ތިންވަނަ މޯލްޑިވްސް އިންވެސްޓްމަންޓް ފޯރަމް އިންޑިއާގެ ނިއުދިއްލީގެ ތާޖް ޕެލަސް ހޮޓަލުގައި ފަށައިފިއެވެ.
މިފަހަރުގެ އިންވެސްޓްމަންޓް ފޯރަމް ރަސްމީކޮށް ހުޅުވައިދެއްވީ ދިވެހިރާއްޖޭގެ ނައިބްރައީސް އަބުދުﷲ ޖިހާދުއެވެ. ތިންވަނަ މޯލްޑިވްސް އިންވެސްޓްމަންޓް ފޯރަމް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ނައިބުރައީސް އަބުދުﷲ ޖިހާދު ވިދާޅުވީ، ރާއްޖޭގެ އިޤްތިޞާދު އިތުރަށް ކުރިއަރުވައި ތަރައްޤީކުރުމަށް ރައީސް އަބްދުﷲ ޔާމިންގެ ސަރުކާރުން ވަރަށް ބޮޑެތި މަސައްކަތްތަކެއް ކުރައްވަމުން އަންނަކަމަށެވެ. ރާއްޖޭގެ އިޤްތިޞާދު ދުޅަހެޔޮކުރެއްވުމަށް ކުރައްވަމުން އަންނަ މަސައްކަތްތަކާއިއެކު އެކަމުގެ ހެޔޮބަދަލު ރައްޖޭގެ އިޤްތިޟާދުން މިހާރުވެސް ފެންނަމުންދާކަމަށް ނައިބުރައީސް ވިދާޅުވިއެވެ. މިގޮތުން އިންފްލޭޝަނާއި، ދައުލަތުގެ ރިކަރަންޓް ހަރަދުތައް ދަށްވެ، ބަޖެޓް ޑެފިސިޓް ދަށްވަމުން އަންނައިރު، ދިވެހިރާއްޖޭގެ އުފެއްދުންތެރިކަމުގެ ނިސްބަތުން ބޮލަކަށްޖެހޭމިންވަރު އަހަރަކަށްވުރެ އަހަރެއް އިތުރުވަމުން ދާކަމަށް ތަފާސް ހިސާބުތަކުން ދައްކަމުން އަންނަކަން ނައިބުރައީސް ފާހަގަކުރެއްވިއެވެ.
img:http://s1.psmnews.mv/images/660x400/14797940406300.jpg|3 ވަނަ އިންވެސްޓްމަންޓް ފޯރަމް ހުޅުވުމުގެ ރަސްމިއްޔާތުގެ ތެރެއިން / ފޮޓޯ: އިކޮނޮމިކް މިނިސްޓްރީ
ފޯރަމް ހުޅުވުމުގެ ގޮތުން ވާހަކަދައްކަވަމުން އިކޮނޮމިކް މިނިސްޓަރ މުހައްމަދު ސައީދު ވިދާޅުވީ، އިންޑިއާގައި މިއަދު ފެށި އިންވެސްޓްމަންޓް ފޯރަމްގެ ސަބަބުން އިންޑިއާގެ އެކިއެކި އިންވެސްޓްމަންޓްތައް ރާއްޖެ އައުމަށް މަގުފަހިވެގެންދާނޭކަމަށެވެ. މިނިސްޓަރ ވިދާޅުވީ، ރާއްޖެއަކީ އިންވެސްޓްކުރައްވަން އެންމެ ރަނގަޅު އެއް ޤައުމުކަން މިއަދު ބައިނަލްއަޤްވާމީ ވިޔަފާރީގެ މުޖުތަމައުއަށް ވަރަށް ރަނގަޅަށް ސާބިތުކޮށްދެވެމުންދާކަމަށެވެ.
img:http://s1.psmnews.mv/images/660x400/14797984702064.jpg|އިންވެސްޓްމަންޓް ފޯރަމް ހުޅުވުމުގެ ރަސްމިއްޔާތުގައި އިކޮނޮމިކް މިނިސްޓަރ ސަޢީދު ވާހަކަފުޅުދައްކަވަނީ
ދިވެހިރާއްޖެއިން އިންޑިއާއަށް ކަނޑައަޅުއްވާފައި ހުންނަވާ ސަފީރު އަހުމަދު މުހައްމަދު ވިދާޅުވީ، ދިވެހިރާއްޖެ އާއި އިންޑިއާ ދެމެދުގައި އޮތީ ވަރަށް ޒަމާންވީ ބަދަހި ގުޅުމެއްކަމަށެވެ. މިގޮތުން ދެޤައުމުގެ ދެމެދުގައި މިއަދު ޤާއިމްވެފައި އޮތީ ވިޔަފާރީގެ ނަމޫނާ ގުޅުމެއްކަމަށް ސަފީރު ފާހަގަކުރެއްވިއެވެ. އަދި އިންވެސްޓްމަންޓް ފޯރަމަށްފަހު ރާއްޖެއާއި އިންޑިއާ އާއި ދެޤައުމުގެ ދެމެދުގައި އޮތް ވިޔަފާރީގެ ގުޅުންތައް އިތުރަށް ބަދަހިވެގެންދާނޭކަމަށް ސަފީރު އަހުމަދު މުހައްމަދު ވިދާޅުވިއެވެ.
