ވިޔަފާރީގެ މުޢާމަލާތްތަކުގައި ބޭނުން ނުކުރެވޭގޮތަށް އުވާލައްވާފައިވާ ކުރީގެ ނޫޓްތަކަށް ބަދަލުދިނުމުގެ ސުންގަޑި މިމަހުގެ 31 ވަނަ ދުވަހުގެ ނިޔަލަށް ހަމަވާތީ، އެކަމަށް ސަމާލުވުމަށް މަރުކަޒީ ބޭންކު، އެމްއެމްއޭއިން އިލްތިމާސް ކުރައްވައިފިއެވެ.
މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ވިދާޅުވީ މިއަހަރުގެ ޖުލައިމަހުގެ 31 ވަނަ ދުވަހުގެ ފަހުން ވިޔަފާރީގެ މުޢާމަލާތްތަކުގައި ބޭނުންނުކުރެވޭގޮތަށް އުވާލައްވާފައިވާ ކުރީގެ ނޫޓްތަކަށް ބޭންކްތަކުން ބަދަލުދިނުމުގެ ސުންގަޑި މިމަހުގެ އެއްތިރީހުގެ ނިޔަލަށް ހަމަވާނޭކަމަށެވެ. މިގޮތުން އުވާލައްވާފައިވާ 2 ރުފިޔާގެ ނޫޓާ، 10 ރުފިޔާގެ ނޫޓާ، 20 ރުފިޔާގެ ނޫޓާ، 50 ރުފިޔާގެ ނޫޓާ، 100 ރުފިޔާގެ ނޫޓްގެ އިތުރުން 500 ރުފިޔާގެ ނޫޓް ވީހާވެސް އަވަހަކަށް ބޭންކްތައް މެދުވެރިކުރައްވައި ރަން ދިހަފަހެއް ނޫޓަށް ބަދަލުކޮށް ނިންމެވުމަށް މަރުކަޒީ ބޭންކުން ވަނީ އިލްތިމާސްކުރައްވާފައެވެ.
img:http://s3.psmnews.mv/images/660x400/7421.jpg|ރަން ދިހަފަހެއް ނޫޓް ސީރީޒް- ފޮޓޯ: އެމްއެމްއޭ
ވިޔަފާރީގެ މުޢާމަލާތްތަކުގައި ބޭނުން ނުކުރެވޭގޮތަށް އުވާލައްވާފައިވާ ކުރީގެ ނޫޓްތައް ރަން ދިހަފަހެއް ނޫޓްތަކަށް ބަދަލުކުރެއްވުމަށް މަރުކަޒީ ބޭންކުން އެންމެ ފުރަތަމަ އިޢުލާން ކުރައްވާފައިވަނީ މިއަހަރުގެ ޖުލައިމަހުގެ 21 ވަނަ ދުވަހުއެވެ. މަރުކަޒީ ބޭންކުން މަޢުލޫމާތުދެއްވި ގޮތުގައި މިއަހަރުގެ ޖެނުއަރީމަހުގެ 25 އާއި ހަމައަށް، ކުރިން ބޭނުންކުރަމުންދިޔަ ނޫޓުގެ 2.9 ބިލިއަން ރުފިޔާ އިޤްތިޞާދުގައި ދައުރުވަމުން ދިޔަނަމަވެސް، ހުސްވި ނޮވެމްބަރުމަހުގެ 29 ވަނަ ދުވަހުގެ ނިޔަލަށް 2.7 ބިލިއަން ރުފިޔާ މަރުކަޒީ ބޭންކަށް ނަގާފައިވާކަމަށެވެ. އެއީ، ކުރިން ބޭނުންކުރަމުންދިޔަ ނޫޓްތަކުގެ 93.5 އިންސައްތަ ނޫޓެވެ. އަދި ބާކީ ނުނެގި ހުރީ، 189 މިލިއަން ރުފިޔާ، ނުވަތަ 6.5 އިންސައްތަ ނޫޓު ކަމަށް އެމްއެމްއޭއިން މަޢުލޫމާތުދެއްވައެވެ.
ދިވެހިރާއްޖޭގެ ވިޔަފާރީގެ މުޢާމަލާތްތަކުގައި ބޭނުންކުރެއްވުމަށް ރަންދިހަފަހެއް ނަމުގައި އައު ނޫޓްތަކެއް ތަޢާރަފް ކުރައްވާފައިވަނީ، މިއަހަރުގެ ޖެނުއަރީމަހުގެ 26 ވަނަ ދުވަހުއެވެ. ރަންދިހަފަހެއްގެ އައު ނޫޓް ސީރީޒް ތައާރަފްކުރައްވާފައިވަނީ، ދިވެހިރާއްޖޭގެ މިނިވަންކަމަށް 50 އަހަރުފުރުން ފާހަގަކުރުމާ ގުޅުވައިގެނެވެ.