މޯލްޑިވްސް ޕޯޓްސް ލިމިޓެޑް، އެމް.ޕީ.އެލްއަށް ދިމާވެފައިވާ އެންމެ ބޮޑު މައްސަލައަކީ އެ ތަނަށް ބޭނުންވާ އުޅަނދުތަކާއި ސާމާނުތައް ބާވެ ހަލާކުވެފައިވާ މައްސަލައެވެ. މި މައްސަލަތަކަށް ޙައްލެއް ހޯދުމަށް މިހާރު މަސައްކަތްފަށާފައިވާއިރު މި ތަކެތި ލިބުމުން މިއީ އެމްޕީއެލްއާއި މާލޭ ވިޔަފާރި ބަނދަރަށްވެސް ލިބިގެންދާނެ ވަރަށް ބޮޑު ކުރިއެރުމެއްގެ ގޮތުގައި އެކުންފުނިން ދެކެއެވެ.
މޯލްޑިވްސް ޕޯޓްސް ލިމިޓެޑްގެ ސީއީއޯ މުޙައްމަދު ޖުނައިދު ވިދާޅުވީ އެކުންފުނިން ރައްޔިތުންނަށް ދެމުން ގެންދާ ޚިދުމަތްތައް ފުޅާ ކޮށް ވީހާވެސް ލުއިފަސޭހަ ކޮށް އެ ޚިދުމަތްތައް ދިނުމުގެ ގޮތުން ގިނަގުނަ މަޝްރޫޢުތަކެއް ކުރިއަށް ރޭވިފައިވާކަމަށެވެ. މިގޮތުން ބޯޓުން މުދާ ބޭލުމާއި މުދާ ކްލިއަރ ކުރުމަށް ދިމާވާ ދަތިތައް އެއްކޮށް ނައްތާލުމުގެ ގޮތުން ހެވީ އިކުއިޕްމަންޓްސްތައް ގެންނަން ނިންމާފައިވާއިރު މިހާރު ބަނދަރުގައި ދެހަފްތާާ ހޭދަކުރަންޖެހޭ ބޯޓު، އޭރުން ސައުވީސް ގަޑިއިރުން ހުސްވެގެންދާނެކަމަށް އެމްޕީއެލުން ލަފާކުރެއެވެ.
img:http://s3.psmnews.mv/images/660x400/8527.jpg|އެމްޕީއެލް ބަނދަރު ސަރަޙައްދު - ފައިލް ފޮޓޯ: ޕީއެސްއެމް
މިގޮތުން ހަސަތޭކަ ކޮންޓެއިނަރ ހިފައިގެން އަންނަ ބޯޓު ސައުވީސް ގަޑިއިރު ތެރޭ ހުސްކޮށް، ލޯޑުކުރަންޖެހޭ އެއްޗެހި ފުރުވާލެވޭނެކަމަށާއި މިކަމުގެ ސަބަބުން ރާއްޖޭގެ ތަކެތީގެ އަގު ވަރަށް ބޮޑަށް ލުއިވެގެން ދާނެކަމަށް ޖުނައިދު ވިދާޅުވިއެވެ. މިހާރު ދުބާއީން ކޮލަންބޯއަށް އަންނަ ބޯޓުން އުފުލާ ކޮންޓެއިނަރގެ އަގަކީ ފަސް ސަތޭކަ ޑޮލަރެވެ. އެއީ ހަތްދުވަހުގެ ރާސްތާއެކެވެ.
ޖުނައިދު ވިދާޅުވީ ކޮލަމްބޯއިން މާލެ އާ ދެމެދު ވަނީ ހަތަރު ސަތޭކަ ސަތާރަ ނޯޓިކަލް މޭލުކަމަށެވެ. މިދެމެދު ހޭދަވާ ވިހި ނުވަތަ ސައުވީސް ވަރަކަށް ގަޑިއިރުތެރޭ ކޮލަމްބޯއިން މާލެއަށް، އެއްހާސް ފަސް ސަތޭކަ ނުވަތަ އެއްހާސް ހަ ސަތޭކަ ޑޮލަރު ނަގާކަމަށާއި މިގޮތަށް މި ދިމާވަނީ ރާއްޖޭގައި ބޭނުންކުރާ ބޯޓުތަކުގެ ހާލަތު ދަށްކަމުންކަމަށް އޭނާ ވިދާޅުވިއެވެ. އެހެންކަމުން އެކުންފުނިން ގެންނަ އިކުއިޕްމަންޓްސް ލިބުމާއި އެކު މިހުރިހާ ކަމަކަށް ލުއި ލިބިގެންދާނެކަން ޖުނައިދު ފާހަގަކުރެއްވިއެވެ.
މާލޭ ވިޔަފާރި ބަނދަރުން ދުވާލަކު ދުއިސައްތަ ފަންސާސް ކޮންޓެއިނަރ ދޫކުރަންޖެހޭކަމަށް އެކުންފުނިން ބުނެއެވެ.