ހުރިހާ ޤައުމަކަށް ދަތުރުކުރި ކެސީ އަލުން ރާއްޖެ އަންނަނީ

އެމެރިކާއަށް އުފަން 27 އަހަރުގެ ކަސެންދުރަ ޑިކެޕޯލް (ކެސީ) 18މަހާއި، 26 ދުވަހުގެ ތެރޭގައި ދުނިޔޭގެ ހުރިހާ ޤައުމަކަށް ދަތުރުކުރުން ވެފައިވަނީ، ފަހުގެ ތާރީޚެއްގައި ބައިނަލްއަޤްވާމީ ބޮޑެތި މީޑިއާތަކުގެ ފަލަ ސުރުޚީތަކުން ޖާގަހޯދި އެއް ޚަބަރަށެވެ. 

އަށާރަ މަހާއި، ސައްބީސް ދުވަހުގެ ތެރޭގައި ކެސީ ވަނީ ދުނިޔޭގެ 196 ޤައުމަކަށް ޒިޔާރަތްކޮށްފައެވެ. މި ޚަބަރު ދުނިޔޭގެ އެންމެ ނަގާކިޔާ ބޮޑެތި މީޑިއާތަކުން ވަނީ ގެނެސްދީފައެވެ. މީގެތެރޭގައި ސީއެންއެން، ބީބީސީ، ފޯބްސް، ބްލޫމްބަރގް، ޑެއިލީމެއިލް ފާހަގަކޮށްލެވެއެވެ.

ޕީއެސްއެމްއިން މިހާރު ވަނީ، އެންމެ ކުރު މުއްދަތެއްގެ ތެރޭގައި ދުނިޔޭގެ ހުރިހާ ޤައުމަކަށް ޒިޔާރަތްކުރުމުގެ ރެކޯޑް ޤާއިމްކުރި ކެސީއާ ބެހޭގޮތުން އުފާވެރި ޚަބަރެއް ޕީއެސްއެމްގެ ބެލުންތެރިންނަށް ދީފައެވެ. ހަމައެކަނި ޕީއެސްއެމްގެ ބެލުންތެރިންނަކަށް ނޫނެވެ. ދިވެހިރާއްޖޭގެ ޒުވާނުނަށްވެސް މިއީ އުފާވެރި ޚަބަރެކެވެ. އެއީ ކެއިސީ ރާއްޖެ އައުމަށް ހަމަޖެހުނު ޚަބަރެވެ. ޕީއެސްއެމްއިން ކުރި މަސައްކަތާއެކު މިހާރު ވަނީ ކެއިސީ ރާއްޖެ އައުމަށް ނިންމާފައެވެ.

img:http://s2.psmnews.mv/images/660x400/14901986054928.jpg| ކަސެންދުރަ ޑިކެޕޯލް (ކެއިސީ) / ޕީއެސްއެމްއިން ވަނީ އޭނާ ރާއްޖެ ގެނެސްގެން ހަރަކާތްތަކެއް ހިންގުމަށް ނިންމަވާފައި

ކެސީ ދިވެހިރާއްޖެ އައިސް، ރާއްޖޭގެ ޒުވާނުންނަށް ޢިބްރަތް ޙާޞިލުކުރެވޭނެ ސްޕީޗެއް ދިނުމަށްވެސް ވަނީ ނިންމާފައެވެ. ޕީއެސްއެމްއިން ކެސީ ގާތު އެކަމަށް އެދުމުން އޭނާ ވަނީ ވަރަށް އުފަލާއެކު އެކަން ޤަބޫލުކޮށްފައެވެ. ކެސީއަކީ ޒުވާނުނަށް ހުރި ނަމޫނާއެއްކަމަށް ބައިނަލްއަޤްވާމީ މީޑިއާތަކުން ވަނީ ސިފަކޮށްފައެވެ. 18 މަހާއި، 26 ދުވަހުގެ ތެރޭގައި އަންހެނަކަށް ދުނިޔޭގެ ހުރިހާ ޤައުމަކަށް ޒިޔާރަތްކުރުމަކީ ފަސޭހަކަމެއް ނޫނެވެ. އެހެންނޫންނަމަ، މިގޮތަށް ދުނިޔޭގެ ހުރިހާ ޤައުމަކަށް ދަތުރުކުރާ މީހުންގެ އަދަދު ގިނަވާނެއެވެ. ކެސީ ދުނިޔޭގެ ހުރިހާ ޤައުމަކަށް ޒިޔާރަތްކުރުމުގެ ދަތުރު ފަށާފައިވަނީ 2015ވަނަ އަހަރުގެ ޖުލައިމަހުގެ 26ވަނަ ދުވަހެވެ.

