ބިޒްނަސް ޕްރޮފިޓް ޓެކްސް (ބީޕީޓީ) ބަޔާން ހުށަހަޅާ ފަރާތްތަކަށް ދައުލަތުގެ ޓެކްސް އިދާރާ، މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އިން ލުއި ގޮތްތަކެއް ހަމަޖައްސައިފިއެވެ.
މީރާއިން ވިދާޅުވީ، ވަކިފަރުދެއްގެ ނުވަތަ ޑީމްޑް ޕާޓްނަރޝިޕެއްގެ ޖުމުލަ އާމްދަނީ އަހަރެއްގެ މައްޗަށް 1 މިލިއަން ރުފިޔާއަށްވުރެ އިތުރުނުވާނަމަ، އަދި ޓެކްސް ބިނާކުރެވޭ ފައިދާ 500,000 ރުފިޔާއަށްވުރެ އިތުރުނުވާނަމަ، އެ އަހަރަށް އެ ފަރާތަކުން ބީ.ޕީ.ޓީ ބަޔާން ހުށަހަޅަން ނުޖެހޭނޭކަމަށެވެ.
މީރާއިން މިގޮތަށް ހަމަޖެއްސެވީ، ވިޔަފާރީގެ ފައިދާއިން ނެގޭ ޓެކްސް ނުވަތަ ބީ.ޕީ.ޓީގެ ޤަވާއިދަށް ގެނައި އިސްލާހެއްގެ ދަށުންނެވެ.
750,000 ރުފިޔާއަށްވުރެ އިތުރަށް ޢާމްދަނީ ލިބޭނަމަ ކުރިން ޓެކްސް ބަޔާން ހުށަހަޅަން ޖެހޭގޮތަށް ކަނޑައަޅާފައި އޮތް ނަމަވެސް، އައު އިސްލާހްގައިވާގޮތުން އެ ޢަދަދުވަނީ 1 މިލިއަން ރުފިޔާއަށް ބޮޑުކޮށްފައެވެ. މިރާއިން ވިދާޅުވީ މި ލުއިގެ ސަބަބުން ކުދި ވިޔަފާރިތައް ހިންގާ އަމިއްލަ ފަރުދުންނާ ޕާރޓްނަރޝިޕްތަކަށް ވަރަށް ބޮޑު ލުއިފަސޭހަކަމެއް ލިބިގެންދާނޭކަމަށެވެ.
ކުދި ވިޔަފާރިތަކަށް މީރާއިން ދެމުން ދާ ލުއިތަކުގެ ތެރެއިން 10 މިލިއަން ރުފިޔާއަށްވުރެ މަދުން އާމްދަނީ ލިބޭ ފަރާތްތަކުން ހިސާބުތައް ބެލެހެއްޓުމުގައި "ކޭޝް ބޭސިސް" ޚިޔާރުކުރުމުގެ ފުރުސަތުދީ، އޮޑިޓް ރިޕޯރޓް ހުށަހަޅަން ނުޖެހޭ ގޮތަށް ވަނީ ހަމަޖައްސަވާފައެވެ.
އަދި، އޮޑިޓްކުރަން ޖެހޭ ކުދި ވިޔަފާރިތަކަށްވެސް އޮޑިޓަރުން ހޯދުމަށް ފަސޭހަ ކޮށްދިނުމުގެ ގޮތުން އޮޑިޓަރުން އައްޔަން ކުރުމުގައި ވިޔަފާރިތައް ގިންތި ކުރެވިފައިވާ ގޮތަށް ވެސް މީރާއިން ވަނީ ބަދަލުތަކެއް ގެންނަވާފައެވެ.