އިންގްލެންޑްގެ ފޯވަޑް ހޭރީ ކޭން ފަދަ އިތުރު ކުޅުންތެރިއަކު އެ ގައުމުގައި ނެތް ކަމަށާއި އަދި އެފަދަ އިތުރު ކުޅުންތެރިއަކު ހޯދުމަކީ ދަތި އުނދަގޫ ކަމެއް ކަމަށް އިންގްލެންޑްގެ ކޯޗު ތޯމަސް ޓުޗެލް ބުނެފިއެވެ.
ޔޫއެފާ ނޭޝަންސް ލީގުގައި މިދިޔަ ބުދަ ދުވަހު ޗެކް ރިޕަބްލިކް އަތުން އިންގްލެންޑް 2-0 ގެ ނަތީޖާއަކުން އިންގްލެންޑް މޮޅުވި މެޗުގައި ހެރީ ކޭން ވަނީ ލަނޑެއް ޖަހާފައެވެ. މިއީ އޭނާ ގައުމީ ޓީމަށް ކުޅުނު 123 ވަނަ މެޗުގައި ޖެހި 87 ވަނަ ލަނޑެވެ.
ކޭން ގައުމީ ޓީމަށް 123 މެޗު ކުޅެފައިވާއިރު މިއީ އިންގްލެންޑްގެ ގައުމީ ޓީމަށް އެންމެ ގިނަ މެޗު ކުޅެފައިވާ ޕީޓަރ ޝިލްޓަންއަށްވުރެ 2 މެޗު މަދު އަދަދެކެވެ.
ޖަރުމަނުގެ ބަޔާން މިއުނިކަށް ކުޅެމުންދާ އުމުރުން 33 އަހަރުގެ ކޭން ވަނީ ނިމިގެންދިޔަ ސީޒަނުގައި ބަޔާން މިއުނިކާއި ގައުމީ ޓީމަށ ޖުމްލަ 73 ލަނޑު ޖަހައިދީ ބެލޮންޑިއޯއަށް ވާދަ ކުރާ ކުޅުންތެރިންގެ ތެރޭގައި ހިމެނިފައެވެ.
ޓުޗެލް ބުނެފައިވަނީ ހެރީ ކޭން އަކީ ހުރިހާ ގޮތަކުންވެސް ތަފާތު ކުޅުންތެރިއެއް ކަމަށާއި އެގޮތުން އޭނާއަކީ ދަނޑު މަތީގަ އާއި އަދި ދަނޑުން ބޭރުގައިވެސް ރަގަޅު ލީޑަރެއް ކަމަށެވެ.
"ފުރަތަމަ ކަމަކަށް ކޭން ފަދަ އިތުރު ކުޅުންތެރިއަކު އިންގްލެންޑަށް ނުހޯދޭނެ. އެއީ ކައިރި މުސްތަގުބަލެއްގައި ވާނެ ކަމެއް ނޫން. ދެވަނަ ކަމަކަށް އޭނާއަކީ އަބަދުވެސް ކުޅުންތެރިންނަށް ހިތްވަރު ދީ ޓީމު ރަގަޅަށް ނެރުމަށް އެންމެ ފުރަތަމަ މަސައްކަތް ކުރާ ކުޅުންތެރިޔާ. އެއީ ފުރިހަމަ ލީޑަރެއް." ޓުޗެލް ބުންޏެވެ.
ޓުޗެލް އިތުރަށް ބުނެފައިވަނީ ލަނޑު ޖެހުމުގެ އިތުރުން އެހެން ކުޅުންތެރިންނަށް ފުރުސަތުތައް ތަނަވަސްކޮށްދިނުމުގައިވެސް ކޭން އަކީ ރަގަޅު ކުޅުންތެރިއެއް ކަމަށެވެ. އަދި އޭނާ ނެތްތަން ފޫބެއްދޭނެ ކުޅުންތެރިއަކު ހޯދުމަކީ އޭނާއަށް ކުރެވޭނެ ކަމެއް ނޫން ކަމަށެވެ.