ވެލާނާ އިންޓަރނޭޝަނަލް އެއަރޕޯޓުގައި ހަދާ އައު ރަންވޭގެ ޢަމަލީ މަސައްކަތް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ރަސްމީގޮތުން މިއަދު ފަށްޓަވައިދެއްވައިފިއެވެ.
އައު ރަންވޭގެ މަސައްކަތް ފަށްޓަވައިދެއްވީ މިކަމަށްޓަކައި މިއަދު ހެނދުނު އެއަރޕޯޓްގައި ބޭއްވެވި ޚާއްޞަ ރަސްމިއްޔާތުގައެވެ.
ވެލާނާ އިންޓަރނޭޝަލް އެއަރޕޯޓް ތަރައްޤީކުރެއްވުމުގެ މަޝްރޫޢަކީ ރާއްޖޭގެ އިޤްތިޞާދީ ދުވެލި ހަލުވިކުރައްވައި، ޤައުމުގެ ތަރައްޤީއަށް މިވަގުތު ސަރުކާރުން ހިންގަވާ އެންމެ މުހިއްމު އެއް މަޝްރޫޢުއެވެ. އެއް ބިލިއަން ޑޮލަރު ޚަރަދު ކުރައްވައިގެން އެއަރޕޯޓް ތަރައްޤީކުރައްވަން ސަރުކާރުން ކުރައްވާ މަސައްކަތުގެ ދަށުން މިހާރު އެންމެ ބާރުމިނުގައި ކުރިޔަށް ގެންދަވަނީ އެއަރޕޯޓުގައި ހަދާ އައު ރަންވޭގެ މަސައްކަތެވެ. އައު ރަންވޭއަށް ބޭނުންވާ ބިން ހިއްކެވުމުގެ މަސައްކަތުގެ ބޮޑުބައެއް ވަނީ ނިމިފައެވެ.
ވެލާނާ އިންޓަރނޭޝަނަލް އެއަރޕޯޓުގައި މިހާރު ބޭނުންކުރާ ރަންވޭއަކީ 45 ފޫޓު ފުޅާ، 3200 ފޫޓު ދިގު ރަންވޭއެކެވެ. ނަމަވެސް އެންމެފަހުގެ ޒަމާނީ ވަޞީލަތްތަކާއެކު އަލަށް ހަދާ ރަންވޭއަކީ ދިގުމިނުގައި 3400 މީޓަރު، އަދި ފުޅާމިނުގައި 65 މީޓަރު ހުންނަ ރަންވޭއެކެވެ. ކޯޑް-އީގެ މި ރަންވޭ ތަރައްޤީކުރައްވަނީ ދުނިޔޭގައި ބޭނުންކުރާ އެންމެ ބޮޑެތި މަތިންދާބޯޓް އޭ ތްރީ އެއިޓީގެ ބޯޓްފަހަރަށް ޖެއްސޭ ފެންވަރަށެވެ. އައު ރަންވޭ ހެދުމަށް ހަމަޖެހިފައިވަނީ ހުޅުލޭގައި މިހާރު އޮތް ރަންވޭގެ އިރުމައްޗަށްވާ ގޮތަށެވެ.
