މަސްވެރިކަމުގެ ސިނާއަތަށް ބަލާއިރު، މި ސިނާއަތަކީ ދިވެހިރާއްޖޭގެ އިޤްތިޞާދުގައި ދެވަނައަށް އެންމެބޮޑު ސިނާއަތެވެ. ފަހަކަށް އައިސް ރާއްޖޭގެ މަސްވެރިކަން ރަނގަޅުވެ، އެސިނާއަތުން ލިބޭ އާމްދަނީ އިތުރުވަމުން އަންނަކަމަށް މޯލްޑިވްސް ކަސްޓަމްސް ސަރވިސްގެ ތަފާސްހިސާބުތަކުން ހާމަވެއެވެ.
މޯލްޑިވްސް ކަސްޓަމްސް ސަރވިސްގެ ތަފާސް ހިސާބުތަކުގެ މައްޗަށް ބިނާކުރައްވައި މޯލްޑިވްސް މަނިޓަރީ އޮތޯރިޓީން ނެރެފައިވާ ހުސްވި ޑިސެމްބަރުމަހުގެ ރާއްޖޭގެ އިޤްތިޞާދީ މުރާޖައާ ރިޕޯޓްގައި ވިދާޅުވެފައިވާގޮތުން ދެހާސް ފަނަރަވަނަ އަހަރުގެ ނޮވެމްބަރު މަހާއަޅާބަލާއިރު މިދިޔަ އަހަރުގެ ނޮވެމްބަރުމަހު ރާއްޖޭގެ ކުންފުނިތަކުން މަސްކިރުވި އަދަދު ވަނީ ސާދަ އިންސައްތަ މައްޗަށްގޮސްފައެވެ. މި ރިޕޯޓަށް ބަލާއިރު، މިދިޔަ ނޮވެމްބަރުމަހުގެ ތެރޭގައި ކުންފުނިތަކުން ވަނީ، ފަސްހާސް ހަތްސަތޭކަ ފަންސާސް ދޭއް ޕޮއިންޓް ދޭއް މެޓްރިކްޓަނުގެ މަސްކިރުވާފައެވެ.
މަރުކަޒީ ބޭންކުން ނެރެފައިވާ އިޤްތިޞާދީ މުރާޖައާ ރިޕޯޓަށް ބަލާއިރު، މިދިޔަ އަހަރުގެ ސެމްޓެމްބަރުމަހު ރާއްޖެއިން ބޭރުކުރި މަހުގެ އަދަދުވަނީ އޭގެ ކުރީއަހަރުގެ ސެޕްޓެމްބަރުމަހާ އަޅާބަލާއިރު ފަންސާސް އިންސައްތަ ދަށަށްގޮސްފައެވެ. މީގެ ސަބަބަކީ ގަނޑުކުރި ކަޅުބިލަމަސް ބޭރުކުރި މިންވަރު ދަށަށްދިއުމެވެ.
img:http://s3.psmnews.mv/images/660x400/7104.jpg|ދިވެހި މަސްވެރިންތަކެއް މަސް ބޭނުމުގައި ހަރަކާތްތެރިވަނީ / ފޮޓޯ: ޕީއެސްއެމް ފައިލް
މި މުއްދަތުގެ ތެރޭގައި މަހުގެ ބާވަތްތައް ބޭރުކޮށްގެން ލިބުނު އާމްދަނީ ދަށަށްދިއުމުގެ މައިގަނޑު ސަބަބަކީ ގަނޑުކުރި ކަޅުބިލަމަސް، އަދި ތާޒާ ފިނިކުރި ކަންނެލި ބޭރުކޮށްގެން ލިބުނު އާމްދަނީ ދަށަށްދިއުމެވެ.
މަސްވެރިން މަސްކިރުވާ އަދަދު އިތުރުވަމުން އަންނަކަމަށް ތަފާސް ހިސާބުތަކުން ދައްކާއިރު، އަދުގެ ސަރުކާރުން އަންނަނީ މަސްވެރިންގެ ކުރިއެރުމަށް މަސައްކަތްތަކެއް ކުރައްވަމުންނެވެ. އެންމެފަހުން ބޭއްވި މަސްވެރިންގެ ދުވަހުގެ ޖަލްސާގައި ވާހަކަފުޅު ދައްކަވަމުން ރައީސް އަބުދުﷲ ޔާމިން ވިދާޅުވެފައިވަނީ، އެހެން ސިނާއަތްތަކަށްވުރެ ހެޔޮ އަގަގެއްގައި މަސްވެރިންނަށް ތެޔޮ ފޯރުކޮށްދިނުމަށް މަސައްކަތް ކުރައްވަމުން އަންނަކަމަށެވެ. މީގެ އިތުރުން ސައުދީ ފަންޑުގެ އެހީގައި މިއަހަރުގެ ތެރޭގައި ހަތަރު ކޭނަރީ ޤާއިމްކުރައްވާނޭކަމަށްވެސް ސަރުކާރުން ވަނީ ވިދާޅުވެފައެވެ. މީގެ ސަބަބުން މަސްގަތުމަށް މިހާރު ކުރިމަތިވެފައިވާ ދަތިތައް ފިލައިގެން ދާނެއެވެ.
މަސްވެރިންނަށް ކުރިމަތިވެފައިވާ ދަތިތައް ހައްލުކޮށްދެއްވުމަށް އަޅުއްވަމުންގެންދަވާ ފިޔަވަޅުގެ ދަށުން، ސަރުކާރުން ވަނީ މިފްކޯގައި ހުރި މަސްވެރިންގެ ދަރަނިތައް މާފްކޮށްދެއްވާފައެވެ.