ޤައުމެއްގެ ދިރުން ބިނާވަނީ ޢިލްމީ ސިކުނޑިތަކެއް އުފެދޭ މިންވަރެއްގެ މައްޗަށް: ވަޒީރު ހީނާ

ޤައުމެއްގެ ދިރުން ބިނާވަނީ ޢިލްމީ އަދި ފިކުރީ ސިކުނޑިތަކެއް އެބައެއްގެ ތެރޭގައި އުފެދެމުންދާ މިންވަރެއްގެ މައްޗަށްކަމަށް ފަންނާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދު ވިދާޅުވެއްޖެއެވެ.

ވަޒީރު މިފަދައިން ވިދާޅުވީ ވިލާ ކޮލެޖްގެ މިއަހަރުގެ ދަސްވެނިވުމުގެ ފުރަތަމަ ދަންފަޅީގައި ހިންގުމުގެ ދާއިރާ، އުނގަންނައިދިނުމާއި ކިޔަވައިދިނުމުގެ ދާއިރާއިން ސަނަދު ޙާޞިލްކުރި ދަރިވަރުންގެ ދަސްވެނިވުން ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.

ފަންނާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދު ވިދާޅުވީ ޤައުމަށް ބޭނުންތެރި މުހިންމު ދާއިރާތަކަކުން ދިވެހިން ދަސްވެނިވާ ކޮންމެ ހަފްލާއަކުން އަބަދުވެސް މުޅިޤައުމަށް އުފާވެރިކަން ގެނެސްދޭކަމަށެވެ. ސަބަބަކީ ޤައުމެއްގެ ދިރުން ބިނާވަނީ ޢިލްމީ އަދި ފިކުރީ ސިނކުޑިތަކެއް އެބައެއްގެ ތެރޭގައި އުފެދެމުންދާ މިންވަރެއްގެ މައްޗަށްކަމަށާއި ދަސްވެނިވާ ދަރިވަރުންނަށް އަބަދުވެސް ޤައުމު އުފަލާއެކު މަރުޙަބާ ކިޔާކަން ވަޒީރު ފާހަގަކުރިއެވެ.

ޤައުމެއްގައި ޢިލްމީ ރޫހެއް ބިނާކޮށް ފިކުރީ ވިސްނުންތަކެއް ބިނާކުރެވެނީ އެ ޤައުމެއްގެ ތަރުބަވީ ނިޒާމާއި ތަޢުލީމީ ނިޒާމުގެ ތެރެއިންކަން ފާހަގަކުރައްވާ ވަޒީރު ވިދާޅުވީ އުފަންވެ ބޮޑުވަމުން އަންނަ ކުޑަ ކުއްޖެއްގެ ސިކުނޑި ބޮޑުވުމުގައި އެންމެ މުހިންމު އެއް ދައުރު އަދާކުރަނީ އެކުއްޖަކު ތަރުބިއްޔަތުވަމުން އަންނަ މާހައުލާއި އަދި އުނގަންނައިދޭ އުނގެނުންތަކުގެ މައްޗައްކަމަށެވެ.

ޤައުމެއްގައި ޢިލްމީ ރޫހެއް އުފައްދައި އީޖާދީ އަދި ފިކުރީ ވިސްނުންތަކެއްގެ މަތީގައި ޤައުމެއް ދެމެހެއްޓުމުގެ އެންމެ ބޮޑު އެއް މަސްއޫލިއްޔަތު އެޅިފައިވަނީ ކުއްޖާ ތަރުބިއްޔަތު ކުރުމާއި އުނގަންނައިދިނުމާއި މި ދާއިރާގެ ބޭފުޅުންގެ އިސްތަށިފުޅުގައިކަމަށް ވިދާޅުވިއެވެ. ޖީލުން ޖީލަށް ޤައުމެއް ނަގަހައްޓައިދޭ ބަޔަކީ އެޤައުމެއްގައި ތިއްބަވާ އެދުރުންކަމަށް ވަޒީރު ހީނާ ފާހަގަކުރެއްވިއެވެ.

