އަންނަ އަހަރުން ފެށިގެން އިތުރު ހަތް އެވޯޑެއް މޯލްޑިވްސް ފުޓްބޯލް އެވޯޑްގައި ދޭނެކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
މޯލްޑިވްސް ފުޓްބޯލްއާ އެފްއޭއެމް ގުޅިގެން މުޅިން އަލަށް ދޭން ފެށި މޯލްޑިވްސް ފުޓްބޯލް އެވޯޑް ހަފްލާގައި ވާހަކަ ދައްކަވަމުން ބައްސާމް ވިދާޅުވީ މިއަހަރު ހަތަރު އެވޯޑަކާއެކު ފެށުނު ކަމުގައިވީ ނަމަވެސް އަންނަ އަހަރު ވެގެންދާނީ ގިނަ އެވޯޑް ތަކެއް ދެވޭނެ ހަފްލާއަކަށް ކަމަށެވެ.
އޭގެ ތެރޭގައި އަންހެން އެންމެ މޮޅު ކުޅުންތެރިޔާ އާއި ކޯޗް، އެންމެ ރަނގަޅު ސަޕޯޓެއްދޭ ކްލަބް، އެންމެ މޮޅު ގޯލް ކީޕަރ، އެންމެ މޮޅު ބިދޭސީ ކުޅުންތެރިޔާ، ފެއަރ ޕްލޭ އެވޯޑާ އެންމެ ރީތި ގޯލް ހިމެނެއެވެ. މިފަދަ ހަރަކާތްތަށް ހިންގުމަށް އެފްއޭއެމްއަށް މިއަދު ކްލަބްތަކުން ދޭ އެއްބާރުލުމަށްވެސް ބައްސާމް ވަނީ ޝުކުރު އަދާކޮށްފައެވެ.
" އެފްއޭއެމްއަށް އެވޯޑް ނައިޓްވެސް މިގެނެވެނީ މިއަދު ހުރިހާ ކްލަބްތަކެއް ގުޅިގެން ދޭ އެއްބާރުލުމުން. ޚާއްސަކޮށް ހުރިހާ ކްލަބަކުން އެފްއޭއެމްގައި މިހާރު އޮތް ޓީމަށް ދޭ ސަޕޯޓް ފާހަގަކޮށްލެވޭ" ބައްސާމް ވިދާޅުވިއެވެ.
އެފްއޭއެމް އެވޯޑް ނައިޓް ރޭ ބާއްވާފާއިވާއިރު، ރާއްޖޭގެ ފުޓްބޯޅަ ކްލަބްތަކުގެ މެނޭޖްމަންޓްގެ އިސްފަރާތްތަކުންނާ، ކޯޗުން އަދި ކުޅުންތެރިން ބައިވެރިވިކަން ފާހަގަކޮށްލެވެއެވެ.