މޮރޯކޯގެ އައު ބޮޑުވަޒީރަށް ރައީސް ތަހުނިޔާ ފޮނުއްވައިފި

މޮރޯކޯގެ އައު ބޮޑުވަޒީރު ފާތިމާ އައްޒަހްރާ އަލް މަންސޫރީއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަރުޙަބާ ވިދާޅުވެއްޖެއެވެ.

ރައީސުލްޖުމްހޫރިއްޔާ އެކަމަނާއަށް ފޮނުއްވި ސިޓީގައި ވަނީ، މޮރޮކޯގެ 18ވަނަ ބޮޑުވަޒީރުގެ މަޤާމަށް އައްޔަން ކުރެއްވުމާ ގުޅިގެން ދިވެހި ސަރުކާރާއި ރައްޔިތުންގެ ނަމުގައި މަރުޙަބާ ވިދާޅުވެފައެވެ. އަދި މޮރޮކޯގެ ބޮޑުވަޒީރުކަމަށް ފުރަތަމަ ފަހަރަށް އަންހެނަކު އައްޔަން ކުރެވުމަކީ، އެ ޤައުމަށާއި މުޅި ޢަރަބި ދުނިޔެއަށް ތާރީޚީ ކުރިއެރުމެއް ކަމަށް އެމަނިކުފާނު ވިދާޅުވިއެވެ.

ފާތިމާއަކީ، ޢަރަބި ޤައުމުތަކުގެ ތެރެއިން ޤައުމެއްގެ މިފަދަ މަޤާމަކަށް އައްޔަންކުރި ދެވަނަ އަންހެން ބޭފުޅާކަން ފާހަގަކުރައްވައި ރައީސުލްޖުމްހޫރިއްޔާ ވިދާޅުވީ މިއީ އެ ސަރަހައްދުގެ ސިޔާސީ ތާރީޚުގައި ހުޅުވިގެންދިޔަ އައު ސޮފްހާއެއް ކަމަށެވެ. އަދި އެކަމަނާ އެ މަޤާމަށް އައްޔަން ކުރެއްވުމަކީ، ހިންގުމުގެ ދާއިރާގައި އަންހެނުންނަށް ލިބުނު ކުރިއެރުމެއް ކަމަށާއި އެކި ޤައުމުތަކުގައި ދިރިއުޅޭ އަންހެނުންނަށް ނަމޫނާއެއް ކަމަށްވެސް ރައީސް ވިދާޅުވިއެވެ.

ރައީސުލްޖުމްހޫރިއްޔާގެ މެސެޖުގައި ވަނީ، އަންހެނުންގެ ޙައްގުތައް ކަށަވަރުކޮށް އާންމު ދިރިއުޅުމުގައި އަންހެނުންގެ ހިއްސާ އިތުރު ކުރުމަށް ދިވެހިރާއްޖެއިން އަބަދުވެސް މަސައްކަތް ކުރައްވާނެ ކަމުގެ ޔަގީންކަން ދެއްވާފައެވެ.

ރާއްޖެއާއި މޮރޮކޯއާ ދެމެދު އުފެދިފައިވާ ގާތް ރަހުމަތްތެރިކަމުގެ ގުޅުމަށް އަލިއަޅުއްވާލައްވައި ރައީސުލްޖުމްހޫރިއްޔާ ވިދާޅުވީ، އެ ގުޅުމަކީ އެއްޤައުމު އަނެއް ޤައުމަށް ކުރާ އިޚުތިރާމުގެ މައްޗަށް ބިނާވެފައިވާ ގުޅުމެއް ކަމަށެވެ. އަދި ކުރިއަށް އޮތްތަނުގައި މި ދެ ޤައުމަށް ފައިދާވާނެ ކަންކަމުގައި ގުޅުން އިތުރަށް ބަދަހިކުރުމަށް ފާތިމާގެ ބޮޑުވަޒީރު ކަމުގައި ގުޅިގެން މަސައްކަތް ކުރުމަށް ދިވެހި ސަރުކާރުން ތައްޔާރަށް އޮތް ކަމަށްވެސް އެމަނިކުފާނު ވިދާޅުވިއެވެ.

ރައީސް ވަނީ، ފާތިމާގެ ބޮޑުވަޒީރު ކަމުގައި މޮރޮކޯއާއި އެ ޤައުމުގެ ރައްޔިތުންނަށް ތަރައްޤީއާއި ކުރިއެރުމަށް އެދިވަޑައިގެންފައެވެ. އަދި އެކަމަނާއަށް ކާމިޔާބީއަށްވެސް އެދިވަޑައިގެންނެވިއެވެ.

މޮރޮކޯގެ ޤާނޫނުއަސާސީ ބުނާގޮތުން، ރަސްގެފާނު ބޮޑުވަޒީރުކަމަށް ޢައްޔަންކުރައްވަން ޖެހެނީ މަޖިލީހުގެ އެންމެ ގިނަ ގޮނޑި ކާމިޔާބުކުރާ ސިޔާސީ ޕާޓީގެ ބޭފުޅެކެވެ. އެގޮތުން އެ ޤައުމުގެ ޤާނޫނުހަދާ މަޖިލީހުގެ އިންތިޚާބު ކާމިޔާބުކުރި އޮތެންޓިސިޓީ އެންޑް މޮޑަރނިޓީ ޕާޓީގެ (ޕީއޭއެމް) ވެރިޔާ ފާތިމާ އެ ޤައުމުގެ ފުރަތަމަ އަންހެން ބޮޑުވަޒީރު ކަމުގެ މަޤާމަށް، ރަސްގެފާނު މުޙައްމަދު ހަވަނަ ޢައްޔަންކުރެއްވީ އަންގާރަ ދުވަހުއެވެ.

ފާތިމާ ވަނީ، މޮރޮކޯގެ ގެދޮރުވެރިކަމާބެހޭ ވަޒީރުގެ މަޤާމާއި މަރަކޭޝްގެ މޭޔަރުކަންވެސް ކުރައްވާފައެވެ.