ފީފާއިން ހޮވާ އަހަރުގެ މޮޅު ކުޅުންތެރިޔާއަށް ދޭ ފީފާ ބެސްޓް އެވޯޑް ރެއާލްމެޑްރިޑާ ޕޯޗްގަލްގެ ކްރިސްޓިއާނޯ ރޮނާލްޑޯއަށް ލިބިއްޖެއެވެ.
ފީފާއިން މުޅިން އަލަށް ދޭން ފެށި ފީފާ ބެސްޓް އެވޯޑް ރޮނާލްޑޯއަށް ލިބުނީ ބާސެލޯނާގެ މެސީ އަދި އެތުކެޓިކޯ މެޑްރިޑްގެ ގްރީޒްމަންއާ ވާދަކޮށެވެ. ނިމިގެންދިޔަ ސީޒަންގައި ރޮނާލްޑޯ ވަނީ ޕޯޗްގަލްއާއެކު ޔޫރޯ އަދި ރެއާލްމެޑްރިޑާގެ ޗެމްޕިއަންސް ލީގު އުފުލާލާފައެވެ.
ފްރާންސްގެ މެގަޒިންއިން ހޮވި ފީފާ ބެލޮންޑޯ އެވޯޑްވެސް މިދިޔަ އަހަރު ލިބުނީ ރޮނާލްޑޯއަށެވެ.
ފީފާއިން ބޭއްވި "ދަ ބެސްޓް ފީފާ" އެވޯޑް ހަފްލާގެ އެހެން ވަނަތަކަށް ބަލާއިރު މިދިޔަ އަހަރުގެ އެންމެ މޮޅު އަންހެން ފުޓްބޯޅަ ކުޅުންތެރިއަކަށް ހޮވުނީ އެމެރިކާގެ ކާލީ ލޮއީޑްއެވެ. މިއެވޯޑް ކާލީ ލޮއީޑަށް ހަވާލުކޮށްދިނީ އާޖެންޓީނާގެ ކުރީގެ ތަރި ގެބްރިއަލް ބަޓިސްޓޫޓާއެވެ.
އެންމެ ރީތި ގޯލް ޖެހި ކުޅުންތެރިއަކަށް ފީފާއިން ދޭ ފީފާ ޕުސްކަސް އެވޯޑް މިފަހަރު ލިބުނީ މެލޭޝިއާގެ މުހައްމަދު ފާއިޒް ސުބްރީއަށެވެ. މިއީ އޭޝިއާގެ ކުޅުންތެރިއަކަށް ޕުސްކަސް އެވޯޑް ލިބުނު ފުރަތަމަ ފަހަރެވެ. އެންމެ މޮޅު ފިރިހެން ކޯޗްގެ އެވޯޑް ލެސްޓަރ ސިޓީއަށް ޕްރިމިއަރ ލީގު ހޯދަދިން ކްލައުޑިއޯ ރަނިއޭރީއަށް ލިބުންއިރު އެންމެ މޮޅު އަންހެން ކޯޗްގެ އެވޯޑް ލިބުނީ ޖަރުމަނުގެ ސިލްވިއާ ނައިޑަށެވެ.
ފީފާ ބެސްޓް ސަޕޯޓަރުންނަށް ހޮވުނީ ޑޯޓްމުންޑާ ލިވަޕޫލްގެ ސަޕޯޓަރުންނެވެ. އަދި ފީފާ ފެއާ ޕްލޭ އެވޯޑް ލިބުނީ ބްރެޒިލް ޝަޕަކޮއެންސަށް ދިމާވި ހިތާމަވެރި ހާދިސާއަށްފަހު އެކްލަބަށް ތަށި ދޭން ނިންމި ކޮލަމްބިއާގެ އެތްލެޓިކޯ ނާސިއޯނަލްއަށެވެ. އެތްލެޓިކޯ ނާސިއޯނަލްއަކީ ކޮޕަ ސުދަމެރިކާނާ ފައިނަލްގައި ޝަޕަކޮއެންސާއެކު ފައިނަލް ކުޅެން ހަމަޖެހިފައިވާ ކްލަބެވެ. ނަމަވެސް ޝަޕަކޮއެންސްގެ ކުޅުންތެރިން ދަތުރުކުރި ބޯޓް ވެއްޓި ކުޅުންތެރިން މަރުވި ހާދިސާއަށްފަހު އެތުލެޓިކޯ ނާސިއޯނަލްއިން ނިންމީ ޝަޕަކޮއެންސަށް ޗެމްޕިއަންކަން ދިނުމަށެވެ.
ފީފާއިން ހޮވި ޑްރީމް ޓީމްގައި މިފަހަރު ހިމެނެނީ ރެއާލްމެޑްރިޑްގެ 5 ކުޅުންތެރިން ކަމަށްވާ ސާޖިއޯ ރާމޯސް، ޓޯނީ ކްރޫޒް، ލޫކާ މޮޑްރިޗް، މާސެލޯ، ކްރިސްޓިއާނޯ ރޮނާލްޑޯ، ބަޔާންގެ ކީޕަރ ނޯޔާ، ބާސެލޯނާގެ 4 ކުޅުންތެރިން ކަމަށްވާ ޕީކޭ، އިނިއެސްޓާ، ސުއަރޭޒް، މެސީ، އަދި ޔުވެންޓާސްގެ ޑެނީ އަލްވެސްއެވެ.
ފްރާންސްގެ ފުޓްބޯޅަ މެގަޒިންއާ ގުޅިގެން މީގެ ކުރިން ފިފާއިން ދެމުން އައި ފީފާ ބެލޮންޑޯ އެވޯޑާ ފީފާއިން ވަކިވެ އަމިއްލައަށް ދޭން ފެނި ފީފާ ބެސްޓް އެވޯޑްގައި ކުރީގެ މަޝްހޫރު ގިނަ ކުޅުންތެރިންތަކެއް ބައިވެރިވިއެވެ. އެވޯޑް ހަފްލާ ކުރިއަށްދިޔައީ ސްވިޒަލެންޑްގެ ޒިއުރިކްގައެވެ.