ރަންވޭގެ ޢަމަލީ މަސައްކަތް ފެށުމުގެ ރަސްމިއްޔާތުގައި ވާހަކަދައްކަވަމުން މޯލްޑިވްސް އެއަރޕޯޓްސް ކޮމްޕެނީ ލިމިޑެޓް، އެމް.އޭ.ސީ.އެލްގެ މެނޭޖިންގ ޑިރެކްޓަރ ޢާދިލް މޫސާ ވިދާޅުވީ، އައު ރަންވޭގެ މަސައްކަތަށް އެކަނިވެސް 400 މިލިއަން ޑޮލަރު ޚަރަދުވާނެކަމަށެވެ. ޢާދިލް ވިދާޅުވީ، އައު ރަންވޭގެ މަސައްކަތަށް ބޭނުންވާ ފައިސާ ޗައިނާގެ އެގްޒިމް ބޭންކް ފަދަ ބޮޑު ބޭންކެއް މެދުވެރިކޮށް ހަމަޖެހުމަކީ ސަރުކާރުން ހިންގަވާ ތަރައްޤީގެ މަޝްރޫޢުތައް ބޭރު ދުނިޔެއިން ބަލައިގެންފައިވާ މިންވަރު ދައްކުވައިދޭ އަލިގަދަ ހެއްކެއްކަމަށެވެ. އަދި ޗައިނާ މޯލްޑިވްސް ފްރެންޑްޝިޕް ބްރިޖްގެ މަޝްރޫޢާއެކު އައު ރަންވޭގެ މަސައްކަތްވެސް އަންނަ އަހަރުގެ ނިޔަލަށް ނިމޭނެކަމަށްވެސް ޢާދިލް ވިދާޅުވިއެވެ.
ރާއްޖޭގައި ހުންނަވާ ޗައިނާ ސަފީރު ވަންފުކަންގް މިރަސްމިއްޔާތުގައި ދެއްކެވި ވާހަކަފުޅުގައި ދެޤައުމުގެ ދެމެދުގައި އުފެދިފައިވާ ގުޅުން ކުރިއަރާފައިވާ މިންވަރުގެ މައްޗަށް ވަނީ އަލިއަޅުއްވާލައްވާފައެވެ.
ވެލާނާ އިންޓަރނޭޝަނަލް އެއަރޕޯޓުގެ އައު ރަންވޭގެ މަސައްކަތް ނިމި، ކުރިން ބޭނުންކުރަމުން އައި ރަންވޭ ޓެކްސީވޭއަކަށް ބަދަލުކުރުމުން، އެއަރޕޯޓުގެ އޮޕަރޭޝަންތަކަށް ބޮޑެތި ލުއިފަސޭހަތަކެއް ލިބޭނެކަމަށް އެމް.އޭ.ސީ.އެލުން ބުނެއެވެ. އެގޮތުން ރަންވޭއަށް ބޯޓްފަހަރު ޖައްސަން ޖާގަ ނުލިބުމާއި، ފްލައިޓް ޑިލޭވުމުގެ މައްސަލައާއި، އަދި ޕާކްކުރާނެ ޖާގަނެތުމުގެ މައްސަލަ މުޅިން ޙައްލުވާނެކަމަށް އެކުންފުނިން ބުނެއެވެ.
އެއަރޕޯޓް ތަރައްޤީކުރުމުގެ މަޝްރޫޢުގެ ޢަމަލީ މަސައްކަތް ޙަވާލުކުރައްވާފައިވަނީ ޗައިނާގެ ބެއިޖިންގ އަރބަން ކޮންސްޓްރަކްޝަން ގްރޫޕް، ބީ.ޔޫ.ސީ.ޖީއާއެވެ. މި ރަސްމިއްޔާތަށްފަހު، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާއި، ބައެއް ވަޒީރުން ވަނީ އެއަރޕޯޓުގެ އައު ރަންވޭއަށް ބޭނުންވާ ބިންހިއްކުމުގެ މަސައްކަތް ކުރާ ސަރަޙައްދަށް ވަޑައިގެން، އެ މަސައްކަތް ކުރިއަށްދާ ގޮތް ބައްލަވާލައްވާފައެވެ.
މި މަޝްރޫޢަކީ ދިވެހި ރައްޔިތުންގެ ފުދުންތެރިކަމާއި، ގުޅިފައިވާ އުއްމީދީ މަޝްރޫޢެއްގެ ގޮތުގައި ސަރުކާރުން ސިފަކުރައްވައެވެ. އެގޮތުން މުޅި މި މަޝްރޫޢު ނިމިގެންދާއިރު، އެއަރޕޯޓުން އެކަނިވެސް އިތުރު 3000 ވަޒީފާ އުފެއްދިގެންދާނެކަމަށް ސަރުކާރުން ވިދާޅުވެއެވެ.