img:http://s1.psmnews.mv/images/660x400/14797985013792.jpg|އިންވެސްޓްމަންޓް ފޯރަމް ހުޅުވުމުގެ ރަސްމިއްޔާތުގައި ސަފީރު އަހުމަދު މުހައްމަދު ވާހަކަފުޅުދައްކަވަނީ
މޯލްޑިވްސް އިންވެސްޓްމަންޓް ފޯރަމް ހުޅުވުމުގެ މި ރަސްމިއްޔާތުގައި ވާހަކަދައްކަވަމުން ފެޑަރޭޝަން އޮފް އިންޑިއަން ޗެމްބަރސް އޮފް ކޮމަރސް އެންޑް އިންޑަރސްޓްރީ، އެފްއައިސީސީއައިގެ ނެޝަނަލް އެގްޒެކްޓިވް މެމްބަރު ޝްރި ވިކްރަމަޖިތް ސިންގް ވަނީ ރާއްޖޭގެ އިޤްތިޞާދު ތަރައްޤީކުރުމަށް ދިވެހި ސަރުކާރުން ކުރައްވަމުންގެންދަވާ މަސައްކަތްޕުޅުތަކަށް ވަރަށްބޮޑަށް ތައުރީފްކުރައްވާފައެވެ. ވިކްރަމަޖިތް ވިދާޅުވީ ރާއްޖޭގެ އިޤްތިޞާދު ތަރައްޤީކުރުމަށް ރައީސް ޔާމިންގެ ސަރުކާރުން އެކަށައަޅުއްވާފައިވަނީ ވަރަށް ފުރިހަމަ ސިޔާސަތެއްކަމަށެވެ.
img:http://s2.psmnews.mv/images/660x400/14797983249949.jpg|އެފްއައިސީސީއައިގެ ނެޝަނަލް އެގްޒެކްޓިވް މެމްބަރު ޝްރި ވިކްރަމަޖިތް ސިންގް ވާހަކަފުޅުދައްކަވަނީ
ތިންވަނަ މޯލްޑިވްސް އިންވެސްޓްމަންޓް ފޯރަމް އިންޑިއާގެ ނިއުދިއްލީގައި ފަށާފައިވާއިރު، ދިވެހިރާއްޖޭގެ ހަތަރުވަނަ އިންވެސްޓްމަންޓް ފޯރަމް ބޭއްވުމަށް ހަމަޖެހިފައިވަނީ ޤަތަރުގެ ވެރިރަށް ދޯހާގައެވެ.
މިފަހަރުގެ އިންވެސްޓްމަންޓް ފޯރަމުގައި ކުރީފަހަރުތަކާއި ހިލާފަށް ރާއްޖެ އާއި ރާއްޖޭން ބޭރުގެ ގިނަ އަދަދެއްގެ ވިޔަފާރިތަކުން ބައިވެރިވާކަން ފާހަގަކޮށްލެވެއެވެ. މީގެ ތެރޭގައި އިންޑިއާގެ އިންވެސްޓަރުންގެ އިތުރުން މެދުއިރުމައްޗާއި، އޭޝިއާގެ ގިނަ ޤައުމުތަކުގެ އިންވެސްޓަރުން ހިމެނޭކަން ފާހަގަކޮށްލެވެއެވެ. މޯލްޑިވްސް އިންވެސްޓްމަންޓް ފޯރަމް އިންތިޒާމްކުރާ އިކޮނޮމިކް މިނިސްޓްރީން ވިދާޅުވާގޮތުގައި މިފަހަރުގެ ފޯރަމްގައި ވިޔަފާރީގެ އެކިއެކި ދާއިރާތަކުން ހަތަރުސަތޭކައަށްވުރެ ގިނަ ކުންފުނި ބައިވެރިވެއެވެ.