ޔާމީން ރަޝީދުގެ މަރު: އަޑުއެހުންތައް ނިންމާލައިފި

ބްލޮގަރު ޔާމީން ރަޝީދު މަރާލި މައްސަލައިގައި ކްރިމިނަލް ކޯޓުގައި ކުރިއަށްގެންދިޔަ ޝަރީޢަތުގެ އަޑުއެހުންތައް މިއަދު ނިންމާލައިފިއެވެ. މި މައްސަލައިގައި ދެން އޮންނާނީ ހުކުމް އިއްވުން ކަމަށް މައްސަލަ ބައްލަވާ ފަނޑިޔާރުންގެ ބެންޗުން ވަނީ އިއުލާން ކުރައްވާފައެވެ.

2017ވަނަ އަހަރުގެ އެޕްރީލް މަހު ޔާމީން ރަޝީދު ދިރިއުޅުނު ގޭގެ ސިޑިގޮޅި ތެރޭގައި ތޫނު އެއްޗެހިން ހަމަލާދީ މަރާލި މައްސަލާގައި ދައުލަތުން ފުރަތަމަ ދައުވާކުރީ 6 މީހެއްގެ މައްޗަށެވެ. އޭގެ ތެރެއިން ހ. އަންނާރުމާގޭ އިސްމާއިލް ހައިޝަމް ރަޝީދާއި މ. އިރަސްމިކުގޭ އަހުމަދު ޒިހާން އިސްމާއިލްގެ މައްޗަށް ކުށް ސާބިތުވެ، 2022 ވަނަ އަހަރު އުމުރަށް ޖަލަށްލާން ހުކުމް ކުރިއެވެ.

ނަމަވެސް އެ މައްސަލަ އިސްތިއުނާފް ކުރުމުން ހައި ކޯޓުން ވަނީ އަލުން ބަލަން އަމުރުކޮށްފައެވެ. އަދި ކުށް ސާބިތުނުވި މ. ތާއިފް އިސްމާއިލް ރަޝީދާއި ގދ. ގައްދޫ ސިންދުބާދުގޭ މުހައްމަދު ދިފްރާންގެ މައްޗަށް އެންމެ ފުރަތަމަ ކޮށްފައިވާ ދައުވާވެސް އަލުން ބެލުމަށް ހައި ކޯޓުން އަމުރުކުރުމާ ގުޅިގެން މިއަދު ކުރިއަށް ގެންދިޔައީ އެ ދެ މީހުންގެ މައްސަލައިގެ ބަޔެވެ.

މިއަދުގެ އަޑުއެހުމުގައި ދައުލަތުން ބުނީ، ޔާމީނަށް ހަމަލާދިން ރޭ އިސްމާއިލް ރަޝީދު ސައިކަލެއްގައި މަޑުކޮށްގެން ހުރި ކަމަށާއި، ހަމަލާދިން މީހުން ނިކުތުމުން އެކަކު ގޮވައިގެން ސައިކަލުގައި ދިޔައީ އިސްމާއިލް ރަޝީދުކަން ހެކިންގެ ބަހުން އެނގޭ ކަމަށެވެ. އަދި ޔާމީން މަރާލުމުގެ މަޝްވަރާތަކުގައި އިސްމާއިލް ބައިވެރިވި ކަމަށާއި، ދިފްރާން ޔާމީނަށް ފާރަލުމުގައި ބައިވެރިވެ ޖެހިގެން އައި ދުވަހު އެ ސަރަހައްދުގައި ހަރަކާތްތެރިވި ކަން ފުޓޭޖުތަކުން އެނގޭތީ، އެ ދެ މީހުންގެ މައްޗަށް ކުށް ސާބިތުވާ ކަމަށް ކަނޑައަޅައިދިނުމަށް ދައުލަތުން އެދުނެވެ.

ދިފާއީ ވަކީލު ވިދާޅުވީ، ސިއްރު ހެކިން ހެކިބަސް ދީފައިވަނީ ގަބޫލުކުރާ ކުރުމެއްގެ މައްޗަށް ބިނާކޮށް އަދި ދައުލަތުން ބުނެދިން ގޮތަކަށް ކަމަށެވެ. އަދި ދިފާއުގެ ގިނަ ސުވާލުތަކަށް އެ ހެކިން ޖަވާބުދޭން ދެކޮޅު ހަދާފައިވާ ކަމަށާއި، މުހިންމު ހެކިވެރިޔާގެ ހެކިބަހުގެ ތެދުކަމާ މެދު ސުވާލު އުފެދޭ ކަންކަން ހުރި ކަމަށް ފާހަގަކުރެއްވިއެވެ. މީގެ އިތުރުން، މައްސަލައިގައި ހުށަހެޅި ވީޑިއޯ ސްނެޕްޝޮޓްތަކަކީ މީހުން ދެނެގަނެވޭ މިންވަރަށް ވުރެ ނުސާފު އެއްޗެހި ކަމަށާއި، ފުލުހުންގެ ފަރުވާކުޑަކަން ފާހަގަކުރައްވައި ދެ މީހުންގެ މައްޗަށް ކުށް ސާބިތުނުވާ ކަމަށް ނިންމައި ދިނުމަށް ވަކީލު އެދިވަޑައިގެންނެވިއެވެ.

މި މައްސަލައިގައި ދެން ދައުވާލިބޭ ހައިޝަމާއި ޒިހާންގެ ބައިގެ އަޑުއެހުންތައްވެސް ކުރިން ނިމިފައިވާތީ، ދެން އޮންނާނީ ހަތަރު މީހުންގެ މައްޗަށްވެސް ހުކުމް އިއްވުމެވެ. މި މައްސަލަ ކްރިމިނަލް ކޯޓުގައި ބައްލަވަނީ ގާޒީ އިބްރާހިމް އިހްސާނާއި، ގާޒީ މުހައްމަދު މިސްބާހު އަދި ގާޒީ އަލީ ނަދީމް ހިމެނިވަޑައިގަންނަވާ ފަނޑިޔާރުންގެ ބެންޗަކުންނެވެ. ބެންޗުގެ ރިޔާސަތު ބަލަހައްޓަވަނީ ގާޒީ އިހްސާނެވެ.