ބޮސްނިޔާ ދުށް އެންމެ މޮޅު ކުޅުންތެރިޔާ އެޑިން ޒެކޯ ގައުމީ ޓީމަށް ކުޅުން ހުއްޓާލައިފިއެވެ. ޒެކޯ ގައުމީ ޓީމަށް ކުޅުން ހުއްޓާލޯ ޔުއެފާ ނޭޝަންސް ލީގުގައި ރޭ ސްވިޑެންއާ ވާދަކޮށް އެއްވަރުވި މެޗަށްފަހުއެވެ.
މިދިޔަ ވޯލްޑްކަޕްގައި ބޮސްނިޔާގެ ކެޕްޓަން ބޭންޑް އަޅައިގެން ކުޅުނު ޒެކޯ ގައުމީ ޓީމަށް ކުޅުނު ވަދާއީ މެޗުގައި ގޯލެއް ޖެހިނަމަވެސް, ވީއޭއާރުން ބެލުމަށްފަހު އެގޯލު ބަލައިނުގަތެވެ. އެއީ އެޓޭކް އުފެއްދުމުގެ ކުރިން ބޯޅަ ބޭރުވެފައިވާތީއެވެ. މެޗު އެއްވަރުވީ 1-1 ނެވެ. 40 އަހަރުގެ ފޯވާޑްގެ ވަދާއީ މެޗުގެ 11 ވަނަ މިނިޓްގައި މެޗު މެދުކަނޑާލާ, ހަވާއެރުވިއެވެ. ޒެކޯ ގައުމީ ޓީމަށް ކުޅޭ ނަމްބަރަކީ 11 އެވެ. ގައުމީ ޓީމަށް ޒެކޯ ކުޅުނު ވަދާއީ މެޗަކީ އޭނާ ގައުމީ ޖަރޒީގައި ކުޅުނު 152 ވަނަ މެޗެވެ. ގައުމީ ޓީމަށް 73 ލަނޑު ޖަހައިދިނެވެ.
މެޗުގެ 62 ވަނަ މިނިޓްގައި ޒެކޯ ބަދަލުކުރުމުން ދަނޑުން ފައިބަން ދިޔައިރު ސަޕޯޓަރުން ކޮޅަށް ތެދުވެ, ޒެކޯއަށް ވަދާއުގެ ހޫނު ތަރުހީބެއް ދިނެވެ. އަދި މެޗު ނިމުމުންވެސް ޒެކޯ ގައުމީ ޓީމަށް ކުޅުން ހުއްޓާލުން ފާހަގަކުރިއެވެ. ޑްރޯން ޝޯވއަކާ އެކު ގާޑް އޮފް އޮނަރ އެއް ދިނެވެ. ޑްރޯން ޝޯވގައި ދައްކާލީ ޒެކޯއަށް ޝުކުރުގެ މެސެޖެކެވެ.
ކްލަބް ކެރިއަރުގައި ޒެކޯގެ އެންމެ ބޮޑު އުސްއައްޔަކީ މެންޗެސްޓަރ ސިޓީގައި އަދާކުރި މުހިއްމު ދައުރެވެ. 2011-2016 އަށް މެންޗެސްޓަރ ސިޓީއަށް 130 މެޗު ކުޅެ, 50 ލަނޑު ޖަހައިދިނެވެ. ސިޓީއަށް ބަދަލުވީ އެހާތަނަށް އެކްލަބްގެ ދެވަނައަށް އެންމެ އަގުބޮޑު ކުޅުންތެރިޔާގެ ގޮތުގައެވެ. އަދި އެއީ އެވަގުތާ ހަމައަށް ޕްރިމިއަރ ލީގުގެ ހަވަނައަށް އެންމެ އަގުބޮޑު ޓްރާންސްފަރ އެވެ. 44 އަހަރުގެ ތެރޭގައި މެންޗެސްޓަރ ސިޓީއަށް ބޮޑު ތައްޓެއް ލިބުނީވެސް އިތުރު ވަގުތުގައި ޒެކޯ ޖެހި ލަނޑާއެކުއެވެ. ސިޓީއާއެކު ޒެކޯ ޕްރިމިއަރ ލީގު އުފުލާލިއެވެ.
އޭގެފަހުން އިޓަލީގެ ރޯމާ އާއި އިންޓަރ މިލާނަށް ކުޅުނެވެ. ފެނަބާޗޭ އާއި ފިއޮރެންޓީނާއަށް ކުޅުމަށްފަހު މިހާރު ޒެކޯ ކުޅެނީ ޖަރުމަނުގެ ޝާލްކޭ އަށެވެ.