އިންޑިއާ އަކީ ބަލި ޓީމެއް ނޫން، އިހުތިރާމް ކުރަން: އަންޗެލޮޓީ

ބްރެޒިލުން އިންޑިއާ ދެކޮޅަށް ނުކުންނަނީ އެއީ ބަލި ޓީމެއްގެ ގޮތުގައި ދެކިގެން ނޫން ކަމަށާއި، އިންޑިއާއަށް ފުރިހަމައަށް އިހުތިރާމް ކުރާ ކަމަށް ބްރެޒިލްގެ ކޯޗު ކާލޮސް އަންޗެލޮޓީ ބުނެފިއެވެ.

ފަސް ފަހަރު ވޯލްޑް ކަޕް ކާމިޔާބުކުރި ބްރެޒިލުން ވަރުގަދަ ސްކޮޑަކާއެކު ހޮނިހިރު ދުވަހު އިންޑިއާ ދެކޮޅަށް ނުކުންނާނެއެވެ. މި މެޗު ކުޅޭނީ އިންޑިއާގައި ޒުވާނުންގެ ވޯލްޑް ވޯލްޑް ކަޕުގެ ފައިނަލް މެޗު ކުޅުނު ސޯލްޓް ލޭކް ސްޓޭޑިއަމްގައެވެ.

ފީފާ ރޭންކިންގެ ދުނިޔޭގެ ފަސްވަނައިގައި ބްރެޒިލް އޮތްއިރު، އިންޑިއާ އޮތީ 138 ވަނައިގައެވެ.

މި މެޗުގެ ކުރިން ވާހަކަ ދައްކަމުން އަންޗެލޮޓީ ބުނީ އިންޑިއާ ޓީމުގެ ކޮލިޓީއަށް ފުރިހަމައަށް އިހުތިރާމު ކުރާ ކަމަށެވެ. އަދި އިންޑިއާއިން މި ފަހުން ޕެނަމާއާ ދެކޮޅަށް ކުޅެ 1-1 ގެ ނަތީޖާއަކުން އެއްވަރު ކުރި މެޗުގައި ދެއްކި ކުޅުމަށް އަންޗެލޮޓީ ވަނީ ތައުރީފުކޮށްފައެވެ.

ކުރިކެޓްގެ ގަދަ ބާރެއްގެ ގޮތުގައި އިންޑިއާ މަޝްހޫރުވެފައިވާއިރު، އެ ޓީމު މިހާތަނަށް ފީފާ ވޯލްޑް ކަޕުގައި ކުޅެފައެއް ނުވެފައެވެ.

"ކްރިކެޓަކީ އިންޑިއާގެ ތާރީހާ ގުޅިފައިވާ ކަމެއް. ފުޓުބޯޅައަކީ އެންމެ މުހިންމު ކުޅިވަރު" އަންޗެލޮޓީ ބުންޏެވެ.

އަންޗެލޮޓީ ބުނީ ކުރިކެޓަކީ އިންޑިއާގެ ތާރީޚާ ގުޅިފައިވާ ކުޅިވަރެއް ކަމަށެވެ. އެކަމަކު ފުޓުބޯޅަ ދެކެ ލޯބިވާ ގިނަ ބަޔަކު އިންޑިއާގައި ވެސް ތިބިކަން އަންޗެލޮޓީ ފާހަގަކުރިއެވެ.

ބްރެޒިލުން އިންޑިއާ ދެކޮޅަށް ނުކުންނައިރު، އަނިޔާގެ ސަބަބުން ފޯވާޑް ރަފީނިއާއަށް ނުކުޅެވޭނެއެވެ. އެކަމަކު ޕީއެސްޖީގެ ކެޕްޓަން މާކީނިއަސް އަދި އާސެނަލް އަށް ކުޅޭ ބްރޫނޯ ގުމަރޭޒް މި މެޗުގައި ފެންނާނެއެވެ. މީގެ އިތުރުން ބްރެޒިލްގެ ތަރި ވިނީޝިއުސް ޖޫނިއާ ވެސް މި މެޗުގައި ފެންނާނެއެވެ.