އަދިވެސް އުއްމީދު ގެއްލުވާ ނުލާ ކަމަށާއި، މެޑެލްއެއްހޯދަން އަދިވެސް މަސައްކަތްކުރާ ކަމަށް ޤައުމީ ވޮލީ ޓީމްގެ އިސްމާއިލް ސާޖިދު (ކުޑަކާއްޓޭ) ބުނެފިއެވެ.
މިއަދު ސެންޓްރަލް ޒޯން ވޮލީ މުބާރާތުގައި އަފްޤާނިސްތާން އަތުން ސީދާ ތިން ސެޓުން މޮޅުވި މެޗަށްފަހު ސާޖިދު ބުނީ ރާއްޖެއަށް އަދިވެސް މެޑަލްއެއް ހޯދުމުގެ ފުރުސަތުނުގެއްލޭ ކަމަށާއި ކުރިއަށް އޮތް މެޗް ކާމިޔާބުކޮށްގެން މެޑެލްއެއް ހޯދުމަށް ހުރިހާކުޅުންތެރިންވެސް ބޭނުންވާ ކަމަށެވެ. މިއަދުގެ މެޗްގެ މޮޅު ކުޅުންތެރިއަކަށްހޮވުނީވެސް އިސްމާއިލް ސާޖިދުއެވެ.
އަފްޤާނިސްތާނާ ރާއްޖެއާ މިއަދު ވާދަކުރި މެޗްގެފުރަތަމަ ސެޓް ރާއްޖެ ހޯދީ 20-25އިންނެވެ. ދެވަނަ ސެޓް 15-15 އިން އެއްވަރުވެފައިވަނިކޮށް ޑާކާގެ މެޗް ކުޅެމުން ދިޔަ އިމާރާތުގައި އަލިފާނުގެހާދިސާއެއް ހިނގައިގެން މެޗް މެދުކަޑާލިއެވެ. 30 މިނެޓަށްފަހު އަލުން ކުޅުންފެށިއިރު ދެވަނަ ސެޓް ރާއްޖެ ހޯދީ 21-25އިންނެވެ. އަދި ފަހު ސެޓް ރާއްޖެހޯދީ 11-25 އިންނެވެ.
ރާއްޖެ މުބާރާތުގައި ކުޅުނު ފުރަތަމަ ދެމެޗުން ނޭޕާލްއަދި ކިރިގިސްތާން އަތުން ބަލިވިއިރު ފަހު މެޗްގައި ވާދަކުރަން ޖެހޭނީ ބަންގްލަދޭޝްއާއެވެ. މިމެޗް ކުޅޭނީ މާދަމާ ރާއްޖެ ގަޑިން ހަވީރު ހަތަރެއް ޖަހާއިރުއެވެ.