އެމެރިކާއިން އީރާނާ ދެކޮޅަށް ފަށާފައިވާ ޣައިރުޤާނޫނީ ހަނގުރާމައިގައި ބައިވެރިވުމަށް މެދުއިރުމަތީގައި ހަރަކާތްތެރިވުމަށް ފަހު، އެމެރިކާގެ އަސްކަރީ މަތިންދާބޯޓު އުފުލާ މަނަވަރު ކަމަށްވާ 'ޔޫއެސްއެސް ޖޯޖް އެޗް ޑަބްލިޔު ބުޝް'، ފަތުރުވެރިންގެ މެދުގައި މަޤުބޫލު ތައިލެންޑުގެ ރަށެއް ކަމުގައިވާ ފުކެޓުގައި ބަނދަރުކޮށްފިއެވެ. 4,800 އެއްހާ ސިފައިން ތިބި މި މަނަވަރު ފުކެޓަށް ކުރާ މި ދަތުރަކީ ފަޅުވެރިންނަށް "އަރާމުކޮށްލުމަށާއި މުނިފޫހިފިލުވުމުގެ" ފުރުސަތު ދިނުމުގެ ގޮތުން ކުރާ ދަތުރެއް ކަމުގައި ރިޕޯޓުތައް ބުނެއެވެ. މި މަނަވަރު ޢަރަބި ކަނގުގެ ސަރަޙައްދަށް ފޮނުވާފައި ވަނީ، އީރާނާ ދެކޮޅަށް ކުރަމުންދާ ޣައިރުޤާނޫނީ ހަނގުރާމައިގައި އެހީތެރިކަން ފޯރުކޮށްދިނުމަށެވެ.
މި މަނަވަރު މި ވަގުތު އޮތީ، ފުކެޓުގެ ބޭރުގައި ބަނދަރުކޮށްފައި ކަމުގައި ރިޕޯޓުތައް ބުނެއެވެ. އަދި، އޭގައި ތިބި ސިފައިންނާއި ފަޅުވެރިން ފުކެޓަށް ފައިބާނެ ކަމުގައި ރިޕޯޓުތައް ބުނެއެވެ. ދާދިފަހުން، ޔޫއެސްއެސް އެބްރަހަމް ލިންކަން ވެސް ވަނީ ފަތުރުވެރިންގެ މެދުގައި މަޤުބޫލު ތައިލެންޑުގެ ރަށެއް ކަމުގައިވާ ލައެމް ޗަބާންގއަށް ދަތުރު ކޮށްފައެވެ. އީރާނާ ދެކޮޅަށް ކުރަމުންދާ ހަނގުރާމައިގައި އިސް ދައުރެއް އަދާކޮށްފައިވާ އެ މަނަވަރު ވެސް ތައިލެންޑަށް ގޮސްފައި ވަނީ، އޭގައި ތިބި ސިފައިންނާއި ފަޅުވެރިންނަށް "އަރާމުކޮށްލުމަށާއި މުނިފޫހިފިލުވުމުގެ" ދިނުމަށެވެ.
ލިންކަންގައި ލައެމް ޗަބާންގއަށް ދިޔަ ސިފައިންނާއި ފަޅުވެރިންގެ ތެރެއިން ކޮންމެ މީހަކު، އެއްގަމަށް ފައިބައި ދުވާލެއްގެ މައްޗަށް 89 އެމެރިކާ ޑޮލަރު ޚަރަދު ކޮށްފައިވާ ކަމުގައި އެ ސަރަޙައްދުގެ މޭޔަރު ވިދާޅުވެފައިވެއެވެ. ތައިލެންޑަކީ ދެކުނުއިރުމަތީ އޭޝިއާގެ ޤައުމުތަކުން ތެރެއިން އެމެރިކާއާއެކު ޚާއްޞަ މުއާހަދާއެއްގައި ސޮއިކޮށްފައިވާ ޤައުމެކެވެ.