އިއްތިޙާދު އެއަރވޭސްއިން ރާއްޖެއަށް ދަތުރުތައް ފެށިތާ 5 އަހަރުވެގެންދިޔައިރު، ރާއްޖޭގެ އިޤްތިޞާދަށް އެ އެއަރލައިނުން ފާހަގަކޮށްލެވޭފަދަ ޚިދުމަތްތަކެއް ކޮށްދީފައިވާނެ ކަމަށް އެ އެއަރލައިނުން ބުނެފިއެވެ.
އިއްތިޙާދު އެއަރވޭސްއިން ރާއްޖެއަށް ދަތުރުތައް ފެށިތާ 5 އަހަރު ފުރުން ފާހަގަކުރުމުގެ ގޮތުން ހޮޓެލް ޖެންގައި މިއަދު ބޭއްވި ރަސްމިއްޔާތުގައި ވާހަކަދައްކަވަމުން އެ އެއަރލައިނުން، ސްރީލަންކާ އަދި ދިވެހިރާއްޖެއަށް ކަނޑައަޅާފައި ހުންނަވާ ކަންޓްރީ މެނޭޖަރ ޙަސަން އަލް ހާޝިމީ ވިދާޅުވީ ދިވެހިރާއްޖެއަކީ އިއްތިޙާދު އެއަރވޭސްގެ ވަރަށް ޚާއްޞަ މަންޒިލެއްކަމަށެވެ.
ހާޝިމީ ވިދާޅުވީ ވޭތުވެދިޔަ 5 އަހަރު ދުވަހުގެ ތެރޭގައި ރާއްޖޭގެ ފަތުރުވެރިކަމުގެ ސިނާޢަތުގެ ކުރިއެރުމަށް އިއްތިޙާދު އެއަރވޭސްގެ ޙިއްޞާ ލިބިގެންދިޔަކަމަށެވެ. އަދި ދިވެހިރާއްޖޭގެ މަސްވެރިކަމުގެ ސިނާޢަތަށްވެސް އެއަރލައިންގެ އެހީތެރިކަން ދީފައިވާކަމަށެވެ.
ރާއްޖެއިން މަހުގެ ބާވަތްތައް އެކްސްޕޯޓްކުރުމުގައި އިއްތިޙާދު އެއަރވޭސްގެ ޙިއްޞާ ބޮޑުކަން ފާހަގަކުރައްވަމުން، ހާޝިމީ ވިދާޅުވީ، ކުރިއަށް އޮތް ތާނުގައިވެސް އެ އެއަރލައިނުން ރާއްޖޭގެ އިޤްތިޞާދަށް އެހީތެރިކަން ފޯރުކޮށްދޭނޭކަމަށެވެ. އިއްތިޙާދު އެއަރވޭސްއިން ރާއްޖެއަށް ދަތުރުތައް ކުރުމުގައި ދިވެހިސަރުކާރުގެ ފުރިހަމަ އެއްބާރުލުން ލިބޭކަމަށްވެސް ހާޝިމީ ވިދާޅުވިއެވެ.
އިއްތިޙާދު އެއަރވޭސްއަކީ ޔޫއޭއީގެ ދެވަނައަށް އެންމެބޮޑު އެއަރލައިނެވެ. އެ އެއަރލައިނުން ދުނިޔޭގެ 600 މަންޒިލަކަށް ދަތުރުކުރެއެވެ.