ވެލާނާ އިންޓަރނޭޝަނަލް އެއަރޕޯޓް ތަރައްޤީކުރެއްވުމުގެ މަޝްރޫޢު ނިމޭއިރު، މި އެއަރޕޯޓް ވާނީ ދުނިޔޭގައި އޮތް އެންމެ ރީތި އެއް އެއަރޕޯޓަށްކަމަށް އިކޮނޮމިކް މިނިސްޓަރu މުޙައްމަދު ސަޢީދު ވިދާޅުވެއްޖެއެވެ.
އެއަރޕޯޓްގެ އާ ރަންވޭގެ ޢަމަލީ މަސައްކަތް ރަސްމީގޮތުން ފެށްޓެވުމަށް މިއަދު އެއަރޕޯޓްގައި ބޭއްވެވި ޚާއްޞަ ރަސްމިއްޔާތުގައި ވާހަކަފުޅު ދައްކަވަމުން އިކޮނޮމިކް މިނިސްޓަރ ސަޢީދު ވިދާޅުވީ، މި މަޝްރޫޢަކީ ރާއްޖޭގެ އިޤްތިޞާދުގެ މުޅިން އާ ބާބެއްގެ ފެށުންކަމަށެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢުގެ މަސައްކަތް ނިމުމުން އެއަރޕޯޓްގެ މަލަމައްޗާއި، އެއަރޕޯޓުން ދޭ ޚިދުމަތްތައް އެތައް ތަނެއް ކުރިއަރައިގެންދާނޭކަން ފާހަގަކުރައްވަމުން މިނިސްޓަރ ސަޢީދު ވިދާޅުވީ، މުސްތަޤްބަލުގައި ވެލާނާ އިންޓަރނޭޝަނަލް އެއަރޕޯޓް ވާނީ މުޅި ދުނިޔޭގައިވެސް އޮތް އެންމެ ރީތި އެއް އެއަރޕޯޓަށްކަމަށެވެ.
އެއަރޕޯޓްގެ އާ ރަންވޭ ތަރައްޤީކުރުމުގެ ޢަމަލީ މަސައްކަތް މިއަދު ފަށްޓަވާފައިވާއިރު، އާ ރަންވޭގެ މަސައްކަތް ނިމުމުން މި ރަންވޭއަށް ދުނިޔޭގެ އެންމެ ބޮޑެތި މަތިންދާބޯޓް ފަހަރަށް ޖެއްސޭނެއެވެ.
މިނިސްޓަރ ސަޢީދު ވިދާޅުވީ ރާއްޖޭގެ ވެރިކަމާ ރައީސް އަބްދުﷲ ޔާމީން ޢަބްދުލްޤައްޔޫމް ޙަވާލުވެވަޑައިގަތުމަށްފަހު ވެލާނާ އިންޓަރނޭޝަނަލް އެއަރޕޯޓް ތަރައްޤީކުރެއްވުމަށް އެމަނިކުފާނު ޚާއްޞަ އަހަމިއްޔަތުކަމެއް ދެއްވާފައިވާކަމަށެވެ.
މިގޮތުން ކުރައްވަން ފެށްޓެވި މަސައްކަތްތަކުގެ ތެރެއިން މިހާރު ބޭނުންކުރަމުންގެންދާ ރަންވޭ މަރާމާތުކުރެއްވުމަށް ފެށްޓެވި މުހިއްމު މަސައްކަތް މިނިސްޓަރ ފާހަގަކުރެއްވިއެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރެއްވުމަށް އެންމެ ފުރަތަމަ ކުރެއްވި މި މަސައްކަތާއެކު ސަރުކާރުން ވަނީ އެއަރޕޯޓް ތަރައްޤީގެ މަސައްކަތްތަކަށް ދުވާލަކަށް 1.8މިލިއަން ރުފިޔާ ޚަރަދު ކުރައްވާފައެވެ.
މި ފައިސާއަކީ ރާއްޖެއިން ބޭރުން ލޯނެއް ނުނަންގަވައި ރައްކާކޮށްފައި ހުރި ފައިސާއިން ކުރެއްވި އިންވެސްޓްމަންޓެކެވެ.
ރަންވޭ މަރާމާތުކުރެއްވުމަށް ސަރުކާރުން ކުރެއްވި މަސައްކަތުގެ މަންފާ އެންމެ ފުރިހަމަގޮތުގައި މިހާރު ކުރަމުން ގެންދާކަމަށް މިނިސްޓަރ ވިދާޅުވިއެވެ.
މި އާ ރަންވޭއަށް ހަތަރުސަތޭކަ މިލިއަން ޑޮލަރު ހޭދަކުރެއްވުމަށް ހަމަޖެހިފައިވާކަމަށް ސަރުކާރުން ވިދާޅުވެއެވެ.
މިއީ ދިގުމިނުގައި 3400 މީޓަރު، އަދި ފުޅާމިނުގައި 65 މީޓަރު ހުންނަ ރަންވޭއެކެވެ.
އާ ރަންވޭ ހެދުމާއެކު މިހާރުގެ ރަންވޭ ބޭނުންކުރުމަށް ހަމަޖެހިފައިވަނީ، ޓެކްސީ ވޭއެއްގެ ގޮތުގައެވެ.
1 ބިލިއަން ޑޮލަރު ޚަރަދުކުރެއްވުމަށް ހަމަޖެހިފައިވާ ވެލާނާ އިންޓަރނޭޝަނަލް އެއަރޕޯޓް ތަރައްޤީކުރެއްވުމުގެ މަޝްރޫޢުގެ މަސައްކަތް ނިމުމުން އަހަރަކު 7 މިލިއަނަށްވުރެ ގިނަ ދަތުރުވެރިންނަށް ޚިދުމަތް ދެވޭނޭކަމަށް ސަރުކާރުން ވަނީ ވިދާޅުވެފައެވެ.