ކޯޕަރޭޓިވް މޯލްޑިވްސްގެ ފަރާތުން ގޯލްޑް ހަންޑްރެޑް ގާލާ ނަމުގައި ވިޔަފާރިތަކަށް ޚާއްޞަ ޕްރޮގްރާމެއް ހިންގުމަށް ނިންމައި، ޕާޓްނަރުންނާއެކު މިއަދު ސޮއިކޮށްފިއެވެ.
ގޯލްޑް ހަންޑްރެޑް ގާލާގެ ޕާޓްނަރުންނާއެކު އެއްބަސްވުމުގައި ސޮއިކުރީ ޗަމްޕާ ސެންޓަރަލް ހޮޓަލުގައި ބޭއްވި ރަސްމިއްޔާތެއްގައެވެ. ގޯލްޑް ހަންޑްރެޑް ގާލާ މި ޕްރޮގްރާމް ހިންގަން ހަމަޖެހިފައިވަނީ އަންނަ އަހަރުގެ ޖެނުއަރީ މަހުގެ 17 ވަނަ ދުވަހު ކުރުނބާ މޯލްޑިވްސް ރިސޯޓްގައެވެ.
ގޯލްޑް ހަންޑްރެޑް ގާލާއާ ބެހޭގޮތުން ނޫސްވެރިންނަށް މަޢުލޫމާތު ދެއްވަމުން މޯލްޑިވްސް ގެޓަވޭސްގެ ޑިރެކްޓަރ ޑރ. ސަނީ ޢުމަރު ވިދާޅުވީ، ބޮޑެތި ކުންފުނިތަކަށް އަމާޒްކޮށްގެން މިފަދަ ޕްރޮގްރާމެއް ހިންގުމުގެ މައިގަނޑު މަޤްޞަދަކީ، ރާއްޖޭގެ ބޮޑެތި ވިޔަފާރިތަކުގެ ވެރިން، އެއް ޕްލެޓްފޯމަކުން ބައްދަލުވެ، ވިޔަފާރީގައި ދިމާވާ ދަތިތައް ޙައްލުކުރުމުގެ މަގު ވިޔަފާރިވެރިންނަށް ހޯދައިދިނުންކަމަށެވެ. އަދި މި ޕްރޮގްރާމްގައި ރާއްޖޭގެ ވިޔަފާރީގެ ބާޒާރުގައި ހުރި ފުރުޞަތުތަކާ ބެހޭގޮތުން މަޝްވަރާކުރުމަށްވެސް ހަމަޖެހިފައިވެއެވެ.
ގޯލްޑް ހަންޑްރެޑް ގާލާ މި ޕްރޮގްރާމްގައި ރާއްޖޭގެ އެންމެ ބޮޑު 100 ކުންފުނި ހޮވުމަށް ވަނީ ހަމަޖެހިފައެވެ. މި ޕްރޮގްރާމްގައި ބައިވެރިވުމަށް ހުޅުވާލި ފުރުޞަތުގައި 200 އަށްވުރެ ގިނަ ކުންފުނިން ފޯމް ހުށަހަޅާފައިވެއެވެ.