"ޢިލްމަކީ ހަމައެކަނި ވަޒީފާއެއް ހޯދުމަށްޓަކައި ހާސިލުކުރާ އެއްޗެއް ނޫން. އެއީ އިންސާނާގެ ހިތުގައި ދިއްލޭ އަލިކަމެއް. މިއަލިކަމުގެ ސަބަބުން އެ މުޖުތަމުއެއްގެ ތެރޭގައި އީޖާދީ ފިކުރުތައް އާލާވެ އެބަޔަކަށް އަމާންކަމާއި ހަމަޖެހުން ގެނެސްދޭ. އެ މުޖުތަމައަކުން އުފާވެރިކަން އިހްސާސްކުރެވޭ. ހަރުދަނާ އިޤްތިސާދެއް ޤާއިމްވެ ނަފާވެރިކަން އިތުރުކޮށްދޭ. ދުނިޔެ ދުންހައި ހަޟާރަތެއްގައި އެގޮތުގައި ކުރިއަރާއި ދިޔައީ އެބައެއްގެ ތެރޭގައި ތިއްވެބި އެދުރުން، ޖީލުތަކެއް މި ބިންގަލުގެ މަތީގައި ތަރުބިއްޔަތުކޮށް އުނގަންނައިދިނުމުގެ ސަބަބުން. މިއީ ދުނިޔޭގެ ތާރީޚު ދައްކަމުން އަންނަ އެންމެ ބޮޑު ހަޤީގަތްވެސްމެ" ހީނާ ވިދާޅުވިއެވެ.

ވަޒީރު ހީނާ ވަލީދު ވިދާޅުވީ ފުރިހަމަ އަދި ފާގަތި ޤައުމެއް ބިނާކުރުމަށްޓަކައި ފުންކޮށް ވިސްނައި، ދުރު ވިސްނޭ އަދި އަމިއްލަ ފަރުދީ ވިސްނުމަށްވުރެ ބޮޑަށް މުޅި ޤައުމުގެ މަސްލަހަތު އިސްކުރާނެ ބަޔަކު ބޭނުންވާކަމަށެވެ.

ފިކުރީ ވިސްނުންތަކާއި ޢިލްމީ ސިކުނޑިތަކެއް އުފަންކޮށްގެން ހަމައެކަނި ފުދެންނެތްކަން ފާހަގަކުރައްވާ ވަޒީރު ވިދާޅުވީ ޤައުމަކަށް ބޭނުންވަނީ އަހްލާޤީ އަދި އިންސާނީ ކަރާމަތައް ހުރުމަތްތެރިކޮށް ހިތާ އެކަކު އަނެކެއްގެ ޚިޔާލުތަކަށް އިހްތިރާމްކުރާ ކޮންމެ ކަމެއްގެވެސް ހަގީގަތް ބޭލުމާއި، އިހްތިރާމްކުރާ ތަރުޒީބީ ސިފަތައް ޤައުމެއްގައި އަށަގަންފައި ހުރުންކަމަށެވެ.

ވަޒީރު ވިދާޅުވީ ޢިލްމީ މީހުންގެ ގޮތުގައި އާންމު މުޖްތަމައުއަށް ނުކުންނައިރު މީހުން ބަލާނީ ހަމައެކަނި މައުލޫމާތުގެ މުއްސަނދިކަމާއި ޢިލްމުވެރިކަމަށް އެކަނި ނޫންކަމަށެވެ. ހަމައެއާއެކު ނަފްސުގައިވާ ތެދުވެރިކަމަށް ބަލާނެކަމަށާއި އަދި ޤައުމުގެ މާދަމާވަނީ އެދުރުންގެ އަތްމަތީގައިކަމަށް ފަންނާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދު ވިދާޅުވިއެވެ.