ސިޓީން ހޯދާފައިވާ ތަށިތަކާމެދު ސުވާލު އުފައްދާނެ ޖާގައެއްނެތް: މަރެސްކާ

އިންގްލިޝް ޕްރިމިއަރ ލީގުން މެންޗެސްޓަރ ސިޓީ އާއި ދެކޮޅަށް އުފުލާފައިޥާ ދައުވާ ތަކުގެ ސަބަބުން އެކްލަބުން އެދައުވާތަށް ނިސްބަތްވާ މުއްދަތުގެ ތެރޭގައި ހޯދާފައިވާ ތަށިތަކާއިމެދު ސުވާލު އުފައްދާނެ އެއްވެސް ޖާގައެއް ނެތް ކަމަށް ސިޓީގެ ކޯޗު އެންޒޯ މަރެސްކާ ބުނެފިއެވެ.

މަރެސްކާ މިހެން ބުނެފައިވަނީ ޕްރިމިއަރ ލީގުގައި ލިވަޕޫލާއި ދެކޮޅަށް ކުޅުމަށް ހަމަޖެހިފައިވާ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. ނޫސްވެރިންގެ މިބައްދަލުވުމުގައި ވާހަކަ ދައްކަމުން މަރެސްކާވަނީ ސިޓީގެ ވެރިންނާއި އެޓީމުގެ ލީޑަރޝިޕާއި މެދު ފުރިހަމައަށް އިތުބާރު އޮތްކަން ތަކުރާރު ކުރުމުގެ އިތުރުން އިސްތިއުނާފް މަރުހަލާ ސިޓީއިން ކާމިޔާބު ކުރާނެކަމަށް ބުނެފައެވެ.

ވަރަށް ހަމަޖެހިލައިގެން އިނދެ ސުވާލުތަކަށް ޖަވާބުދެމުންދިޔަ މަރެސްކާ ބުނީ ސިޓީއިން އެމުއްދަތުގެ ތެރޭގައި ހޯދާފައިވާ ކާމިޔާބީ ތައް ނުވަތަ ތަށިތަކާމެދު ސުވާލު އުފައްދާނެ އެއްވެސް ޖާގައެއް ނެތް ކަމަށާއި އެއީ އެކާމިޔާބީތައް ސިޓީއިން ހޯދުމަށްޓަކައި ކޮށްފައިވާ ބުރަ މަސައްކަތް އޭނާއަށް ފެނިފައިވާތީ ކަމަށެވެ.

އިންގްލިޝް ޕްރިމިއަރ ލީގުން އެކުލަވާލި މިނިވަން ކޮމިޝަނުން ކުރިއަށްގެންދިޔަ އަޑުއެހުން ތަކަށްފަހު އެފަރާތުންވަނީ ސިޓީގެ މައްޗަށް ޕްރިމިއަރ ލީގުން އުފުލާފައިވާ 115 ދައުވާގެ ތެރެއިން 114 ދައުވާ ސާބިތުވާކަމަށް ނިންމާފައެވެ. ސިޓީން މިހާރުވަނީ މިމައްސަލަ އިސްތިއުނާފް ކޮށްފައެވެ. އެކްލަބުން ބުނެފައިވަނީ މިނިވަން ކޮމިޝަނުން ނިންމާފައިވާ ނިންމުންތަކުގައި ޤާނޫނީ ގޮތުންނާއި އުސޫލީ މައްސަލަތަކެއް އެބަހުރި ކަމަށާއި އެހެން ކަމުން މިއީ މިކަމުގައި ޝާމިލުވާ ހުރިހާ ފަރާތްތަކަށް އެންމެ ރަނގަޅު ގޮތް ނޫން ކަމަށެވެ.

ލިވަޕޫލާއި ދެކޮޅަށް ސިޓީން ކުޅޭ މެޗަކީ އެޓީމާއި ދެކޮޅަށް އުފުލިފައިވާ ދައުވާތަށް ސާބިތުވާކަމަށް މިނިވަން ކޮމިޝަނުން ނިންމިފަހުން ކުޅޭ ފުރަތަމަ މެޗެވެ. މަރެސްކާ ބުނީ އޭނާ ސިޓީ އާއި ގުޅުނީ އެކްލަބްގެ ވެރިންނާއި ސީއީއޯ، ސްޕޯޓިންގ ޑިރެކްޓަރ އަދި މުޅި ކްލަބާއި މެދު އޭނާއަށް ފުރިހަމައަށް އިތުބާރު ކުރެވޭތީ ކަމަށެވެ. އަދި އެހެން ކަމުން ސިޓީ އާއި މެދު ސުވާލު އުފައްދާނެ އެއްވެސް ކަމެއް ނެތް ކަމަށާއި އެފަރާތްތަކަށް ފުރިހަމައަށް އިތުބާރު ކުރާ ކަމަށެވެ.

