ޑިގްރީ ސްކީމް: ގިނައިން ކިޔަވާފައިވަނީ މެނޭޖްމަންޓާއި އެޑްމިނިސްޓްރޭޓިވް ދާއިރާއިން

ހިލޭ ޑިގްރީ ސްކީމް ތަޢާރަފްކުރި ފަހުން ވޭތުވެދިޔަ 6 އަހަރުގެ ތެރޭގައި އެ ސްކީމުގެ ދަށުން ގިނަ ދަރިވަރުން ކިޔަވާފައިވަނީ މެނޭޖްމަންޓާއި އެޑްމިނިސްޓްރޭޓިވް ދާއިރާއިން ކަމަށް ހިލޭ ޑިގްރީ ސްކީމުގެ އޮޑިޓުން ދައްކައިފިއެވެ.

2019ވަނަ އަހަރުން ފެށިގެން 2024 ވަނަ އަހަރު ހިލޭ ޑިގްރީ ސްކީމުގެ ދަށުން ކިޔަވަން 16،388 ދަރިވަރުންނަށް ފުރުޞަތު ދީފައިވެއެވެ. އޭގެތެރެއިން މެނޭޖްމަންޓާއި އެޑްމިނިސްޓްރޭޓިވް ދާއިރާތަކުން %38 ދަރިވަރުން ކިޔަވާފައިވެއެވެ. %17 ދަރިވަރުން މުދައްރިސުކަމުން ކިޔަވާފައިވާއިރު އެކައުންޓިންގ އަދި ޓެކްސޭޝަން ދާއިރާއިން %9 ދަރިވަރުން ކިޔަވަފައިވާކަމަށް މި އޮޑިޓުން ދައްކައެވެ.

މެނޭޖްމަންޓް އަދި އެޑްމިނިސްޓްރޭޝަން ކިޔެވި ދަރިވަރުން

2019: 516 ދަރިވަރުން
2020: 1715 ދަރިވަރުން
2021: 988 ދަރިވަރުން
2022: 1059 ދަރިވަރުން
2023: 845 ދަރިވަރުން
2024: 1030 ދަރިވަރުން

މުދައްރިސުކަން ކިޔެވި ދަރިވަރުން

2019: 255 ދަރިވަރުން
2020: 873 ދަރިވަރުން
2021: 493 ދަރިވަރުން
2022: 494 ދަރިވަރުން
2023: 337 ދަރިވަރުން
2024: 295 ދަރިވަރުން

ހިލޭ ޑިގްރީ ސްކީމުން ކިޔެވި ދަރިވަރުންގެ ތެރެއިން %65 ދަރިވަރުންނަކީ އަންހެން ދަރިވަރުންނެވެ. %35 ފިރިހެން ދަރިވަރުންނެވެ. އެންމެ ގިނައީ އުމުރުން 19 އަހަރާއި 21 އަހަރުގެ ޒުވާނުންނެވެ. އެއީ %34އެވެ.

މ ސްކީމުން ކިޔެވި ދަރިވަރުންގެ ތެރެއިން ފިރިހެން ދަރިވަރުންގެ ނިސްބަތް ދަންވާން ދިމާވި ސަބަބެއް ކަމަށް ބުނެފައިވަނީ، ފިރިހެން ދަރިވަރުންގެ މެދުގައި ވޮކޭޝަނަލް ޕްރޮގްރާމްތަކަށް މަގުބޫލުކަން ފާހަގަކުރެވިފައިވާއިރު، އެފަދަ ޕްރޮގްރާމްތައް ލެވެލް 7އާ ހަމައަށް ތައާރަފުކޮށްފައި ނުވުމެވެ. ޓެކްނިކަލް ވޮކޭޝަނަލް ދާއިރާތަކުން ކިޔެވި ދަރިވަރުންގެ ތެރޭގައި ގިނައީ ފިރިހެން ދަރިވަރުންނެވެ. އެއީ ހިލޭ ޑިގްރީ ސްކީމުގައި ކިޔެވި ފިރިހެން ދަރިވަރުންގެ %68 އެވެ.

2019ވަނަ އަހަރު ފެށި ހިލޭ ޑިގްރީ ސްކީމުން 2024 ވަނަ އަހަރުގެ ނިޔަލަށް 835 މިލިއަން ރުފިޔާ ޚަރަދުކޮށްފައިވެއެވެ. ކިޔަވަން ފަށައި ޕްރޮގްރާމް ފުރިހަމަ ނުކުރާ 790 ދަރިވަރުންނަށް 19 މިލިއަން ރުފިޔާ ޚަރަދުކޮށްފައިވާއިރު އެ ފައިސާ ހޯދާފައިނުވާކަމަށް އޮޑިޓަރ ޖެނެރަލް އޮފީހުން ނެރުނު ރިޕޯޓްގައި ވަނީ ފާހަގަކޮށްފައެވެ. އަދި ޑިގްރީ ހަދާފައިވާ 271 ދަރިވަރަކަށް މި ސްކީމުގެ ދަށުން ޑިގްރީއަށް ކިޔަވަން 9.4 މިލިއަން ރުފިޔާ ޚަރަދުކޮށްފައިވެއެވެ.

ހިލޭ ޑިގްރީ ސްކީމުން ގިނަ ދަރިވަރުން ކިޔެވީ އަމިއްލަ ފަރާތްތަކުން ހިންގާ ކޮލެޖުތަކުންނެވެ. ސަރުކާރުން ހިންގާ ދެ ޔުނިވަރސިޓީތަކުން ކިޔެވީ %27 ދަރިވަރުންނެވެ. އަމިއްލަ ތަންތަނަށް %73 ދަރިވަރުން ކިޔެވަން ވަންކަމަށް ރެކޯޑްތަކުން ދައްކާ ކަމަށް އޮޑިޓް ރިޕޯޓްގައި ފާހަގަކޮށްފައިވެއެވެ.