ޒުވާނުން ވަޒީފާގެ ބާޒާރަށް ނެރުއްވުމަށާއި، ރާއްޖޭގެ އިޤްތިސާދުގައި، ޒުވާނުންގެ ޙިއްޞާ އިތުރުކުރެއްވުމަށް ސަރުކާރުން ކުރިއަށްގެންދަވާ މަސައްކަތްޕުޅުގެދަށުން، އެއްހާސް ފޮޓޯގްރާފަރުން ތަމްރީނުކުރުމުގެ ޕްރޮގްރާމް ފަށްޓަވައިފިއެވެ.
މިރޭ ދަރުބާރުގޭގައި ބޭއްވި ޚާއްސަ ރަސްމިޔާތެއްގައި މި ޕްރޮގްރާމް ފަށްޓަވައި ދެއްވީ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމެވެ.
އެއްހާސް ފޮޓޯގްރާފަރުން ތަމްރީނުކުރުމުގެ ޕްރޮގްރާމް، އިފްތިތާޙުކުރެއްވުމަށް މިރޭ ދަރުބާރުގޭގައި ބޭއްވި ރަސްމިޔާތުގައި ރައީސުލްޖުމްހޫރިއްޔާގެ އަނބިކަނބަލުންވެސް ބައިވެރިވެވަޑައިގެންނެވިއެވެ. މިރަސްމިއްޔާތަށްފަހު ރައީސުލް ޖުމްހޫރިއްޔާގެ ދެކަނބަލުން ވަނީ މިހާރު ފޮޓޯގްރަފީ ތަމްރީނުތައް ހަދަމުންދާ ޒުވާނުން ނަގާފައިވާ ފޮޓޯތައް ހިމެނޭ މައުރަޒް ބައްލަވާލައްވާފައެވެ. މި ރަސްމިއްޔާތުގައި ރައީސްގެ ދެ ކަނބަލުންގެ އިތުރުން ރައްޔިތުންގެ މަޖިލީހުގެ ރައީސް އަބުދުﷲ މަސީހާއި، ދައުލަތުގެ ވަޒީރުންނާއި ރައްޔިތުންގެ މަޖިލީހުގެ ބައެއް މެމްބަރުންނާއި، ސަރުކާރުގެ އެކި ވުޒާރާތަކުގެ އިސްބޭފުޅުން ވެސް ވަނީ ބައިވެރިވެ ވަޑައިގެންފައެވެ.
އެއްހާސް ފޮޓޯގްރާފަރުން ތަމްރީނުކުރުމަށް ސަރުކާރުން ފެށި މި ޕްރޮގްރާމް މިހާރު ފުރިހަމަ ކުރަމުންދާ ތިންސަތޭކަ ފަންސާސް ޒުވާނުންނަށް ވަނީ ރަސްމީކޮށް ކެމެރާ ހަވާލުކުރައްވާފައެވެ. އެފަރާތްތަކަށް ކެމެރާ ދޫކޮށްފައިވަނީ ބޭންކް އޮފް މޯލްޑިވްސް މެދުވެރިކޮށް، ލުއި ލޯނެއްގެ ދަށުންކަމަށް އިކޮނޮމިކް މިނިސްޓްރީން ވިދާޅުވެއެވެ.
މި ރަސްމިއްޔާތުގައި ވާހަކަފުޅުދައްކަވަމުން އެޑިއުކޭޝަން މިނިސްޓަރ ޑރ.އާއިޝަތު ޝިހާމް ވިދާޅުވީ، ޒުވާނުން ބާރުވެރިކުރުވައި، އެކިއެކި ދާއިރާތަކުން ކުރިއަށްދިއުމުގެ މަގު ޒުވާނުންނަށް ފަހިކޮށްދިނުމަކީ ރައީސް ޔާމިންގެ ސަރުކާރުން ވަރަށްބޮޑު އިސްކަމެއްދެއްވާ ކަމެއްކަމަށެވެ. މިގޮތުން ކުރިއަށްއޮތްތަނުގައި ގޫގުލްއިން ޤަބޫލުކުރާ ފެންވަރުގެ ކޮމްޕިއުޓަރ ކޯޑިންގ ޕްރޮފެޝަނަލުން އުފެއްދުމަށް އެއްހާސް ޒުވާނުން ތަމްރީން ކުރުމަށް ސަރުކާރުން ނިންމަވާފައިވާކަމަށް ވެސް މިނިސްޓަރ ޑރ.ޢާއިޝަތު ޝިހާމް ވިދާޅުވިއެވެ.
މިރަސްމިއްޔާތުގައި ވާހަކަފުޅުދައްކަވަމުން އިކޮނޮމިކް މިނިސްޓަރު މުޙަންމަދު ސަޢީދު ވިދާޅުވީ، ބަދަލުވަމުންދާ ދުނިޔޭގައި ދެމެހެއްޓެނިވިގޮތަކަށް އިޤްތިސާދު ބައްޓަންކުރުމަށް އަދުގެ ސަރުކާރުން އަމާޒު ހިފާފައިވާކަމަށެވެ.
ފޮޓޯގްރަފީ ތަމްރީންތައް ފުރިހަމަކުރާ ޒުވާނުނަށް ވަޒީފާގެ ފުރުސަތު ޔަގީންވެ، ޕްރޮގްރާމްގެ ތެރެއިން ހޮވާލެވޭ ސަތޭކަ ޒުވާނުނަށް ރާއްޖެއިން ބޭރުން ތަމްރީން ވުމުގެ ފުރުސަތު ދެއްވުމަށް ސަރުކާރުން ނިންމަވާފައިވާކަމަށްވެސް މިނިސްޓަރު ސަޢީދު ވިދާޅުވިއެވެ.
އެއްހާސް ފޮޓޯގްރާފަރުން ތަމްރީނުކުރުމުގެ ޕްރޮގްރާމް ކުރިއަށްގެންދަނީ، އިކޮނޮމިކް މިނިސްޓްރީއާ، މިނިސްޓްރީ އޮފް އެޑިއުކޭޝަން ގުޅިގެންނެވެ.