މޯލްޑިވްސް ޓްރާންސްޕޯޓް އެންޑް ކޮންޓްރަކްޓިންގ ކޮމްޕެނީ، އެމްޓީސީސީން ބިންހިއްކުމަށް ޗައިނާގައި ބަންނަމުންދާ ޑްރެޖަރު އަންނަ އަހަރުގެ އޭޕްރިލްމަހުގެ ތެރޭގައި ރާއްޖެ ގެނައުމަށް ތައްޔާރުވަމުން އަންނަކަމަށް އެކުންފުނީގެ ސީއީއޯ އިބްރާހީމް ޒިއަތު ވިދާޅުވެއްޖެއެވެ.
ޕީއެސްއެމް ނިއުސްއިން ކުރެއްވި ސުވާލަކަށް ޖަވާބުދެއްވަމުން ޒިއަތު ވިދާޅުވީ، ޑްރެޖަރު ބަނުމުގެ މަސައްކަތް މިހާރު ގާތްގަނޑަކަށް ނިމުމަކާ ހަމަޔަށް އައިސްފައިވާކަމަށެވެ. އަންނަ ޖެނުއަރީމަހުގެ ތެރޭގައި ޑްރެޖަރު މޫދަށް ބާލައި ޓެސްޓްތައް ކުރުމަށް މިހާރު ތާވަލްކޮށްފައިވާ ކަމަށް ޒިއަތު ވިދާޅުވިއެވެ.
"މަހާ ޖައްރާފް"ގެ ނަމުން ނަންދެވިފައިވާ މި ޑްރެޖަރަކީ ދުނިޔޭގައި މިހާތަނަށް ބަންނަ އެންމެ ބޮޑު ޑްރެޖަރެވެ. 36 މިލިއަން ޑޮލަރު ޚަރަދުކުރައްވައިގެން ބަންނަ މި ޑްރެޖަރަކީ ކަނޑުގެ 50 މީޓަރު އަޑިން ވެލިނަގައި ބިން ހިއްކުމުގެ ޤާބިލްކަން ލިބިފައިވާ ޑްރެޖަރެކެވެ.
މަހާ ޖައްރާފް ބަންނަމުންދަނީ ނެދަލެންޑްސްގެ އައިއެޗްސީއާ ޙަވާލުކޮށްގެންނެވެ. މި އުޅަނދު ރާއްޖެ ގެނެސް ބޭނުންކުރަން ފެށުމުން، ބިންހިއްކުމުގެ މަޝްރޫޢުތައް ނިންމުމުމުގައި ބޮޑެތި ފަސޭހަތަކެއް ލިބިގެންދާނޭކަމަށް އެމްޓީސީސީން ވިދާޅުވެއެވެ.