ރާއްޖޭގެ ޤައުމީ އުފެއްދުންތެރިކަމުގެ ނިސްބަތުން ބޮލަކަށް ޖެހޭ މިންވަރު ދެ ގުނަކުރެއްވުމަށްޓަކައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ކަނޑައަޅުއްވާފައިވާ އަމާޒަށް ވާސިލްވުމަށްޓަކައި އިންވެސްޓަރުންގެ މުހިއްމުކަން ކިތަންމެހާވެސް ބޮޑުކަމަށް އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވެއްޖެއެވެ.
އިކޮނޮމިކް މިނިސްޓަރ ސަޢީދު މިގޮތަށް ވިދާޅުވެފައިވަނީ މޯލްޑިވްސް އިންވެސްޓްމަންޓް ފޯރަމް ރަސްމީކޮށް ހުޅުވުމުގެ ކުރިން ރޭ ނިއުދިއްލީގެ ތާޖްޕެލަސް ހޮޓަލުގައި ބޭއްވި ގާލާ ނައިޓްގައި ވާހަކަފުޅު ދައްކަވަމުންނެވެ. ތާޖް ޕެލަސް ހޮޓަލުގައި ބޭއްވި ގާލާ ނައިޓްގައި ވާހަކަފުޅު ދައްކަވަމުން އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވީ، ރާއްޖޭގެ އިޤްތިޞާދަށް އިންގިލާބެއް ގެނައުމަށްޓަކައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ފަށްޓަވާފައިވާ މަސައްކަތްޕުޅު ކާމިޔާބުކުރެއްވުމަށް އިންވެސްޓަރުންގެ އެހީތެރިކަން ނުހަނު ބޭނުންވާކަމަށެވެ. މިގޮތުން އިންވެސްޓަރުންގެ ބައިވެރިވުމާއި ނުލައި ދިވެހިރާއްޖޭގެ އިޤްތިޞާދު ފުޅާކުރެއްވުމަށް ކުރައްވަމުންގެންދަވާ މަސައްކަތްތައް ކާމިޔާބު ނުވާނޭކަމަށް މިނިސްޓަރ ވިދާޅުވިއެވެ.
img:http://s2.psmnews.mv/images/660x400/14797928252847.jpg|ރޭ ބޭއްވި އިންވެސްޓްމަންޓް ފޯރަމްގެ ގާލާ ނައިޓްގެ ތެރެއިން / ފޮޓޯ: އިކޮނޮމިކް މިނިސްޓްރީ
މިނިސްޓަރ ވިދާޅުވީ ދިވެހިރާއްޖެއަކީ މިއަދު އިންވެސްޓަރުންނަށް ފަހި މާހައުލެއް އޮތް ޤައުމެއްކަމަށެވެ. މިގޮތުން ދިވެހިރާއްޖޭގެ ވިޔަފާރީގެ ވެށި އިންވެސްޓަރުންނަށް ފަހިވާނޭގޮތުން ހެދުމަށްޓަކައި މި ސަރުކާރުން މިހާރުވެސް ގިނަ މަސައްކަތްތަކެއް ކުރައްވަމުން ގެންދަވާކަން މިނިސްޓަރ ފާހަގަކުރެއްވިއެވެ.
މިނިސްޓަރ ސަޢީދު ވިދާޅުވީ، ދިވެހިރާއްޖޭގައި އިންވެސްޓްކުރެވޭނޭ ގިނަ ދާއިރާތަކެއް އެބަހުރިކަމަށެވެ. މިގޮތުން މޯލްޑިވްސް އިންވެސްޓްމަންޓް ފޯރަމްގެ ނަމުގައި ސަރުކާރުން އިންވެސްޓަރުންނަށް ޚާއްޞަ ފޯރަމެއް ބޭއްވެވުމުގެ މައިގަނޑު މަޤްސަދަކީ އިންވެސްޓަރުންނަށް އޮތް ފުރުޞަތުތައް ވީހާވެސް ގާތުން އަންގައިދިނުންކަމަށް މިނިސްޓަރ ސަޢީދު ވިދާޅުވިއެވެ.
ނިއުދިއްލީގެ ތާޖް ޕެލަސްގައި ބޭއްވި ރަސްމިއްޔާތެއްގައި ގާލާ ނައިޓް ޝަރަފްވެރިކޮށްދެއްވީ، ރައީސުލްޖުމްހޫރިއްޔާގެ ނާއިބު ޢަބްދުﷲ ޖިހާދުއެވެ. ގާލާނައިޓްގައި ދިވެހިރާއްޖޭގެ ބޮޑެތި ވިޔަފާރިތަކުގެ އިތުރުން އަވައްޓެރި އިންޑިއާއާއި މެދުއިރުމަތީގެ ބޮޑެތި ބައެއް ކުންފުނިތަކުގެ އިސްފަރާތްތަކުން ވަނީ ބައިވެރިވެފައެވެ.