ސަތޭކަ ހަތަރު މިލިއަން ޑޮލަރު ހޭދަކުރައްވައިގެން ހިންގަވާ ސްޓެކްލްކޯ ފިފްތް ޕަވަރ ޕްރޮޖެކްޓަކީ ރާއްޖޭގައި މިހާތަނަށް ކަރަންޓް ފޯރުކޮށްދިނުމަށް ހިންގަވާ އެންމެ ބޮޑު މަޝްރޫޢެވެ.
ހުޅުމާލޭގައި ޤާއިމުކުރުމަށް ހަމަޖެހިފައިވާ 50 މެގަވޮޓްގެ އިންޖީނުގެ ޤާއިމުކުރުމުގެ މަޝްރޫޢަކީ ޗައިނާ އެގްޒިމް ބޭންކާއި ޗައިނީޒް ބޭންކްގެ ލޯނުގެ އެހީއާއި ކޮންޓްރެކްޓަރުގެ އެހީގައި ކުރިޔަށް ގެންދެވޭ ޕްރޮޖެކްޓެކެވެ.
ހުޅުމާލޭގައި ޤާއިމުކުރާ 50 މެގަވޮޓްގެ މަޝްރޫޢާއި ގުޅޭގޮތުން މަޢުލޫމާތުދެއްވަމުން ސްޓެލްކޯގެ ސީނިއަރ އިންޖިނިއަރ އިބްރާހީމް ރަޢޫފް ވިދާޅުވީ ހުޅުމާލޭގައި ޤާއިމުކުރާ 50 މެގަވޮޓްގެ ކަރަންޓުގެ މަޝްރޫޢުގެ ޑޮކިއުމަންޓްތައް ފައިނަލްކޮށް މަޝްރޫޢުގެ އަމަލީ މަސައްކަތް ފަށާފައިވާކަމަށެވެ. މިގޮތުން އިންޖީނަށް ބޭނުންވާ ތަކެތި ސައިޓަށް ގެންގޮސް، އެތަކެތި ކޮމިޝަން ކުރުމުގެ މަސައްކަތްކުރިއަށްދާކަމަށް ރައޫފް ވިދާޅުވިއެވެ.
"އިންޖީނަށް ބޭނުންވާ ހުރިހާ އޮގްޒަރީ އިކުއިޕްމަންޓްތައް ސައިޓަށް ގެންދެވިއްޖެ، އޭގެތެރޭގައި އޮއިލް ބޫސްޓަރ ފިއުލް ބޫސްޓަރ މޮޑިއުލްތައް ހިމެނޭ. މިތަކެތި ކޮމިޝަން ކުރުމުގެ މަސައްކަތް ކުރިއަށްއެބަދޭ. ދެން އެއަށްފަހު ޖަނެރޭޓަރުތަކާއެކު އިކުއިޕްމަންޓްތައް ގުޅާލުމުގެ މަސައްކަތްކުރިއަށްދެވޭނެ." ރައޫފް ވިދާޅުވިއެވެ.
މިމަޝްރޫޢު ނިމިގެންދާއިރު މިއިންޖީނުގޭގައި ޑިސްޓްރިބިއުޝަނަށް ބޭނުންވާ ތަކެއްޗާއި، ތެޔޮ ތާނގީތަކާއި ތެޔޮ އަންލޯޑްކުރެވޭނެ ވަސީލަތްތައް ޤާއިމުކުރެވި ފުރިހަމަ ޕަވަރ ހައުސްއެއްގެ ގޮތުގައިކަމަށް ސްޓެލްކޯ އިން ބުނެއެވެ. މިތަނުގައި 8.9 މެގަވޮޓްގެ 6 އިންޖީނު ބެހެއްޓުމަށް ހަމަޖެހިފައިވާއިރު، ފިއުލް ފާރމްގައި ދެހާސްހަތަރުސަތޭކަ މެޓްރިކް ޓަނުގެ ކެޕޭސިޓީ ސްޓޯރޭޖެއް ހުންނާނެ، އަދި ވޯޓަރ ޑީސެލިނޭޝަން ފެސިލިޓީ މެދުވެރިކޮށް ދުވާލެއްގެ މައްޗަށް ދެހާސްޓަނުގެ ފެން އުފެއްދޭނެކަމަށް ސްޓެލްކޯ އިން ބުނެއެވެ.
26 މަސް ދުވަހުގެ މިމަޝްރޫޢާއެކު މާލެއާއި ހުޅުލެ އާއި ދެމެދުގައި އަޅާ ބްރިޖްގެ ޒަރީއާއިން މާލެ އާއި ހުޅުމާލޭގެ ކަރަންޓުގެ ވިއުގަ ގުޅާލުމަށް ވަނީ ހަމަޖެހިފައެވެ.
މިމަޝްރޫޢު ކުރިއަށްގެންދަވަނީ ޗައިނާގެ ޑޮންގ ފަންގ އިލެކްޓްރިކް އިންޓަރނޭޝަނަލް ކޯޕަރޭޝަނާއި ހަވާލުކުރައްވައިގެންނެވެ.