މާލެ ކައިރި އޮންނަ "ގަލުފަޅު" އާއްމުންނަށް ދަތުރުދެވޭގޮތަށް ތަރައްޤީކުރެއްވުމަށް މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމެންޓުން ކޯޕަރޭޝަން، އެމްއައިޓީޑީސީން ނިންމާ އެކަމަށް ޝައުގުވެރިވާ ބަޔަކު ހޯދުމަށް އާއްމުކޮށް އިއުލާނުކޮށްފިއެވެ.
މާލެއިން ފުރައިގެން ފަސްމިނެޓުން ދެވޭ ހަތް ހެކްޓަރު ހުންނަ ގަލުފަޅު ތަރައްޤީކުރުމަށް ނިންމާފައިވަނީ، އެފަޅު ހިއްކައިގެނެވެ. އެމްއައިޓީޑީސީގެ ނެރުނު އިއުލާނުގައިވަނީ ގަލުފަޅު ތަރައްޤީކުރަންޖެހޭނީ އެއްފަހަރާ އެއްހާސް މީހުންނަށް ބޭނުންކުރެވޭ ޖާގަ ހިމެނޭގޮތަށްކަމަށެވެ. ރިސޯރޓެއްވެސް ހިމެނޭ ގޮތަށް ގަލުފަޅު ތަރައްގީކުރާ ބަޔަކަށް އެއްވެސް އަގަކާނުލާ ފަންސާސް އަހަރަށް ކުއްޔަށްދޭން ނިންމާފައިވާކަމަށްވެސް އެމްއައިޓީޑީސީގެ އިއުލާނުގައިވެއެވެ.
މިފަޅު ތަރައްޤީކުރާ ފަރާތުން އެއްފަހަރާ ދެ ދޯންޏަށް ކައިރިކުރެވޭވަރުގެ ފަންސާސް ފޫޓުގެ ދިގު ފާލަމެއް އަޅަންޖެހެއެވެ. މި ފާލަން ހުންނަންޖެހެނީ ހިޔާކޮށްފައެވެ. ގަލުފަޅު ތަރައްޤީކުރުމުގައި ކަނޑައަޅާފައިވާ އިތުރު ޝަރުތުތަކުގެ ތެރޭގައި، ރަށަށް ދަތުރުދާ މީހުންނަށް ޙާއްސަކޮށްގެން ހަތަރު މީހުންގެ ޖާގައިގެ ވިހި ކޮޓަރީގެ އިތުރުން ކުޅިވަރުކުޅޭނޭ ވަސީލަތްތަކާއި، ފިހާރައެއްގެ އިތުރުން މުނިސިޕަލް ޙިދުމަތްތައް ލިބެން ހުންނަންޖެހެއެވެ.
ގަލުފަޅު އާއްމުނަށް ދަތުރުދެވޭގޮތަށް ތަރައްޤީކުރެއްވުމަށް ސަރުކާރުން ނިންމަވާފައިމިވަނީ، ދަތުރުދިއުމަށް ރަށެއް ނެތްކަމުގެ ޝަކުވާ މާލޭގައި ދިރިއުޅެމުންދާ ރައްޔިތުން ކޮށްފައިވަނިކޮށެވެ. މީގެކުރިން މާލޭގައި ދިރިއުޅެމުންދާ ރައްޔިތުން އާއްމުކޮށް ދަތުރުދާ ފޭދޫފިނޮޅު އަދި ކުޑަބަނޑޮސް ވަނީ ރިސޯޓެއްގެ ގޮތުގައި ތަރައްޤީކޮށް ހިންގުމަށް ބަޔަކާއި ހަވާލުކުރައްވާފައެވެ.