ސަލާމަތީ ދާއިރާއިން ރާއްޖެއަށް އެހީތެރިކަން ފޯރުކޮށްދޭން ޖަޕާނުން ފަށަނީ

ޖަޕާނު ސަރުކާރުން ރާއްޖެއަށް ސަލާމަތީ ދާއިރާއިން ރާއްޖެއަށް އެހީތެރިކަން ފޯރުކޮށްދިނުމާ ގުޅޭގޮތުން ޖަޕާނުން މަޝްވަރާކުރަމުންދާކަމަށް ޚާރިޖީ ވަޒީރު އިރުތިޝާމް އާދަމް ވިދާޅުވެއްޖެއެވެ.

ވަޒީރު މިކަން ހާމަކުރެއްވީ ޖަޕާނުގެ އެމްބަސީ ރާއްޖޭގައި ޤައިމްކުރިތާ 10 އަހަރު ފުރުން ފާހަގަކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި، ވާހަކަފުޅުދައްކަވަމުންނެވެ.

ވަޒީރު އިރުތިޝާމްގެ ވާހަކަފުޅުގައި ދެޤައުމުގެ ދިގު ތާރީޚީ އެކުވެރިކަމަށް ބަލާއިރު، ޖަޕާނަކީ ދިވެހިރާއްޖޭގެ އިޖުތިމާއީ އަދި އިގުތިސާދީ ތަރައްގީގައި ނުހަނު ބޮޑު ހިއްސާއެއްވާ، ތަރައްގީގެ މުހިންމު ބައިވެރިޔެއްކަން ވަނީ ފާހަގަކޮށްފައެވެ.

އެގޮތުން 1989ވަނަ އަހަރު މާލޭގައި ބިނާކުރެވުނު ތޮށިގަނޑަކީ ޖަޕާނުން ރާއްޖެއަށް ވެދެމުންދާ ދެމެހެއްޓެނިވި އެހީތެރިކަމުގެ އެންމެ ފާހަގަކޮށްލެވޭ އެއް ރަމްޒުކަމުގައި ވިދާޅުވިއެވެ. އުދައެރުމާއި ބޮޑެތި ރާޅުތަކުން މާލެ ސަލާމަތްކޮށްދިނުމުގައި މި ތޮށިގަނޑު ވަނީ ވަރަށް މުހިންމު ދައުރެއް އަދާކޮށްފައިކަމަށާއި ވަކިން ޚާއްޞަކޮށް 2004 ވަނަ އަހަރުގެ ސުނާމީ ކާރިސާގައި ލިބުނު ގެއްލުންތައް ކުޑަކޮށް، ރައްޔިތުން ރައްކާތެރިކުރުމުގައި މި ތޮށިގަނޑުގެ ދައުރު ބޮޑުކަން ފާހަގަކުރެއްވިއެވެ. މިއީ މާލޭގެ ތަރައްގީގެ ތާރީޚުގައި ފާހަގަކޮށްލެވޭ މުހިންމު ބިނާއެއްކަމަށް ވިދާޅުވިއެވެ.

ހަމައެފަދައިން، 1980 ގެ އަހަރުތަކުގައި ރާއްޖޭގެ އެކި ކަންކޮޅުތަކުގައި ސްކޫލްތަކާއި ތައުލީމީ މަރުކަޒުތައް ބިނާކޮށްދިނުމުގައި ޖަޕާނުން ވެދީފައިވާ އެހީތެރިކަމަކީ ދިވެހި އެތައް ޖީލަކަށް އޭގެ ފައިދާ ކުރަމުންދާ ކަމެއްކަމަށް ވަޒީރު ވިދާޅުވިއެވެ. މީގެ އިތުރުން، ޖަޕާން އޯވަސީސް ކޯޕަރޭޝަން ވޮލަންޓިއަރުން ދިވެހި މުޖުތަމައުތަކާ ގުޅިގެން، ދިވެހި ސަގާފަތް ދަސްކޮށް، އެބޭފުޅުންގެ ތަޖުރިބާ ހިއްސާކުރައްވަމުން ގެންދަވާ މަސައްކަތަކީވެސް މި ގުޅުން ރަމްޒުކޮށްދޭ ކަމެއްކަމަށް ވިދާޅުވިއެވެ.

ވަޒީރު ވިދާޅުވީ ރާއްޖޭގައި ހުންނަ ޖަޕާނު އެމްބަސީއަށް 10 އަހަރު ފުރުން ފާހަގަކުރުމަކީ ދެ ގައުމުގެ ދެމެދުގައި އޮތް ގާތް ގުޅުމުގައި ލިބުނު މުހިންމު ކުރިއެރުމެއްކަމަށެވެ. 2016 ވަނަ އަހަރު މި އެމްބަސީ ހުޅުވުމަކީ ހަމައެކަނި ޑިޕްލޮމެޓިކް މިޝަނެއް ގާއިމުކުރުމަށްވުރެ މާ ފުން މާނައެއް އެކުލެވޭ ކަމެއްކަމަށާއި ވޭތުވެދިޔަ ދިހަ އަހަރު ދުވަހުގެ ތެރޭގައި، މި އެމްބަސީން ވަނީ ދެ ގައުމުގެ ސަރުކާރާއި، ރައްޔިތުންނާއި، އަދި ސަގާފަތް ގުޅުވައިދޭ މުހިންމު ދައުރު އަދާކޮށްފައިކަމަށް ވިދާޅުވިއެވެ. މި ގުޅުމުގެ ފައިދާ ރާއްޖޭގެ މުޖުތަމައުތަކަށް ފޯރުކޮށްދިނުމުގައި، އަދި އެހީތެރިކަން އެންމެ ބޭނުންވާ ދާއިރާތަކަށް އެހީ ފޯރުކޮށްދިނުމުގައި މި އެމްބަސީން ވަނީ އެކި މުއައްސަސާތަކާ ގުޅިގެން ނަމޫނާ މަސައްކަތްތަކެއް ކޮށްފައިކަމަށް ވަޒީރު އިރްތިޝާމް ވިދާޅުވިއެވެ.

