ދުނިޔޭގެ ފުޓްބޯޅައިގެ މައި އިދާރާ, ފީފާގެ ރައީސް ޖިއާނީ އިންފަންޓީނޯ ފުޓްބޯޅައިން އެއްކޮށް ދުރު ކުރަން ޖެހޭކަމަށް މެންޗެސްޓަރ ސިޓީގެ ކަންތައްތައް ފަޅާ އަރުވާލި ހެކަރު, ޕޯޗުގަލްގެ ރުއި ޕިންޓޯ ބުނެފިއެވެ.
ރުއި ޕިންޓޯ ހިންގާ "ފުޓްބޯލް ލީކްސް" ވެބްސައިޓުގައި އާންމުކުރި މައުލޫމާތުތަކާއި ގުޅިގެން ޕްރިމިއާ ލީގުން ވަނީ މެންޗެސްޓަރ ސިޓީ އާއި ގުޅޭ 115 މައްސަލައެއް ބަލާ އެ މައްސަލަތަކުން އެ ކްލަބު ކުށްވެރިވާކަމަށް ނިންމާފައެވެ.
އެ މައުލޫމާތުން އެނގޭ ގޮތުގައި ސިޓީން ވަނީ އެކްލަބަށް މަލީގޮތުން އެހީތެރިވެދޭ ފަރާތްތަކާއެކު ލީގަށް އޮޅުވާލުމުގެ ގޮތުން ކޮންޓްރެކްޓްތަކެއް ހަދާ އެކްލަބަށް ލިބުނު އާންމްދަނީ އޮޅުވާލާފައެވެ. މިގޮތުން 830 މިލިއަން ޕައުންޑް އެކްލަބަށް ނުގަވައިދުން ލިބިފައިވާކަން ލިޔެކިޔުންތަކުން އެނގޭކަމަށް ޕްރިމިއަރ ލީގުން ހާމަކުރެއެވެ.
ރުއި ޕިންޓޯ އެކްސްގައި ކުރި ޕޯސްޓެއްގައި ބުނެފައިވަނީ 2018 އިން ފެށިގެން އިންފަންޓީނޯ ވަނީ މެންޗެސްޓަރ ސިޓީގެ އިތުރުން ފްރާންސްގެ ޕީއެސްޖީ ޔޫއެފާގެ ފައިނޭންޝަލް ފެއާ ޕްލޭ އާއި ހިލާފުވެފައިވާތީ އެކަމަށް ޔޫއެފާއިން ފިޔަވަޅު އަޅަން ނިންމުމުން އެކަމަށް ނުފޫޒު ފޯރުވާފައި ކަމަށެވެ.
އެ ރިޕޯޓްތަކުން ހާމަވާގޮތުގައި މި ދެ ކްލަބުންވެސް ވަނީ ފައިނޭންޝަލް ފެއާ ޕްލޭއަށް ފެއްތުމުގެ ގޮތުން ސްޕޮންސަރޝިޕް ކޮންޓްރެކްޓްތަކުގެ އަގު ބޮޑުކޮށްފައެވެ. އަދި 2014 ވަނަ އަހަރު ޔޫއެފާއިން ދިން އަދަބު ލުއި ކުރުމަށްޓަކައި އިންފަންޓީނޯ ވަނީ މަސައްކަތް ކޮށްފައެވެ.
އޭރު ޕީއެސްޖީ އިން ވަނީ އެކަމުގައި ގޯހެއް ނަހަދާ ކަމަށާއި އެ ކްލަބުން އަބަދުވެސް މަސައްކަތް ކުރަމުންދަނީ ޔޫއެފާ އާއި ފީފާގެ ހެދިފައިވާ ގަވާއިދުތަކާއި އެއްގޮތަށް މަސައްކަތް ކުރަމުން ކަމަށްވެސް ބުނެފައެވެ.
ޕިންޓޯ ލީކު ކޮށްލާފައިވާ ރިޕޯޓްތަކުން އެނގޭ ގޮތުގައި 2014 ވަނަ ޕީއެސްޖީގެ އިތުރުން މެންޗެސްޓަރ ސިޓީއަށް ޔޫއެފާ ތެރެއިން ލުއި ދިނުމުގައި އެންމެ މުހިންމު ދައުރެއް އަދާކޮށްފައިވަނީ އޭރު އެ އިދާރާގެ ޖެނެރަލް ސެކްރެޓަރީ އަކަށް ހުރި ޖިއާނީ އިންފަންޓީނޯ އެވެ. އޭނާ ފީފާގެ ރައީސް ކަމަށް އިންތިހާބު ވެފައިވަނީ 2016 ވަނަ އަހަރު ބޭއްވި އެ އިދާރާގެ އިންތިހާބުގައެވެ.
އަދި އޭރު އިންފަންޓީނޯ ވަނީ މަގާމުގެ ނުފޫޒު ބޭނުންކޮށް ސިއްރު މައުލޫމާތުތަކެއް އެ ކްލަބްތަކާއި ހިއްސާކޮށް އެ އިންވެސްޓިގޭޝަނަށް ނުފޫޒު ފޯރުވާ އެ ދެ ކްލަބަށް ހަމައެކަނި ޔޫއެފާގެ ޖުރިމަނާއަކުން ފުއްދާލެވޭނެ ގޮތެއް ހެދުމަށް މަގުފަހިކޮށްފައެވެ.
