ޑްރަގް ވިއްކައިގެން ކުރެވޭނެ ވިޔަފާރިއެއް ރާއްޖޭގައި ދެން ނޯންނާނެ: ވަޒީރު އިޙްސާން

މަސްތުވާތަކެތި ވިއްކައިގެން މަންފާ ހޯދުން ނިމުމަކަށް ގެނައުމަށް ކުރަމުން އަންނަ މަސައްކަތުން އެފަދަ އެއްވެސް ވިޔަފާރިއެއް ރާއްޖޭގައި މިހާރު ކުރެވޭނެ ޖާގައެއް ނޯންނާނެ ކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ މިދިޔަ އާދީއްތަ ދުވަހުގެ ރޭ ބޭއްވި "އަހާ" ފޯރަމުގައި މަސްތުވާތަކެއްޗާ ގުޅޭގޮތުން އާންމުންގެ ފަރާތުން ހުށަހެޅި ސުވާލުތަކަށް ޖަވާބުދެއްވަމުންނެވެ.

ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވީ މަސްތުވާތަކެތީގެ ވިޔަފާރިކޮށްގެން އެއިން މަންފާ ހޯދަމުންދާ އެތައް ބަޔަކު ރާއްޖޭގައި ތިބިއިރު އަދުގެ ސަރުކާރުން އެކަން ހައްލުކުރުމަށް ދެ ގޮތަކުން މަސައްކަތް ފެއްޓެވި ކަމަށެވެ. އެގޮތުން، މަސްތުވާތަކެތީގެ ޝިކާރައަކަށްވެފައިވާ ފަރާތްތަކަށް ފަރުވާ ދިނުން ހަރުދަނާ ކުރުމާއި ޑްރަގް ނެޓްވޯކުތައް ހުއްޓުވުމަށް ފާއިތުވެދިޔަ ދެ އަހަރާއި ބައިގެ ތެރޭގައި ގިނަ މަސައްކަތްތަކެއް ކުރެވިފައިވާ ކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ރާއްޖެއަށް މަސްތުވާތަކެތި އެތެރެކޮށް، އެއިން ކުރާ ވިޔަފާރީގައި މަންފާ ހޯދާ ފަރާތްތައް ހުއްޓުވުމަށް ކުރާ މަސައްކަތުގެ ދަށުން މިހާތަނަށް މުޅި ރާއްޖެއިން 24 ނެޓްވޯކެއް ދެނެގަނެވިފައިވާ ކަމަށެވެ. މީގެ ތެރެއިން 3 ނެޓްވޯކެއްގެ މައްސަލަ ބަލައި، ކޯޓު މަރުހަލާގައި އޮތްއިރު އެ މައްސަލަތަކުގައި 3.6 މިލިޔަން ރުފިޔާ އާއި 148،000 ޑޮލަރު ނަގުދު ފައިސާ އަތުލައިގެންފައިވާ ކަމަށާއި ގިނަ އަދަދެއްގެ މުދާވެސް ހިމެނޭ ކަމަށް ވިދާޅުވިއެވެ. މި މައްސަލަތައް ނިމޭއިރު އެ ފައިސާ އާއި މުދާ ދައުލަތަށް ނެގޭނެ ކަމަށްވެސް ވަޒީރު ވިދާޅުވިއެވެ.

"އަޅުގަނޑުމެން ކުރީގައި ބަލަނީ ޑްރަގްސް އޮންނަ ކުއްޖާ ނަގާފައި ޖަލަށްލެވޭތޯ. އޭގެ ބަދަލުގައި މި ސަރުކާރުގެ ވިސްނުމަކީ ޑްރަގް ރާއްޖެއަށް އެތެރެކޮށް އޭގެ ވިޔަފާރިކުރާ ނެޓްވޯކްތައް ނައްތާލައި އެ މީހުންގެ ވިޔަފާރިތަކުން ހޯދާފައިވާ ފައިދާ ދައުލަތަށް ނަގައި، އެ މީހުން ހޯދާފައިވާ މުދަލެއް ވެއްޖެއްޔާ އެވެސް ދައުލަތަށް ނެގުން. ޑްރަގް ވިއްކައިގެން، ދިވެހިރާއްޖޭގެ ރައްޔިތުން ހާލުގައި ޖައްސާފައި ކުރެވޭނެ ވިޔަފާރިއެއް ދެން ރާއްޖޭގައި ނޯންނާނެ،" ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވިއެވެ.

ރާއްޖޭގެ އެކި ރަށްރަށުގައި ކެފޭތަކުގެ ގޮތުގައި މަސްތުވާތަކެތި ވިއްކައި އެތަކެތި ބޭނުންކުރާ ތަންތަން ހުއްޓުވުމަށް ކުރާ މަސައްކަތާ ގުޅޭ އެންމެ ފަހުގެ މައުލޫމާތުވެސް ވަޒީރު ވަނީ ހިއްސާކުރައްވާފައެވެ. އެގޮތުން، ޤާނޫނަށް ގެނައި އިސްލާހުތަކާއެކު މިހާތަނަށް 17 ތަނެއް ބަންދުކޮށްފައިވާ ކަމަށާއި އޭގެ ތެރޭގައި އައްޑު އަތޮޅުގެ 4 ތަނަކާއި ފުވައްމުލައް ސިޓީގެ ތަނަކާއި މާލޭގެ 12 ތަނެއް ހިމެނޭ ކަމަށް ވިދާޅުވިއެވެ.

"ކުރިއަށް އޮތް ނޮވެމްބަރު މަހާ ހަމައަށް އަޅުގަނޑުމެން މިބަލަނީ މާލޭގައި އާންމުކޮށް ޑްރަގް ވިއްކާ އުޅޭ މިކަހަލަ ގެތައް ނުވަތަ ކެފޭތަކުގެ ގޮތުގައި ބޭނުންކުރާ ތަންތަން އެއްކޮށް ބަންދުކުރެވޭތޯ." ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވިއެވެ.

ވަޒީރު ވިދާޅުވީ ރާއްޖެއަށް މަސްތުވާތަކެތި އެތެރެކުރުން ހުއްޓުވުމުގެ ގޮތުންވެސް މިދިޔަ ދެއަހަރާ ބައިގެ ތެރޭގައި ކާމިޔާބު މަސައްކަތްތަކެއް ކުރެވިފައިވާ ކަމަށެވެ. އެ މުއްދަތުގެ ތެރޭގައި 1.3 ޓަނުގެ މަސްތުވާތަކެތި އަތުލައިގެންފައިވާ ކަމަށް ވިދާޅުވިއެވެ. މިއީ މީގެ ކުރީގެ ހުރިހާ ސަރުކާރުތަކުގެ ފުރަތަމަ 3 އަހަރު ދުވަހު އަތުލައިގަތް މަސްތުވާތަކެއްޗާ އަޅާބަލާއިރު އިތުރު އަދަދެއްކަމަށް ވަޒީރު އިޙްސާން ވިދާޅުވިއެވެ.