ކެމިކަލް ވިއްކާ ފަރާތްތަކުން ހުއްދައަށް އެދި ރަޖިސްޓްރީކުރުމުގެ މުއްދަތު އިތުރުކޮށްފި

ކެމިކަލް ވިއްކާ ވިޔަފާރިތައް ރަޖިސްޓްރީކުރުމަށް ދީފައިވާ މުއްދަތު އިތުރު އެއް މަސް ދުވަހަށް އިތުރުކޮށްފިއެވެ.

ނުރައްކާތެރި ކެމިކަލާ ބެހޭ ޤަވާއިދުގެ ދަށުން، ނުރައްކާތެރި ކެމިކަލް ވިއްކުމަށްޓަކާ އެ ކެމިކަލް ރައްކާކޮށްފައި ބަހައްޓާ ތަންތަން، ދިފާޢީ ވުޒާރާގެ މަކުޑި ޕޯޓަލްގައި ރަޖިސްޓްރީކޮށް ހުއްދަ ނެގުމަށް ވަނީ އަންގާފައެވެ. ނަމަވެސް ދީފައިވާ މުއްދަތުގައި ހުއްދަ ހޯދުމަށް އެދިފައިވާ ފަރާތްތަކުގެ އަދަދު، އެ ވިޔަފާރިކުރާ ފަރާތްތަކުގެ ނިސްބަތުން މަދުކަމަށް ފާހަގަކުރެވިފައިވާކަމަށް ދިފާޢީ ވުޒާރާއިން ވަނީ ވިދާޅުވެފައެވެ.

އެހެންކަމުން، ނުރައްކާތެރި ކެމިކަލް ވިއްކާ ފަރާތްތަކުން "ކެމިކަލް ވިއްކުމުގެ ހުއްދަ" ނެގުމަށާއި، ކެމިކަލް ވިއްކުމަށް ބަހައްޓާ އަދި ރައްކާކުރާ ތަންތަން މަކުޑި ޕޯޓަލްގައި ރަޖިސްޓްރީކުރުމަށް ދީފައިވާ މުއްދަތު، އަންނަ މަހުގެ 27ވަނަ ދުވަހުގެ ނިޔަލަށް އިތުރުކުރުމަށް ވަނީ ނިންމާފައެވެ.

އެ މުއްދަތުގައި ރަޖިސްޓްރީ ނުކޮށް ކެމިކަލް ވިއްކަމުންދާ ފަރާތްތަކާމެދު، ނުރައްކާތެރި ކެމިކަލާ ބެހޭ ގަވާއިދުގެދަށުން ފިޔަވަޅު އަޅައި، އެފަރާތްތަކަށް ނުރައްކާތެރި ކެމިކަލް ރާއްޖެ އެތެރެކުރުމުގެ ހުއްދަ އިތުރަށް ދެވެން ނޯންނާނެކަމަށް ދިފާޢީ ވުޒާރާގެ އިޢުލާނުގައި ވަނީ ވިދާޅުވެފައެވެ.

މާލޭގައި ސިއްރުން ނުވަތަ ސަލާމަތީ މިންގަނޑުތަކާ ޚިލާފަށް ކެމިކަލް ގުދަން ކުރުމަކީ، އޭގެ ސަބަބުން މީގެކުރިންވެސް ބޮޑެތި ގެއްލުންތަކެއް ލިބިފައިވާ ކަމެކެވެ. އެގޮތުން، 2019 ވަނަ އަހަރުގެ ސެޕްޓެންބަރު މަހުގެ ފަހުކޮޅު ހެންވޭރު އަބަދަށްފެހި މަގުގައި ހުރި ކެމިކަލް ގުދަނެއްގައި ރޯވެ ހިނގި ނުރައްކާތެރި އަލިފާނުގެ ހާދިސާގައި އެކަކު ވަނީ ނިޔާވެފައެވެ. އެ ހާދިސާގައި ހަ ގެއަކަށާއި، ހަތަރު ގުދަނަކަށް އަލިފާނުގެ އަސަރުކޮށް، އެތައް ބަޔަކު ހާލުގައި ޖެހުނެވެ. އެ ހާދިސާއާ ގުޅިގެން ސަރުކާރުން ވަނީ، މާލޭގައި ހުރި 40 އެއްހާ ކެމިކަލް ގުދަން ވަގުތުން ތިލަފުއްޓަށް ބަދަލުކޮށްފައެވެ.

ނަމަވެސް، އޭގެފަހުންވެސް 2023 ވަނަ އަހަރުގެ އޭޕްރީލް މަހުގެ ތެރޭގައި މާލޭގެ ލިލީ މަގުގައި ޤަވާއިދާ ޚިލާފަށް ކެމިކަލް ރައްކާކޮށްފައި ހުރި ގުދަނެއް ފެނިގެން ފުލުހުންނާއި، އެމްއެންޑީއެފުން ވަނީ އެތަން ހުސްކޮށް ބަންދުކޮށްފައެވެ. އަދި މިއަހަރު މާފަންނުގައިވެސް ގަސް ހެއްދުމަށް ބޭނުންކުރާ ކެމިކަލް ހުރި ގުދަނެއްގައި ނުރައްކާތެރި އަލިފާނުގެ ހާދިސާއެއް ހިނގާފައިވެއެވެ. މިފަދަ ހާދިސާތަކުގެ ސަބަބުން، މީހުން ދިރިއުޅޭ ސަރަހައްދުތަކުގައި ކެމިކަލް ގުދަން ކުރުމުގެ ނުރައްކާތެރިކަން ވަރަށް ބޮޑަށް ވަނީ ހާމަވެފައެވެ.