ޖަރުމަނުގެ ކުލަބުތަކުން ސެކިއުރިޓީއަށް ކުރާ ހޭދަ ބޮޑުވާތީވެ އެ ގައުމުގެ ފުޓްބޯޅަ ފެޑަރޭޝަނުން ކަންބޮޑުވުން ފާޅުކޮށްފިއެވެ.
ޖަރުމަނުގެ ފުޓްބޯޅައިގެ ފެޑަރަލް ކޮންސްޓިޓިއުޝަނަލް ކޯޓުން މީގެ އަހަރެއްހާ ދުވަސް ކުރިން ނިންމާފައިވަނީ ހައި ރިސްކު މެޗުތަކުގައި ފެޑަރޭޝަނުން ސެކިއުރިޓީއަށް ކުރާ ހޭދަ ކަނޑައަޅާފައިވާ އަދަދަށްވުރެ އިތުރުވާނަމަ އެ ބައި ދައްކަން ޖެހޭނީ މެޗުގައި ވާދަކުރާ ކުލަބުތަކުން ކަމަށެވެ. ލޯ އޮފް ބްރޭމަން 2014 އަށް ރިއާޔަތްކޮށް ނިންމާފައިވާ ކޯޓުގެ ނިންމުމާއެކު ފުޓްބޯޅަ ފެޑަރޭޝަނުން ކަންބޮޑުވީ ސަޕޯޓަރުންނާއި ކުޅުންތެރިންނާއި އެ ނޫން ވެސް ފަރާތްތަކުގެ ސަލާމަތީ ކަންކަމަށް ކުލަބުތަކުން ދައްކަންޖެހޭ ފައިސާގެ އަދަދު ދުވަހެއް ދުވަހަކަށް އިތުރުވަމުންދާތީ އެވެ.
ޖަރުމަނު އެފްއޭއިން ބުނީ ސަލާމަތީ ކަންކަމަށް އެއިދާރާއިން ކުރަންޖެހޭ އަދަދަށްވުރެ އިތުރަށް ދައްކަންޖެހޭ އަދަދު ދައްކަން ކުލަބުތަކަށް ކުރިމަގުގައި ވެސް އަންގަމުންދާނެ ކަމަށާއި ނަމަވެސް ކުލަބުތަކުން ދައްކަންޖެހޭ އަދަދު އިތުރުވަމުން ދިއުމަކީ ވަރަށް ބޮޑު ކަންބޮޑުވުމެއް ކަމަށެވެ. ކޯޓުގެ ނިންމުމަށް ބަލާއިރު އާއްމުކޮށް މެޗުތައް ކުޅޭ ސްޓޭޑިއަމް ނިސްބަތްވާ ކުލަބުން ދައްކަންޖެހޭ އަދަދު ހުރީ ދުރާލައި ނުވިސްނައިފިނަމަ ކަންބޮޑުވާންޖެހޭ ފަދަ ހާލަތެއްގައި ކަމަށް ވެސް ފުޓްބޯޅަ ފެޑަރޭޝަނުން ބުނެ އެވެ.
"ފުލުހުންނަށް ދައްކަންޖެހޭ ބިލްތައް ލިބުމުން އަހަރުމެން އެ ބިލްތައް ފޮނުވަމުންދާނީ އެކަން ނިސްބަތްވާ ކުލަބަށް. އެކަމަކު މިއާއެކު ވެސް ބުނަން ޖެހެނީ ޕޮލިހުންނަށް މިހާރު ދައްކަމުންދާ ހޭދަ އިތުރުވުމަކީ އަދި މިއީ ގޯސް އެޕްރޯޗެއް،" ޖަރުމަނު އެފްއޭގެ ރައީސް ބާންޑް ނިއުއެންޑޯފް ވިދާޅުވި އެވެ.
އޭނާ ވިދާޅުވީ ފުލުހުންނަށް ކުރާ ހޭދަތައް ކުޑަކުރެވޭނީ ކުލަބުތަކުން އަމިއްލަ ސެކިއުރިޓީ ވަރުގަދަ ކޮށްގެން ކަމަށެވެ. އަދި ފުލުހުން ފުޓްބޯޅައިގެ ފޯރިމަރަން ހޭދަކުރާ މިންވަރު މަދުކުރަންޖެހޭ ކަމަށެވެ. އެކަމަކު ކުލަބުތަކަށް މިކަން ނުކުރެވޭނަމަ އަދާކުރަންޖެހޭ ހޭދަ ކުރިމަގުގައި އަތްނުފޯރާ ފަށަށް ހިނގައިދާނެ ކަމަށާއި މިއީ ދުރާލައި ފިކުރު ކުރަންޖެހޭ ކަމެއް ކަމަށްވެސް ނިއުއެންޑޯފް ތަކުރާރުކޮށް ވިދާޅުވި އެވެ.
ޖަރުމަނުގެ ބުންޑަސް ލީގާ އަކީ ދުނިޔޭގެ އެންމެ ކުރިއަރާފައިވާ އެއް ފުޓްބޯޅަ ލީގެވެ. ނަމަވެސް ފަހަހަކަށް އައިސް ބުންޑަސްލީގާ އާއި ބުންޑަސްލީގާ ދޭއްގައި ސެކިއުރިޓީން ބޭނުން ކުރަންޖެހޭ މިންވަރު ވަނީ އިތުރުވެފައެވެ. ސަބަބަކީ ސަޕޯޓަރުންގެ މެދުގައި ހިނގާ ދެބަސްވުންތަކާއި ހަމަނުޖެހުންތައް އިތުރުވުމެވެ. ނިއުއެންޑޯފް ވިދާޅުވީ މިކަން ކުޑަކުރުމަށް ކުލަބުތަކުން ހޭލުންތެރިވުމުގެ ޕްރޮގްރާމްތައް ސަޕޯޓަރުންނަށް ހިންގަން ޖެހޭ ކަމަށާއި ފުޓްބޯޅަ ފެޑަރޭޝަނުން ތިބީ ކުލަބުތަކުން ބޭނުންވާ އެހީތެރިކަން ފޯރުކޮށްދޭން ތައްޔާރަށް ކަމަށެވެ.