ގދ.ތިނަދޫގެ ބަނދަރު ބޮޑުކުރުމުގެ މަސައްކަތް ނިމުނުއިރު، އެރަށު ކައުންސިލުންވަނީ ބަނދަރުގެ ތޮއްޖެހުން ކުޑަކުރުމަށް ވަކި އުސޫލުތަކެއް ކަނޑައަޅާފައެވެ.
މިގޮތުން އެކި އުޅަނދުފަހަރަށް ޚާއްސަ ސަރަޙައްދުތަކެއް ހަމަޖައްސާފައިވާކަން ފާހަގަކުރެވެއެވެ.
އާބާދީގައި ރަޖިސްޓްރީވެފައިވާ ހަތްހާސް ފަސްސަތޭކަ ބައްތިރީސް މީހުން ދިރިއުޅޭ ގދ. ތިނަދޫގައި ރަށްވެއްސަކަށް ނުވެ ގާތްގަނޑަކަށް ތިންހާހެއްހާ މީހުން ދިރިއުޅެމުންދާކަމަށް ކައުންސިލުން ވިދާޅުވެއެވެ.
އަތޮޅު ތަޢުލީމީ މަރުކަޒާއި ރީޖަނަލް ހޮސްޕިޓަލާއި، ކެމްޕަސް، އަދި ބޭންކް ފަދަ މުހިންމު މުއައްސަސާތައް ހުންނަނީ ތިނަދޫގައިކަމުން މިރަށަކީ އަބަދުވެސް މި އަތޮޅުގެ އެހެން ރަށްރަށުގެ މީހުން ގިނަޢަދަދަކަށް ދަތުރުކުރާ ރަށެކެވެ.
އެހެންކަމުން މިރަށުގެ ބަނދަރަކީ އަބަދުވެސް ވަރަށް ބާރުބޮޑު ބަނދަރެކެވެ. މިރަށުގައި ސަރުކާރުން ހިންގަވާ ގިނަ މަޝްރޫޢުތަކުގެ ތެރެއިން ބަނދަރު ބޮޑުކުރުމުގެ މަސައްކަތްވަނީ މިދިޔަ އަހަރު ނިންމަވާލައްވާފައެވެ.
img:http://s3.psmnews.mv/images/660x400/14849846398894.jpg|
މި މަޝްރޫޢުގެ ދަށުން ތިނަދޫގެ ދެކުނު ފަރާތު ބަނދަރުން ވަނީ ހަތަރު ސަތޭކަ ސާޅީސް މީޓަރު ބޮޑުކޮށްފައެވެ. މިއާއެކު ބަނދަރު މެނޭޖްކުރުމުގެ ގޮތުން އެރަށު ކައުންސިލުން ވަނީ ބަނދަރުގައި އުޅަނދުފަހަރު އަޅާފައި ބޭއްވޭނެ ވަކި ކަހަލަ އިންތިޒާމުތަކެއް ހަމަޖައްސަވާފައެވެ.
މިގޮތުން ފެރީ، މަސްދޯނި، ލޯންޗު، މުދާ ބާލާ ދޯނިފަހަރު ފަދަ އުޅަނދުތަކަށް ވަކި ޚާއްސަ ސަރަޙައްދުތަކެއް ހަމަޖައްސާފައިވާކަމަށް އެރަށު ކައުންސިލް މެންބަރު ސަޢުދު އަލީ ވިދާޅުވިއެވެ.
ސަޢުދު ވިދާޅުވީ މިގޮތަށް އިންތިޒާމުތައް ހަމަޖައްސަވާ، އެކަމަށް ބޭނުންވާ އުސޫލުތައްވެސް ހަދާ ނިމިފައިވާކަމަށެވެ. ދެން ކުރިއަށް އޮތީ މި އުސޫލަށް މީހުން އަހުލުވެރިކުރުވުމުގެ މަސައްކަތްކަމަށާއި މިކަމާ ގުޅޭ މަސައްކަތް މިހާރު ކުރައްވަމުންދާކަމަށެވެ.
img:http://s3.psmnews.mv/images/660x400/14849846817275.jpg|
''ތިނަދޫ ދެކުނު ސަރަޙައްދަކީ އަޅާ ނުލެވި އޮތް ސަރަޙައްދަކަށްވާތީ، އެ ސަރަޙައްދު އިތުރަށް ތަަރައްޤީކުރުމަށް މަސައްކަތްކުރަންޖެހޭ ކަމަށް ސައުންސިލަށް ޤަބޫލުކުރެވެނީ. އެހެންވީމަ އަޅުގަނޑުމެން ނިންމީ މި ޖެޓީ ހަދާއިރު، އެ ސަރަޙައްދުގައި މި ޖެޓީ ލާން. ތިނަދޫ ޖެޓީގައި އަލަށް 440މީޓަރު ބޮޑުކުރިނަމަވެސް މިހާރު މިވަނީ އެތަންވެސް ކުޑަވެފަ.. އަޅުގަނޑުމެން މިވަނީ ޖެޓީ މެނޭޖްކުރުމުގެ ގޮތުން ޖެޓީ ބަހާލާފަ އެކި ބައިބަޔަށް.. މިގޮތުން ނުވަދިހަ ފޫޓުން ދަށުގެ، މަސްވެރި އުޅަނދުތަކަށް ޚާއްސަ އޭރިއާއެއް، ކޯސްޓްގާޑް ބާއްވަން ވަކި އޭރިއާއަށް. މަސްވެރި އުޅަނދުތަކަށް ވަކިން، ލޯންޗްފަހަރަށް ވަކިން ޚާއްސަ އޭރިއާއެއް، ފެރީތަކަށް، މިގޮތަށް ޚާއްސަ ސަރަޙައްދުތަކެއް ހުންނާނެކަނޑައަޅާފައި. މިހާރު މިކަމަށް ބޭނުންވާ އުސޫލުތައްވެސް މިވަނީ ހަދާނިމިފައި. ދެން އޮތީ މިކަމަށް މީހުން އަހުލުވެރިކުރުވުން..'' ކައުންސިލް މެންބަރު ސައުދު އަލީ ވިދާޅުވިއެވެ.
img:http://s2.psmnews.mv/images/660x400/14849847789985.jpg|
މީގެ އިތުރަށް އެރަށުގެ ރަސްމީ ފާލަން އައު ޑިޒައިނަކަށް ހެދުމުގެ މަސައްކަތްވެސް ދަނީ ކުރަމުންނެވެ. ކައުންސިލުން ވިދާޅުވީ ރަސްމީ ފާލަން ހަދާ ނިމޭ އިރު، އެފާލަމަކީ ރާއްޖޭގެ އަތޮޅެއްގައި ހަދާނެ އެންމެ ރީތި ފާލަމަށް ވެގެންދާނެކަމަށެވެ.