ޕިންޓޯ ފުޓްބޯލް ލީކްސްގައި ހާމަކޮށްފައިވާ މައުލޫމާތުގެ އިތުރުން އޭނާ އެކްސްގައި ބުނެފައިވަނީ އިންފަންޓީނޯ އާއި ގުޅޭ ގޮތުން އޭނާއަށް ބުނެވޭނީ އެއީ ފުޓްބޯޅައަށް ޖެހިފައިވާ ކެންސަރެއް ކަމަށާއި އެހެންކަމުން އޭނާއަށް ފުޓްބޯޅައިގައި އެއްވެސް ވަރަކަށް އުޅުމުގެ ފުރުސަތު ދެވިގެން ނުވާނެކަމަށެވެ.
ޕިންޓޯގެ ވާހަކަތަކާއިއެކު އިންފަންޓީނޯއަށް ވަނީ އިތުރު މައްސަލަތަކާއި ކުރިމަތިލާން ޖެހިފައެވެ. އަންނަ އަހަރު އޮންނަ ފީފާގެ އިންތިހާބުގައި އިންފަންޓީނޯ ވާދަކުރާނެކަން އިއުލާން ކޮށްފައިވާއިރު, އޭނާ އާއި ދެކޮޅަށް ޔޫއެފާގެ އިތުރުން އޭއެފްސީން ވެސް ވަނީ ފާޅުގައި މަސައްކަތް ފަށާފައެވެ. އަދި ޔޫރަޕްގެ ގިނަ ގައުމުތަކުންވަނީ އިންފަންޓީނޯއަށް ކުރި ތާއީދު އަނބުރާ ގެންގޮސްފައެވެ.
ޕޯޗުގަލް އަށް އުފަން 34 އަހަރުގެ ރުއި ޕިންޓޯ އަކީ "ފުޓްބޯލް ލީކްސް" ގެ ނަމުގައި ވެބްސައިޓެއް ހަދާ ފުޓްބޯޅައާއި ގުޅުންހުރި އެކިއެކި މައުލޫމާތުތައް އާންމުކޮށްލި ފަރާތެވެ.
2015 ވަނަ އަހަރު އުފެއްދި މި ވެބްސައިޓުގައި ފުޓްބޯޅަ އާއި ގުޅުންހުރި އެތައް މިލިއަން ޑޮކިއުމަންޓްތަކެއް އާންމު ކުރުމާއިއެކު އެންމެ ގިނަ ބައެއްގެ ސަމާލުކަމަށް އައިސްފައިވަނީ މެންޗެސްޓަރ ސިޓީ އާއި ގުޅޭ ގޮތުން އާންމުވި މައުލޫމާތުތަކާއިއެކު ޕްރިމިއާ ލީގުން އެ ކްލަބުގެ މައްސަލަތަކެއް ބަލާ ފިޔަވަޅު އެޅި މައްސަލައެވެ.
ފުޓްބޯޅަ އާއި ގުޅުންހުރި އެތަނެއް ޑޮކިއުމެންޓެއް އާންމު ކުރުމާއިއެކު ޕޯޗުގަލްގެ ކޯޓަކުން ވަނީ އޭނާގެ މައްސަލައެއް ބަލާ 4 އަހަރުގެ ޖަލު ހުކުމެއްވެސް އޭނާއަށްކޮށްފައެވެ. ނަމަވެސް އެ ހުކުމް އޮތީ ސަސްޕެންޑެޑް ހުކުމެއްގެ ގޮތުގައެވެ.
ޕޯޗުގަލްގެ ކޯޓުން ޕިންޓޯގެ މައްޗަށް ކުރި ޝަރީއަތަކީ ހުއްދަ ނެތް މައުލޫމާތުތަކެއް ހޯދާ އެ މައުލޫމާތުތައް އާންމުކުރުމުގެ ދައުވާއެވެ. ނަމަވެސް އޭނާ އޭރު ބުނެފައިވަނީ އޭނާއަކީ ހެކަރެއް ނޫން ކަމަށެވެ. އަދި އޭނާ ކޮށްފައިވާ މަސައްކަތަކީ ވިސިލްބްލޯވަރެއްގެ ދައުރު ކަމަށެވެ.
2019 ވަނަ އަހަރުގެ ޖެނުއަރީ މަހު ހަންގޭރީންވެސް ވަނީ ޕިންޓޯ ހައްޔަރުކޮށް ފަހުން ދޫކޮށްފައެވެ. އަދި 2020 ވަނަ އަހަރުގެ ފަހުކޮޅު އޭނާގެ ޝަރީއަތްވަނީ ފަށާފައެވެ.
މި ދައުވާތަކާއި ގުޅިގެން ޕިންޓޯ ވަނީ އެކަމަށް އިންކާރުކޮށްފައެވެ. އަދި އޭނާ ބުނެފައިވަނީ އޭނަގެ މަސައްކަތަކީ ފުޓްބޯޅައިން ކޮރަޕްޝަން ނައްތާލުން ކަމަށާއި އޭނާ ހާމަކޮށްފައިވާ މައުލުމާތުތަކަކީ ކޮރަޕްޝަނުގެ މައުލޫމާތުތަކެއް ކަމަށާއި އެކަން އާންމުންނަށް އެނގެން ޖެހޭނެކަމަށް ގަބޫލުކުރާ ކަމަށެވެ.