2028 ވަނަ އަހަރުގެ އެފްރިކާ ކަޕް ފުޓުބޯޅަ މުބާރާތް ބާއްވަން ތިން ގައުމަކުން ކުރިމަތިލައިފިއެވެ.
މި މުބާރާތް ބާއްވަން ރަސްމީކޮށް އެދުނު ތިން ގައުމަކީ ދެކުނު އެފްރިކާ އާއި ބޮޓްސްވާނާ އާއި ޒިމްބާބުވޭއެވެ. މީގެ ތެރެއިން ސަރުކާރުން އެއްބާރުލުން ދޭނެ ކަމުގެ ޔަގީންކަން މިހާތަނަށް ލިބިފައިވާ ހަމައެކަނި ގައުމަކީ ޒިމްބާބުވޭއެވެ.
މިހެންވެ މި ތިން ގައުމުން ގުޅިގެން ހުށަހެޅި ބިޑާމެދު ގޮތެއް ނިންމަން އެފްރިކާގެ ފުޓުބޯޅަ ޖަމިއްޔާ އަށް ވަނީ ދަތިކަމަކަށްވެފައެވެ.
އެފްރިކާގެ މީޑިއާތަކުން ބުނާ ގޮތުގައި މުބާރާތް ހަމައެކަނި ޒިމްބާބުވޭގައި ބާއްވަން ނިންމުން ވެސް ވަނީ ތަފާތު ސަބަބުތަކާހެދި ދަތިކަމަކަށްވެފައެވެ. މީގެ ތެރެއިން އެއް ސަބަބަކީ އެ ގައުމުގައި ހުރި ފުޓުބޯޅައިގެ ވަސީލަތްތައް ފުރިހަމަ ނުވުމާއި ސަރަހައްދީ ބޮޑު މުބާރާތެއް ބޭއްވުމުގައި އެގައުމަށް މިހާތަނަށް އެކަށީގެންވާ ތަޖުރިބާތަކެއް ހޯދިފައިނުވާތީއެވެ.
އެފްރިކާގެ އެންމެ ބޮޑު ފުޓުބޯޅަ މުބާރާތް ބާއްވަން މި ތިން ގައުމުން ހުށަހެޅި ބިޑްގައިވަނީ މުބާރާތް ބޭއްވުމުގެ ހުރިހާ ކަމެއްގައި ވެސް ތިން ގައުމުން އެއްވަރަކަށް ކަންކަން ހިއްސާ ކުރާނެ ކަމަށެވެ. ނަމަވެސް ބޮޓްސްވާނާއިން ސެމީ ފައިނަލް މެޗެއް އެ ގައުމުގައި ބާއްވަން ބޭނުންވެއެވެ. މިހެންވެ މިއީ ވެސް ތިން ގައުމުގެ އެކުވެރިކަން ނެތްކަމެއްކަން ދޭހަވާ ކަމެއްކަމަށް އެފްރިކާގެ މީޑިއާތަކުން ސިފަކުރެއެވެ.
މުބާރާތް ބާއްވާނެ ގައުމެއް އެފްރިކާގެ ފުޓުބޯޅަ ޖަމިއްޔާއިން އަންނަ ހަފުތާގައި ނިންމާނެ ކަމަށް ވަނީ ބެލެވިފައެވެ.
ކޮންމެ ދެ އަހަރަކުން ބާއްވަމުން އަންނަ އެފްރިކާ ކަޕް ފުޓުބޯޅަ މުބާރާތް ޔޫރޯ އާއި ކޮޕާ އެމެރިކާ ފަދައިން ކޮންމެ ހަތަރު އަހަރަކުން ބާއްވަން އެފްރިކާގެ ފުޓުބޯޅަ ޖަމިއްޔާއިން ވަނީ މި އަހަރު ކުރީކޮޅު ފާސްކޮށްފައެވެ. ނަމަވެސް އެނިންމުމަށް އަމަލު ކުރަން ފަށާނީ 2028 ވަނަ އަހަރުގެ މުބާރާތަށް ފަހުއެވެ.
އެފްރިކާގެ ފުޓުބޯޅަ ޖަމިއްޔާއިން ބުނީ މުބާރާތުގެ ފެންވަރު ރަނގަޅު ކުރުމަށާއި މބާރާތުގައި އެއްވެސް މައްސަލައެއް ނުޖެހި ކުރިއަށް ގެންދިއުމަށް ހުށަހަޅާފައިވާ ބިޑަށް ކޮންމެ ގައުމެއްގެ ވެސް ސަރުކާރުގެ އެއްބާރުލުން ލިބުމަކީ މުހިންމު ކަމެއް ކަމަށެވެ. އަދި ގައުމުތަކަށް މިކަމުގައ ހައްލެއް ނުހޯދިއްޖެނަމަ މޮރޮކޯފަދަ ވަސީލްތަތއް ފުރިހަމަ ގައުމެއްގައި މުބާރާތް ބޭއްވުމަކީ އެކަށީގެންވާ ކަމެއް ކަމަށް ވެސް އެފްރިކާގެ މީޑިއާތަކުން ބުނެއެވެ.