ދިވެހިރާއްޖެއާއި ތައިލެންޑާ ދެމެދު ސޮއިކޮށްފައިވާ ވައިގެ ދަތުރުފަތުރާ ބެހޭ އެއްބަސްވުމަށް އިސްލާހު ގެނެސް، މިހާރަށް ވުރެ ބޮޑަށް ހުޅުވާލެވިފައިވާ މާޙައުލެއްގައި ވައިގެ ދަތުރުފަތުރުގެ ޚިދުމަތްދިނުމުގެ މަގު ތަނަވަސްކޮށްދިނުމާގުޅޭ އެއްބަސްވުމެއްގައި ސޮއިކޮށްފިއެވެ.
ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ މޯލްޑިވްސް ސިވިލް އޭވިއޭޝަން އޮތޯރިޓީގެ ޗީފް އެގްޒެކެޓިވް ހުސައިން ޖަލީލެވެ. ތައިލެންޑްގެ ސަރުކާރުން ސޮއިކުރެއްވީ އެ ޤައުމުގެ ސިވިލް އޭވިއޭޝަން އޮތޯރިޓީގެ ޑިރެކްޓަރ ޖެނެރަލް ޗޫލާ ސުކްމަނޮޕްއެވެ.
ރާއްޖެއާ، ތައިލެންޑާ ދެމެދު 1989 ގައި ސޮއިކޮށްފައިވާ ވައިގެ ދަތުރުފަތުރާ ބެހޭ އެއްބަސްވުމަށް އިސްލާހު ގެނެސް، ދެ ޤައުމުން އައްޔަން ކޮށްފައިވާ އެއަރލައިންތަކަށް މިހާރަށް ވުރެ ބޮޑަށް ހުޅުވާލެވިފައިވާ މާޙައުލެއްގައި ވައިގެ ދަތުރުފަތުރުގެ ޚިދުމަތްދިނުމުގެ މަގު ތަނަވަސްކޮށްދިނުމަށް މިވީ އެއްބަސްވުމުގެ ދަށުން ދެ ޤައުމުގެ އެއަރލައިންތަކަށް "ފިފްތް ފްރީޑަމް" ޕޮއިންޓްގެ ގޮތުގައި ބޭނުންކުރެވޭނެ ޢަދަދު އަށަކަށް، އިތުރުވާނެއެވެ. އަދި މީގެ ކޮންމެ ޕޮއިންޓަކަށް ހަފްތާއަކު 7 ފްލައިޓް އޮޕަރޭޓްކުރުމުގެ ފުރުސަތު އެއަރލައިންތަކަށް ލިބޭނެއެވެ.
ރާއްޖެއާއި ތައިލެންޑާދެމެދު މިހާރު ޢަމަލުކުރަމުންދާ ވައިގެ ދަތުރުފަތުރުގެ އެއްބަސްވުމުގެ ދަށުން ރާއްޖެ ނުވަތަ ތައިލެންޑް މަގުން ތިންވަނަ މަންޒިލަކަށް ދަތުރުކުރުމުގެ ފުރުސަތު ބޭނުންކޮށްގެން ދެ ޤައުމުގެ އެއަރލައިންތަކަށް ދަތުރު ކުރެވޭނީ ޖުމްލަ 3 މަންޒިލަކަށެވެ.
މީގެއިތުރުން މި އެއްބަސްވުމުގައި ހިމެނޭ ކަންތައްތަކުގެ ތެރޭގައި ވައިގެ ދަތުރުފަތުރުގެ ސަލާމަތީ މިންގަޑުތައް ހަރުދަނާކުރުމުގެ ގޮތުން ވައިގެ ދަތުރުފަތުރާ ބެހޭ އެއްބަސްވުމަށް އާ "ސޭފްޓީ" މާއްދާއެއްވެސް ވަނީ އިތުރުކޮށްފައެވެ. އަދި ފަންނީ ދާއިރާތަކުން އެއް ޤައުމު އަނެއް ޤައުމަށް އެހީތެރިވެ ދިނުމަށާއި ޓްރެއިނިންގް ފުރުސަތުތައް ފަހިކޮށްދިނުންވެސް އޭގައި ހިމެނެއެވެ. މީގެ ތެރޭގައި ސީޕްލޭން އޮޕަރޭޝަންގެ ދާއިރާއިން ރާއްޖެއިން ތައިލެންޑަށް ފަންނީ އެހީ ފޯރުކޮށްދިނުންވެސް ހިމެނެއެވެ.
މި އެއްބަސްވުމާއި ގުޅޭގޮތުން މައުލޫމާތު ދެއްވަމުން މޯލްޑިވްސް ސިވިލް އޭވިއޭޝަން އޮތޯރިޓީގެ ޗެއަރމަން އިބްރާޙިމް ފައިސަލް ވިދާޅުވީ މި އެއްބަސްވުމުގެ ސަބަބުން ދެޤައުމުގެ ދެމެދު ދަތުރުކުރާ ފްލައިޓުތަކުގެ ޢަދަދު އިތުރުވާނެ ކަމަށާއި ދަތުރުފަތުރުގެ ޚިދުމަތް ފުޅާކުރުމުގެ ފުރުސަތުވެސް ފަހިވެގެންދާނެ ކަމަށެވެ. އަދި މީގެ ސަބަބުން ރާއްޖޭގެ އެއަރލައިންތަކަށް ބޮޑު ފައިދާއެއް ވެގެންދާނެކަން ފައިސަލް ފާހަގަކުރެއްވިއެވެ.
ރާއްޖެއާއި ތައިލެންޑާ ދެމެދު ރާއްޖޭގެ ޤައުމީ އެއަރލައިން މޯލްޑިވިއަން އާއި ތައިލެންޑްގެ ބެންކޮކް އެއަރވޭޒުން މިހާރުވެސް ދަތުރުކުރެއެވެ. މޯލްޑިވިއަން އިން ހަފްތާއަކު 6 ފްލައިޓް ރާއްޖެއާ ތައިލެންޑާއި ދެމެދު އޮޕަރޭޓްކުރާއިރު، ބެންކޮކް އެއަރވޭޒް އިން ހަފްތާއަކު 7 ފްލައިޓް މާލެ އާއި ބެންކޮކާއި ދެމެދު އޮޕަރޭޓް ކުރެއެވެ.