އެކުވެރިކަމުގެ ދެވަނަ މެޗު: ރާއްޖެއާއި ކިރްގިސްތާން މިރޭ

ފުޓުބޯޅައިގެ ބައިނަލްއަޤްވާމީ ބްރޭކުގައި ދިވެހިރާއްޖެއިން ކުޅޭ އެކުވެރިކަމުގެ ދެވަނަ މެޗުގައި މިރޭ އިރާކޮޅު ކިރްގިސްޠާނާ ދެކޮޅަށް ނުކުންނާނެއެވެ.

މިބްރޭކުގައި ރާއްޖެއިން ވަނީ މިމަހުގެ 24ވަނަ ދުވަހު ޗައިނާއާ ދެކޮޅަށް އެކުވެރިކަމުގެ މެޗެއް ކުޅެފައެވެ. ޗައިނާގައި ކުޅުނު އެ މެޗުން ރާއްޖެ ބަލިވީ 0-3ގެ ނަތީޖާއަކުންނެވެ.

ޖުމްލަ ތިން މެޗު ކުޅޭ މި ބްރޭކުގައި ރާއްޖޭގެ ދެވަނަ މެޗުގައި ކިރްގިސްޠާނުގައި އެ ގައުމާ ދެކޮޅަށް ރާއްޖެ ނުކުންނާނީ މިރޭ 19:00ގައެވެ.

މިއީ ބައިނަލްއަޤްވާމީ މައިދާނުގައި ދިވެހިރާއްޖެއާއި ކިރްގިސްޠާނުގެ ޤައުމީ ޓީމުން ވާދަކުރާނެ ފަސްވަނަ ފަހަރެވެ. މީގެކުރިން ހަތަރު ފަހަރެއްގެ މަތިން ރާއްޖެއިން ކިރްގިސްޠާނާ ދެކޮޅަށް ނުކުތްއިރު ކޮންމެ ޤައުމަކުން ވެސް ވަނީ ދެ މެޗު ކާމިޔާބުކޮށްފައެވެ.

ދެޓީމުން އެންމެފުރަތަމަ ކުރިމަތިލި ދެ ފަހަރަކީ ވެސް 1997ވަނަ އަހަރުގެ ޖޫން މަހު، ވޯލްޑް ކަޕް ކޮލިފައިންގައި ކުޅެންޖެހުނު ދެފަހަރެވެ. އެ ދެމެޗުން ވެސް މޮޅުވީ ކިރްގިސްޠާނެވެ. އެފަހުން މިދެޓީމުގެ ކުރިމަތިލުމެއް ދެން ފެނިގެންދިޔައީ 2011 ވަނަ އަހަރާއި 2014ވަނަ އަހަރެވެ. އެ ދެމެޗުން ވެސް މޮޅުވީ ރާއްޖެއެވެ.

އޭގެފަހުން ފުޓުބޯޅައިގައި ކިރްގިސްޠާނުން އެތައް ކުރިއެރުމެއް ހޯދާފައިވާއިރު ދިމާވި އެކި ހާލަތްތަކުގެ ސަބަބުން ރާއްޖޭގެ ފުޓުބޯޅައަށް ފާއިތުވީ އަހަރުތަކުގެ ތެރޭގައި ފެނިގެންދިޔައީ ދަތި، އުނދަގޫ ދުވަސްތަކެކެވެ. އެހެންނަމަވެސް ދިވެހި ފުޓުބޯޅައިގެ ހާލަތު ރަނގަޅުކޮށް، ކުރިއެރުވުމަށް އެފްއޭއެމްގެ އައު ޒައާމަތުން ކުރަމުން އަންނަ ކާމިޔާބު މަސައްކަތުގެ ދަށުން މި ފަހަރުގެ ބައިނަލްއަގްވާމީ ބްރޭކުގައި ރާއްޖެއިން ކުޅޭ ތިން މެޗަކީ ވެސް، ރާއްޖެއަށްވުރެ ވަރުގަދަ، ރޭންކިންގެ ގޮތުން މަތިން ދަރަޖަކުރެވިފައިވާ ޓީމުތަކަކަށް ހަދައި، މުހިންމު ތަޖުރިބާތަކެއް ހޯދައިދިނުމަށް ވަނީ ނިންމާފައެވެ.

މި ނިންމުމުގެ ދަށުން މިއަދު ކިރްގިސްޠާނާ ދެކޮޅަށް ރާއްޖެ ނުކުންނައިރު ފީފާ ރޭންކިންގައި ކިރްގިސްޠާން އޮތީ 106ވަނައިގައެވެ. އެއީ އޭޝިއާ ސަރަހައްދަށް ބަލާނަމަ ރޭންކިންގެ 19 ވަނައެވެ.