއްނަމްބަރ ގޯލްކީޕަރ އިމްރާން މުހައްމަދު ޤައުމީ ޓީމަށް ކުޅުން ހުއްޓާލައިފިއެވެ. 17 އަހަރަށްފަހު އިމްރާން ޤައުމީ ޓީމަށް ކުޅުން ހުއްޓާލިކަން އިޢުލާންކުރީ އޭނާގެ ފޭސްބުކް ޕޭޖް މެދުވެރިކޮށެވެ.
މިހާތަނަށް ރާއްޖޭގައި އުފެދުނު އެންމެ މޮޅު ގޯލް ކީޕަރ ރިޓަޔަރ ކުރިކަން އިޢުލާންކުރަމުން ބުނީ މިނިންމުމަކީ އޭނާ މިހާތަނަށް ނިންމި އެންމެ އުނދަގޫ އެއް ނިންމުން ކަމަށާއި މިއީ ރިޓަޔަރ ކުރަން އެންމެ ރަނގަޅު ވަގުތުކަމަށް ޤަބޫލް ކުރާ ކަމަށެވެ. 2000 ވަނަ އަހަރު ޤައުމީ ޓީމަށް ކުޅެން ފެށި އިމްރާން ވަނީ މިހާތަނަށް 111 މެޗް ރާއްޖޭގެ ޤައުމީ ޓީމަށް ކުޅެދީފައެވެ. އިމްރާން ބުނީ ޤައުމީ ޓީމާ ދުރަށް ދާން ނިންމި ނިންމުމަކީ ޒުވާން ކީޕަރުންނަށް ފުރުސަތު ދިނުމަށް އެންމެ ރަނގަޅު ވަގުތު ކަމަށް ދެކޭ ކަމަށެވެ.
" ޒުވާން ކީޕަރުންނަށް އަހަރެން އިތުބާރު ކުރަން. އަހަރެން ޤަބޫލް ކުރާ ގޮތުގައި އެކުޅުންތެރިންނަށް މޮޅު ކުޅުމެއް ދެއްކޭނެ" އިމްރާން ބުންޏެވެ.
ކްލަބް ލެވެލްގައި އަދިވެސް ފެންނާނެ ކަމަށާއި ޤައުމީ ޓީމަށް ބޭނުން ޖެހިއްޖެ ކޮންމެ ވަގުތެއްގައި އޭނާގެ ފަރާތުން ފުރިހަމަ ސަޕޯޓް ލިބޭނެ ކަމަށްވެސް ކްލަބް ލެވެލްގަޔާއި ޤައުމީ ލެވެލްގައި އެތައް ކާމިޔާބީތަކެއް ހޯދާފައިވާ ގޯލް ކީޕަރ ބުންޏެވެ. ޤައުމީ ޓީމްގެ ކެޕްޓަން ކަންވެސްކޮށްފައިވާ އިމްރާން މުހައްމަދަކީ ސާފް ޗެމްޕިއަންޝިޕް ރާއްޖެ ކާމިޔާބުކުރި ޓީމްގެ ގޯލް ބެލެހެއްޓި ހުށިޔާރު ކީޕަރެވެ. އިމްރާން ޤައުމީ ޓީމަށް ކުޅުން ހުއްޓާލާފައިމިވަނީ އޭނާގެ ކެޕްޓަން ކަމުގެ ދަށުން އޭޝިއަން ކަޕް ކޮލިފައިން ގްރޫޕް ސްޓޭޖަށް ރާއްޖެ ކޮލިފައިކޮށްދިނުމަށްފަހުއެވެ.
img:http://s4.psmnews.mv/images/660x400/14763004431500.jpg|ކެޕްޓަން އަޝްފާގު އަދި ކޯޗް ސްޓްވާޓްއާއެކު ކީޕަރ އިމްރާން
މަހިބަދޫއަށް އުފަން އިމްރާން މުހައްމަދު ޤައުމީ ޓީމަށް އެންމެ ފަހުން ކުޅެދިން މެޗަކީ އޭޝިއަންކަޕް ކޮލިފައިން ޕްރިލިމިނަރީ ރައުންޑްގައި މިމަހުގެ އެގާރަ ވަނަދުވަހު ލާއޯސްއާ ދެކޮޅަށް ރާއްޖެ ކުޅުނު މެޗެވެ. އިމްރާން ޤައުމީ ޓީމަށް ކުޅުން ހުއްޓާލިކަން އިޢުލާން ކުރުމުން ޤައުމީ ކެޕްޓަން އަލީ އަޝްފާގު ބުނީ މިއީ ރާއްޖޭގެ ފުޓްބޯޅައަށް ހިތާމަވެރި ދުވަހެއް ކަމަށެވެ.