މޯލްޑިވްސް ރިޓަޔަމަންޓް ޕެންޝަންސްކީމް ފަންޑް މެދުވެރިކޮށް އެކިކަންކަމަށް އިންވެސްޓްކުރަމުންދާއިރު، އެކަމުގެ ނަފާ އެފަންޑްގެ ބައިވެރިންނަށް އެދެވޭގޮތެއްގައި ލިބެމުންއަންނަކަމަށް ޕެންޝަން އޮފީހުން ވިދާޅުވެއްޖެއެވެ.
ޓީވީއެމްއަށް ދެއްވި ބަސްދީގަތުމެއްގައި ޕެންޝަން އޮފީހުގެ ޑިރެކްޓަރ، ސްޓޭކްހޯލްޑަރ ރިލޭޝަންސް އިސްމާޢީލް ސުޖާޢު ވިދާޅުވީ، ޕެންޝަން ސްކީމްގެ ބައިވެރިންގެ ފަންޑް އިތުރުކުރުމަށްޓަކައި އެފަންޑް މެދުވެރިކޮށް އިންވެސްޓްމަންޓްތައް ކުރައްވަމުން އަންނަކަމަށެވެ. އެގޮތުން އެފަންޑުން ދިރާގްގެ ހިއްސާގައި އިންވެސްޓްކޮށްފައިވާއިރު، ސަރުކާރުގެ ޓީބިލް އަދި ޓީބޮންޑްގައި ވަނީ އިންވެސްޓްކޮށްފައެވެ. މީގެ އިތުރުން ބައެއް ބޭންކްތަކުގެ ފިކްސްޑް ޑިޕޮސިޓާއި ބައެއް ބޮންޑްތަކުގައި ވެސް ވަނީ އިންވެސްޓްކޮށްފައެވެ.
ސުޖާޢު ވިދާޅުވީ، ވޭތުވެދިޔަ 6 އަހަރުދުވަހުގެ ނަތީޖާއަށް ބަލާއިރު، އިންވެސްޓްމަންޓްގެ ނަތީޖާ އެދެވޭގޮތެއްގައި ލިބެމުން އަންނަކަމަށެވެ. އެބޭފުޅެއްގެ ރިޓަޔަމަންޓް ޕެންޝަން ސްޓޭޓްމަންޓް ބަލާލުމުން އިންވެސްޓްމަންޓް ފައިދާގެ ގޮތުގައި ލިބުނު މިންވަރު އެނގޭނެކަމަށް ސުޖާޢު ވިދާޅުވިއެވެ. ފަންޑްގެ ބައިވެރިންނަށް ލިބޭ ނަފާ އިތުރުކުރުމަށްޓަކައި ޕެންޝަން އޮފީހުން ވަނީ ކުރިއަށްއޮތްތަނުގައިވެސް އެކިއެކި އިންވެސްޓްމަންޓްތައް ކުރެއްވުމަށް ނިންމަވާފައެވެ.
އިތުރު ކުންފުނިތައް ރާއްޖޭގެ ހިއްސާގެ ބާޒާރަށް ވަނުމަށް ތައްޔާރުވަމުންދާއިރު އެކަމާ ގުޅޭގޮތުން ވާހަކަދައްކަވަމުން ސުޖާޢު ވިދާޅުވީ، ހިއްސާގެ ބާޒާރުގައި ކުންފުންޏެއް ލިސްޓްކޮށްފިނަމަ، ބައްލަވަންޖެހޭ ކަންކަން ބެއްލެވުމަށްފަހު އެ ކުންފުންޏެއްގައި އިންވެސްޓްކުރައްވާނޭކަމަށެވެ.
"އިންވެސްޓްމަންޓްގެ ދާއިރާއަކީ ހަޤީޤަތުގައި އަޅުގަނޑުމެން ޕެންޝަން އޮފީހުން ވަރަށްބޮޑު އިސްކަމެއް ދީގެންކުރާކަމެއް. ބޭނުމަކީވެސް ހަޤީޤަތުގައިބައިވެރިންނަށް މަންފާއެއް، އޭގެ ތެރެއިން ނެރެދިނުން. މިއަހަރުގެ ތެރޭގައިވެސް އިތުރު ފަރާތްތަކުން ޕަބްލިކް ލިސްޓް ކުރެވިގެން އެފުރުސަތު އޮތީވިއްޔާ ޕެންޝަން ފަންޑުން އެކަމަކަށް ޝައުގުވެރިކަން އޮންނާނެ." ސުޖާޢު ވިދާޅުވިއެވެ.
ހިއްސާގެބާޒާރަށް ވަންނަ ކުންފުނިތަކުގެ ހިއްސާ ގަތުމަށް ޕެންޝަން އޮފީހުން ޝައުގުވެރިކަން ފާޅުކޮށްފައިވާއިރު، މުއާސަލާތީ ޚިދުމަތްދޭ ކުންފުނި، އުރީދޫ މޯލްޑިވްސްއިން އަންނަނީ މޯލްޑިވްސް ސްޓޮކް އެކްސްޗޭންޖްގައި އެކުންފުނީގެ ހިއްސާ ވިއްކުމަށް ތައްޔާރުވަމުންނެވެ.
ރިޓަޔަމަންޓް ޕެންޝަން ސްކީމްގެ ފަންޑަކީ މިވަގުތު ދިވެހިރާއްޖޭގައިއޮތް އެންމެބޮޑު އިންވެސްޓްމަންޓް ފަންޑެވެ. މި ފަންޑްގައިވާ ފައިސާގެ އަދަދު 6 ބިލިއަން ރުފިޔާއަށް އަރާއިރު، ޖުމްލަގޮތެއްގައި ކޮންމެ މަހަކު 78މިލިއަން ރުފިޔާ ފަންޑަށް ޖަމާވަމުން އަންނަކަމަށް މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން މައުލޫމާތު ދެއްވައެވެ.