ވޭތުވެދިޔަ ހަފްތާގައި މާލޭ މާރުކޭޓަށް އަތޮޅުތަކުން އެންމެ ގިނައިން ދަނޑުވެރިކަމުގެ ބާވަތްތައް ގެނެސްފައިވަނީ، ލ.އަތޮޅުންކަމަށް މިނިސްޓްރީ އޮފް ފިޝަރީޒް އެންޑް އެގްރިކަލްޗަރގެ ތަފާސް ހިސާބުތަކުން ދައްކައިފިއެވެ.
އެ މިނިސްޓްރީން މި ތަފާސްހިސާބުތައް ނަގާފައިވަނީ މިދިޔަ ހަފްތާގެ އާދިއްތަ ދުވަހުން ބުރާސްފަތި ދުވަހުގެ ނިޔަލަށެވެ.
މިނިސްޓްރީ އޮފް ފިޝަރީޒް އެންޑް އެގްރިކަލްޗަރއިން ނެރިފައިވާ ތަފާސްހިސާބުތައް ދައްކާގޮތުން މިދިޔަ ހަފްތާގައި މާލޭ މާރުކޭޓަށް ގެނައި ތަކެތީގެ %56އަކީ ލ.އަތޮޅުން ގެނެސްފައިވާ ތަކެއްޗެވެ. އަދި އާންމުކޮށް މާލޭ މާރުކޭޓަށް އެންމެ ގިނައިން ދަނޑުވެރިކަމުގެ ބާވަތްތައް ގެންނަ އަތޮޅުކަމުގައިވާ އ.އ އަތޮޅުން ހިއްސާކުރަނީ %10 އެވެ.
މިދިޔަ ހަފްތާގެ ތަފާސްހިސާބުތަކަށް ބަލާއިރު ށ އަތޮޅުން %17، ކ. އަތޮޅުން %11 އަދި ގ.ދ އަތޮޅުން، މާލޭ މާރުކޭޓަށް މިދިޔަ ހަފްތާގައި ގެނައި ދަނޑުވެރިކަމުގެ ބާވަތްތަކުގެ %6 ހިއްސާކުރެއެވެ.
އަތޮޅުތަކުން މާލެ، ގެނެސްފައިވާ ދަނޑުވެރިކަމުގެ މައިގަނޑު ބާވަތްތަކަކީ ބަށި، ބަރަބޯ، ކަރާ، ކާށި، ކިޔުކަންބާ، ފަޅޯ، ކުރުނބާ، ފަތްކެޔޮ، ގިތެޔޮ މިރުސް، ޗައިނިސް ކެބެޖެވެ. މި ބާވަތްތަކުގެ ތެރެއިން މާލޭ މާރުކޭޓަށް ކުރުނބާ އެންމެ ގިނައިން ގެނެސްފައިވަނީ ފާއިތުވި ހަފްތާގެ ހޯމަ އަދި އަންގާރަ ދުވަހުއެވެ.