ބޯކޮށް ވާރޭވެހި ތައިލެންޑުގެ ވެރިރަށް ބެންކޮކްގައި ފެންބޮޑުވުމާ ގުޅިގެން ޤައުމީ އެއާލައިން، ތައި އެއާވޭޒްގެ ދަތުރުތައް ޢާންމު ޙާލަތަކަށް ގެންދިޔުމަށް ކުރަމުންދާ މަސައްކަތްތަކުގެ ދަށުން، ބައެއް އުދުހުންތައް މެދުކަނޑައިލާފައިވާ ކަން އެ އެއާލައިނުން ހާމަކޮށްފިއެވެ. މި ގޮތުން، ބެންކޮކުން ފުރުމަށް ހަމަޖެހިފައިވާ ފްލައިޓްތަކުގެ %30 ނުވަތަ ގާތްގަނޑަކަށް 30 ފްލައިޓް މެދުކަނޑައިލަން ނިންމާފައިވާ ކަމުގައި އެ އެއާލައިނުން ބުންޏެވެ. ބެންކޮކުން ފުރާ ފްލައިޓްތައް މަދުކުރަން ޖެހުނު މައްސަލަ މަދުވެގެން ތިން ދުވަހަށް ދެމިގެންދާނެ ކަމަށް އެ އެއާލައިނުގެ ޗީފް އެގްޒެކެޓިވް ޗައި އިއެމްސިރީ ވިދާޅުވިއެވެ.
އޮޕަރޭޝަނަލް ގާބިލުކަން ނުހިފެހެއްޓުމުގެ ސަބަބުން ވޭތުވެދިޔަ ދެ ދުވަހު ހުރިހާ ފްލައިޓެއްހެން ލަސްވި ކަމަށާއި، ތާވަލާ އެއްގޮތަށް ގަޑިއަށް ފުރާފައިވަނީ %3 އަށްވުރެ މަދު ފްލައިޓުތައް ކަމުގައި ޗައި ވިދާޅުވިއެވެ. ފާއިތުވި ހަފުތާއެއްހާ ދުވަހުގެ ތެރޭގައި، ބިންގަނޑު ތިރި ރަށެއް ކަމުގައިވާ ބެންގކޮކަށް ގާތްގަނޑަކަށް 320 މިލިމީޓަރުގެ ވާރޭ ވެހިފައިވާ ކަމުގައި އެ ޤައުމުގެ މޫސުމާބެހޭ އިދާރާއިން ހާމަކުރިއެވެ. މިއީ، އެވުރެޖުކޮށް މުޅި ސެޕްޓެންބަރު މަހު އެ ސިޓީއަށް އާންމުކޮށް ވެހޭ މިންވަރާ ދާދި އެއްވަރެކެވެ.
މި ޙާލަތުގެ ތެރެއިން ބެންގކޮކުގެ މައި އެއާޕޯޓުތައް ހިންގަމުންދިޔަ ނަމަވެސް، ސުވަރްނަޕޫމް އެއާޕޯޓުގައި ފޮއްޓާއި ދާގީނާ ބެލެހެއްޓުމަށް ބޮޑެތި ދަތިތަކެއް ކުރިމަތިވިއެވެ. މިއާއެކު، ތައި އެއާވޭޒްގެ ގްރައުންޑް އޮޕަރޭޝަންތަކަށް އެހީތެރިވުމަށް އެ ޤައުމުގެ އަސްކަރިއްޔާގެ ވައިގެ ސިފައިން 69 އޮސިފަރުން ނެރެފައިވާ ކަމުގައި އިދާރާތަކުން ހާމަކުރިއެވެ. އެއާޕޯޓުގައި ތާށިވެފައިވާ 5،600 ދާގީނާ 72 ގަޑިއިރުގެ ތެރޭގައި ވެރިފަރާތާ ޙަވާލުކުރެވޭނެ ކަމުގައި ޗައި ވިދާޅުވިއިރު، އިތުރަށް ވާރޭ ނުވެހޭނަމަ ތިން ދުވަހުގެ ތެރޭގައި ފެންގަނޑު ހިނދޭނެ ކަމުގައި ސަރުކާރުން ވަނީ ބުނެފައެވެ.
ފެންބޮޑުވުމުގެ މައްސަލަ ހައްލުކުރުމުގެ ދުރު-ރާސްތާ ޕްލޭންތަކާއި އަލުން އާރާސްތުކުރުމުގެ ފިޔަވަޅުތަކާ ގުޅޭގޮތުން ތައިލެންޑުގެ ކެބިނެޓުން ސެޕްޓެންބަރު 29 ވަނަ ދުވަހު މަޝްވަރާކުރާނެ ކަމުގައި އެ ޤައުމުގެ ސަރުކާރުގެ ތަރުޖަމާނު އެއްކަޕޯޕް ޕިއަންޕީސޭ ވިދާޅުވިއެވެ. ފެންބޮޑުވުމުގެ ސަބަބުން 40 ޕްރޮވިންސެއްގެ 1،267 ވިޔަފާރިއަކަށް އަސަރުކޮށްފައިވާއިރު، އޭގެ ތެރޭގައި 52 ކާރުޚާނާއަކާއި 1،162 ކުދި އަދި މެދުފަންތީގެ ވިޔަފާރި ހިމެނޭ ކަމުގައި އެ ޤައުމުގެ ސިނާއަތްތަކާބެހޭ ވަޒީރު ވަރަވޫތު ސިއްލަޕާއާސާ ވިދާޅުވިއެވެ. އަދި، މުޅި ގައުމަށް ލިބުނު އިޤުތިޞާދީ ގެއްލުން 320 މިލިޔަން އެމެރިކާ ޑޮލަރަށް ވުރެ މައްޗަށް އަރާނެ ކަމަށް އަންދާޒާ ކުރެވެއެވެ.