އެކްސްޕެޑިޝަން 196ގެ ނަމުން ކެސީ ފެށި މި ދަތުރަށް އޭނާ ވަނީ 10،000 އެމެރިކާ ޑޮލަރު ސޭވްކޮށްފައެވެ. މި ދަތުރަށް އިތުރަށް ހޭދަވި 190،000 ޑޮލަރު ކެސީ ހޯދާފައިވަނީ ސްޕޮންސަރުންގެ އަތުންނެވެ. ކެސީގެ މި ދަތުރުގައި އޭނާ ވަނީ ދިވެހިރާއްޖެއަށްވެސް ޒިޔާރަތްކޮށްފައެވެ. ކެސީ ދިވެހިރާއްޖެއަށް ކުރި ޒިޔާރަތުގައި އޭނާ ހުރީ ސޮނޭވާފުށީ ރިސޯޓްގައެވެ.

img:http://s1.psmnews.mv/images/660x400/14901986242349.jpg| ކަސެންދުރަ ޑިކެޕޯލް (ކެއިސީ) / ޕީއެސްއެމްއިން ވަނީ އޭނާ ރާއްޖެ ގެނެސްގެން ހަރަކާތްތަކެއް ހިންގުމަށް ނިންމަވާފައި

ކޮންމެއަކަސް އެންމެކުރު މުއްދަތެއްގައި ދުނިޔޭގެ ހުރިހާ ޤައުމަކަށް ޒިޔާރަތްކުރި މި ޒުވާނާއާ ބައްދަލުކުރުމުގެ ފުރުޞަތު ދިވެހި ޒުވާނުނަށް ފަހިކޮށްދިނުމަށް ޕީއެސްއެމްއިން ފަށާފައިވާ މަސައްކަތްތަކަކީ ފާހަގަކޮށްލެވޭ މަސައްކަތެކެވެ. ޕީއެސްއެމްއިން ދެކޭގޮތުގައި ކެސީ ފަދަ ޝަޚްޞިއްޔަތަކާ ބައްދަލުކުރުމުގެ ފުރުޞަތު ދިވެހިޒުވާނުނަށް ދެވިގެންދާކަމީ ޒުވާނުން ބާރުވެރިކުރުވުމުގައި ޕީއެސްއެމްއިން ކުރަމުންގެންދާ މަސައްކަތަށް ލިބޭނޭ އިތުރު ކުރިއެރުމެކެވެ.

ޕީއެސްއެމުން މި ޒުވާނާ ރާއްޖެ ގެނައުމުގެ މަޤްޞަދަކީ، ރާއްޖެ ދުނިޔެއަށް އިޝްތިހާރުކުރުމެވެ. ބައިނަލްއަޤުވާމީ ދުނިޔޭގައި ރާއްޖޭގެ ހެޔޮ ތަޞައްވުރު އިތުރަށް ހާމަކޮށްދިނުމެވެ.

ޕީއެސްއެމުން އަންނަނީ ރާއްޖެ ދުނިޔެއަށް އިޝްތިހާރުކޮށް، ރާއްޖެއަށް ފަތުރުވެރިން ޒިޔާރަތްކުރުން އިތުރުކުރުމަށާއި، އެކަމުން ދިވެހި ދައުލަތަށް އަދި ޚާއްޞަ ދިވެހި ޢާންމު ފަރުދުންނަށް ކުރާ މަންފާ އިތުރުކުރުމަށް މަސައްކަތް ކުރަމުންނެވެ.