ޔޫރޮޕާ ލީގުގައި ބޯންމަތު، ސަންޑަރލަންޑް، މިލާންގެ ކުރިމަތިލުން

ޔުއޭފާ ޔޫރޮޕާ ލީގުގެ ލީގު ފޭސްގެ ގުރުއަތުލުން ފަރަންސޭސިވިލާތުގެ މޮނާކޯގައި ބާއްވާފައިވާއިރު، އެންމެ ފާހަގަވީ ޔޫރަޕުގެ ޗެމްޕިއަންކަން 7 ފަހަރަށް ކާމިޔާބު ކޮށްފައިވާ އިޓާލިއަން ސެރީއާގެ އޭސީމިލާނާއި އިންގްލިޝް ޕްރިމިއަރ ލީގު ތަމްސީލު ކުރާ ދެޓީމު ކަމަށްވާ ބޯންމަތާއި ސަންޑަރލަންޑްގެ ކުރިމަތިލުމެވެ.

މިފަހަރުގެ މުބާރާތުގައި މިލާން ދެން ބައްދަލުކުރާ 6 ޓީމަކީ ޕޯޗުގަލްގެ ބެންފީކާ، ނެދަލަންޑްސްގެ އޭޒީ އާލްކްމާ، ހަންގޭރީގެ ފެރެންކްވަރޯސް، އޮސްޓްރިއާގެ އާރްބީ ބާލްސްޒްބާރގް، އަރުމީނިއާގެ އަރަރާތު އަރުމީނިއާ އަދި ބަލްގޭރިއާގެ ލެވްސްކީ ސޯފިއާއެވެ.

ޔޫރޮޕާ ލީގުގެ މިފަހަރުގެ މުބާރާތުގައި އަލަށް ވާދަކުރާ ބޯންމަތު މިމުބާރާތުން ޖާގަ ހޯދާފައިވަނީ، މިދިޔަ ސީޒަންގައި ޕްރިމިއަރ ލީގުގެ 6 ވަނަ މަޤާމުގައި އޮވެގެންނެވެ. އަމިއްލަ ދަނޑުގައި މިލާނާއި ބައްދަލުކުރާ މެޗު ވާނީ، ބޯންމަތަށް ވަރަށް ފާހަގަކޮށްލޭވެ ބޮޑު މެޗަކަށެވެ. މާކޯ ރޯސްގެ ކޯޗުކަމުގެ ދަށުން މިސީޒަނާއި ކުރިމަތިލާ ބޯންމަތުން އަމިއްލަ ދަނޑުގައި ކުޅޭ އަނެއް ތިން މެޗަކީ، ޗެކް ރިޕަބްލިކްގެ ވިކްޓޯރިއާ ޕްލެޒެން، އޮސްޓްރިއާގެ ސްޓަރމް ގްރާޒް އަދި އިސްރާއީލުގެ ހަޕޮއެލް ބީރުޝޭބާއާއި ބައްދަލުކުރާ މެޗެވެ. އަދި ރަށުން ބޭރުގައި ބައްދަލުކުރާނީ، ސްޕެނިސް ލަލީގާގެ ރެއާލް ސޮސިއެޑާޑާއި، ސެލްޓަ ވީގޯ، ޗެކް ރިޕަބްލިކްގެ ސްޕާޓާ ޕްރާގު އަދި ނޯވޭގެ ލިލްސްޓްރޮމް އާއެވެ.

ސަންޑަރލަންޑަށް ބަލާލާއިރު، މިއީ 1973 ވަނަ އަހަރަށްފަހު ޔޫރަޕުގެ މުބާރާތެއްގައި އެޓީމު ވާދަކުރާ ފުރަތަމަ ފަހަރެވެ. މިގޮތުން މިލާންއާއި ރަށުން ބޭރުގައި ކުޅޭ މެޗަށް އެޓީމުގެ ސަޕޯޓަރުން މިހާރު އިންތިޒާރު ކުރާނެއެވެ. މިލާންގެ އިތުރުން ސަންޑަރލަންޑް ރަށުން ބޭރުގައި ދެން ބައްދަލުކުރާނީ، ބެލްޖިއަމްގެ އެންޑަރލެކްޓް، ޕޯލަންޑްގެ ލެޗު ޕޮޒްނަން އަދި ޕޯޗުގީޒް ކަޕް ކާމިޔާބުކޮށް ގިނަ ބަޔަކު ހައިރާންކޮށްލި ދެވަނަ ޑިވިޜަންގެ ޓޮރެންސޭއާއެވެ. އަދި އަމިއްލަ ދަނޑުގައި ބައްދަލުކުރާނީ އޭޒީ އަލްކްމާ، ކްރޮއޭޝިއާގެ ޑީނަމޯ ޒަގްރެބް، ޕޯލަންޑްގެ ޔަގިއެލޯނިއާ ބިއާލިސްޓޮކް އަދި ލެވްސްކީއާއެވެ.

މީގެއިތުރުން ޔޫރޮޕާ ލީގުގެ ޕޮޓް ވަންއިން ޖަރުމަނު ބުންޑެސްލީގާގެ ބަޔަރ ލެވަކޫސެން އަމިއްލަ ދަނޑުގައި ފްރެންޗް ލީގު އާންގެ އޮލިމްޕިކް މާސޭއާއި ބައްދަލުކުރާއިރު، ރަށުން ބޭރުގައި އެލީގުގެ ލިއޯންއާ ބައްދަލުކުރާނެއެވެ. އަދި އިޓާލިއަން ސެރީއާގެ ޔުވެންޓަސްއަށް ބަލާލާއިރު ރެއާލް ސޮސިއެޑާޑް، އާލްކްމާ އަދި ސެލްޓަ ވީގޯގެ ކުރިމަތިލުން ފާހަގަކޮށްލެވެއެވެ.

މިމުބާރާތުގެ މެޗުތަކުގެ ތަރުތީބު ޔުއޭފާއިން އާންމު ކުރުމަށް ހަމަޖެހިފައިވަނީ، މި ހަފުތާ ބަންދުގައެވެ. އަދި ފުރަތަމަ ބުރުގެ މެޗުތައް ކުޅުމަށް ހަމަޖެހިފައިވަނީ، ސެޕްޓެމްބަރު މަހުގެ 16 އަދި 17 ވަނަ ދުވަހުއެވެ. މިފަހަރު ފައިނަލް މެޗު ކުޅުމަށް ހަމަޖެހިފައިވަނީ، އަންނަ އަހަރުގެ މެއި މަހުގެ 26 ވަނަ ދުވަހު ޖަރުމަނުވިލާތުގެ ފްރޭންކްފަރޓުގައެވެ. އެންމެފަހުން މިމުބާރާތް ކާމިޔާބު ކޮށްފައިވަނީ، އިސްތަންބޫލުގައި ބޭއްވި ފައިނަލުގައި ފްރެއިބަރގް ބަލިކޮށް އެސްޓަން ވިލާއެވެ.