ޖަޕާނުގެ އެމްބަސީއެއް ރާއްޖޭގައި ހުރުމުން އާންމު ދިވެހި ރައްޔިތުންނަށް ވަރަށް ބޮޑެތި ފަސޭހަތަކެއް ލިބިފައިވައިވާކަން ފާހަގަކޮށް ވަޒީރު ވިދާޅުވީ އެމްބަސީން ފޯރުކޮށްދޭ ވިސާގެ ޚިދުމަތްތަކުގެ ސަބަބުން ޖަޕާނަށް ދަތުރުކުރާ ދިވެހިންނަށް ލުއިތަކެއް ލިބިގެންދާއިރު، ރާއްޖޭގެ އެކި މުޖުތަމައުތަކާއެކު ބާއްވާ ގާތް ގުޅުމުގެ ސަބަބުން ޖަޕާނާމެދު ދިވެހިންގެ ހިތްތަކުގައި އޮތް ލޯތްބާއި ގަދަރު ވަނީ އިތުރުވެފައިކަމަށެވެ. އުމްރާނީ ތަރައްގީ، ކާރިސާތަކުން ރައްކާތެރިވުން، މަސްވެރިކަމާއި ކަނޑުގެ ސަލާމަތާއި ރައްކާތެރިކަން، ތައުލީމް، ތިމާވެށި ހިމާޔަތްކުރުން އަދި އިންސާނީ ވަސީލަތް ތަރައްގީކުރުން ފަދަ ދާއިރާތަކުން ޖަޕާނުން ވެދޭ އެހީތެރިކަމަކީ ރާއްޖޭގެ ތަރައްގީގެ ދަތުރުގައި ދެމެހެއްޓެނިވި ހިއްސާއެއްކަމަށް ވިދާޅުވިއެވެ.

ރާއްޖެއާއި ޖަޕާނަކީ ކަނޑުގެ ސަރަހައްދު ބޮޑު ދެ ގައުމަށްވުމާއެކު، "ފްރީ އެންޑް އޯޕަން އިންޑޯ-ޕެސިފިކް" ގެ އުސޫލުތަކުގެ މުހިންމުކަން ވަޒީރު ފާހަގަކުރެއްވިއެވެ. އަދި ޖަޕާނު ސަރުކާރުން ފުރަތަމަ ފަހަރަށް ރާއްޖެއަށް "އޮފިޝަލް ސެކިއުރިޓީ އެސިސްޓެންސް" ފޯރުކޮށްދިނުމަށް މަޝްވަރާކުރަމުންދާކަމަށް ވިދާޅުވިއެވެ.

"ރާއްޖެއާއި ޖަޕާނަކީ ކަނޑުގެ ސަރަހައްދު ބޮޑު ދެ ގައުމަށްވުމާއެކު، "ފްރީ އެންޑް އޯޕަން އިންޑޯ-ޕެސިފިކް" ގެ އުސޫލުތަކުގެ މުހިންމުކަން އަޅުގަނޑުމެން ގަބޫލުކުރަން. ސަރަހައްދީ ހަމަޖެހުމާއި ފާގަތިކަން ބިނާވެފައިވަނީ ސުލްހަވެރިކަމާއި ގާނޫނީ ސިޔާދަތަށް އިހުތިރާމްކުރުމުގެ މައްޗައް. މި އުސޫލުތަކުގެ ތެރެއިން، ޖަޕާނު ސަރުކާރުން ފުރަތަމަ ފަހަރަށް ރާއްޖެއަށް "އޮފިޝަލް ސެކިއުރިޓީ އެސިސްޓެންސް" ފޯރުކޮށްދިނުމަށް ވިސްނަވަމުންދާކަމީ އަޅުގަނޑު އުފަލާއެކު ފާހަގަކުރާ ކަމެއް. މިއީ ދެ ގައުމުގެ ގުޅުން އިތުރު ހަރުފަތަކަށް ގެންދިއުމަށް އެޅޭ މުހިންމު ފިޔަވަޅެއް" ސަފީރު ވިދާޅުވިއެވެ.

ހާރިޖީ ވަޒީރު އިރްތިޝާމް އާދަމް ވިދާޅުވީ އަންނަ އަހަރަކީ ރާއްޖެއާއި ޖަޕާނާ ދެމެދު ސިޔާސީ ގުޅުން ގާއިމުކުރިތާ 60 އަހަރު ފުރޭ އަހަރަށްވުމާއެކު، އެއީ ދެ ގައުމަށްވެސް ވަރަށް ޚާއްޞަ އަހަރަކަށް ވެގެންދާނެކަމަށެވެ.