މަރެސްކާ ބުނީ އޭނާ އާއި އޭނާގެ ކުޅުންތެރިންނަށް ކޮންޓްރޯލް ކުރެވޭނީ ދަނޑު މައްޗާއި ބެންޗުގެ ކަންކަން ކަމަށާއި އެހެން ކަމުން އޭނާ އާއި އޭނާގެ ކުޅުންތެރިން ތިބީ ދަނޑު ތެރޭގެ ކަންތައްތަކަށް ސަމާލުވެގެން ކަމަށެވެ. މިސީޒަންގައި ސިޓީގެ ސީނިއަރ ޓީމުގެ ކޯޗު ކަމާއި މަރެސްކާ ހަވާލުވި ނަމަވެސް މީގެ ކުރިންވެސް ދެ ފަހަރެއްގެ މަތިން އެކްލަބާއެކު ހަރަކާތްތެރިވެފައިވެއެވެ. މިގޮތުން އެންމެ ފުރަތަމަ ޒުވާން ޓީމުގެ ކޯޗެއްގެ ގޮތުގައި ހަރަކާތްތެރިވިއިރު ފަހުންވަނީ ކުރީގެ ކޯޗު ޕެޕް ގާޑިއޯލާގެ އެސިސްޓަންޓްގެ ގޮތުގައި ހަރަކާތްތެރިވެފައެވެ.

މަރެސްކާގެ އިތުރުން ޕްރިމިއަރ ލީގުގެ އެހެން ބައެއް ކޯޗުންވެސްވަނީ ސިޓީގެ ކަންތަކާއި ގުޅޭގޮތުން ވާހަކަ ދައްކާފައެވެ. މިގޮތުން ސިޓީގެ އެންމެ ބޮޑު ވާދަވެރިންގެ ގޮތުގައި ފާހަގަ ކުރެވިފައިވާ އާސެނަލްގެ ކޯޗު މިކޭލް އާޓޭޓާވަނީ ސިޓީއިން ހޯދާފައިވާ ތަށި ތަކާއި ގުޅޭގޮތުން މަރެސްކާ ބުނި ބުނުން ތަކުރާރުކޮށްފައެވެ. އަދި އޭނާ ކުރިން މަސައްކަތް ކޮށްފައިވާ ކްލަބް ކަމަށްވާ ސިޓީއަށް މިހާރުވެސް އަދި މުސްތަގްބަލްގައިވެސް އިތުބާރު ކުރާނެ ކަމަށެވެ. ހަމައެއާއެކު މިހާރު ކުރިއަށްދާ އަޑުއެހުން ތަކުގެ ނަތީޖާއަށް ފުރިހަމައަށް އިހްތިރާމް ކުރާނެކަމަށްވެސް އާޓެޓާ ހާމަކުރިއެވެ. އަދި މައްސަލަ އެއްކޮށް ނުނިމޭކަން އޭނާ ފާހަގަ ކުރިއެވެ.

ސިޓީ އާއި ދެކޮޅަށް ދެން އެންމެ އަވަހަށް ނިކުންނަ ލިވަޕޫލްގެ ކޯޗު އަންޑޯނީ އިރައޯލާ އާއި ޗެލްސީގެ ކޯޗު ޒާވީ އަލަންސޯ ބުނީ އިސްތިއުނާފްގެ މަރުހަލާ ކުރިއަށްދާތީ ހުރިހާ ފަރާތްތަކުންވެސް މިކަމުގައި ކެތްތެރިވެގެން ތިބުމުގެ މުހިންމުކަން ފާހަގަ ކޮށްފައެވެ. އަދި ނޮޓިންހަމް ފޮރެސްޓްގެ ކޯޗު އޮލިވަރ ގްލާސްނަރ ބުނީ މިކަމުގައި އަދި އެއްކޮށް ގޮތެއް ނިމިފައިނުވާތީ އެއްޗެއް ބުނަން ބޭނުން ނުވާކަމަށެވެ. ހަމައެއާއެކު އެވަޓަންގެ ކޯޗު ޑޭވިޑް މައޭސް ބުނީ އެވަޓަން އާއި ދެކޮޅަށްވެސް ދާދިފަހުން މިފަދަ އަދަބެއް ލިބިފައިވާ ކަމަށާއި އަދި މިގޮތަށް އަދަބު ދެނީ އެވަޓަން އަށް އެކަނި ނޫން ކަމަށް ގަބޫލް ކުރަން ބޭނުންވާ ކަމަށެވެ.