ވިޔަފާރީގެ ބާވަތާއި، ސައިޒާއި، ދައްކަންޖެހޭ ފައިސާގެ ބާވަތާއި، ވިޔަފާރިކުރާ ފަރާތުގެ އެހެނިހެން ޙައިސިއްޔަތުތަކަށް ބިނާކޮށް މީރާއިން އެފަރާތަކާމެދު ފިޔަވަޅު އެޅުމުގައި އެއްވެސް ތަފާތުކުރުމެއް ނުގެންގުޅުއްވާކަމަށް ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީން ވިދާޅުވެއްޖެއެވެ.
ދައުލަތުގެ ޓެކްސް އިދާރާ މީރާއިން ނެރުއްވި ބަޔާނެއްގައި ވިދާޅުވެފައިވަނީ، ޓެކްސްގެ ޤާނޫނުތަކުގެ ދަށުން ދައުލަތަށް ލިބެންޖެހޭ ފައިސާއާ ޚިލާފަށް، ދައުލަތުގެ އެހެނިހެން އިދާރާތަކުން ތަންފީޒުކުރަމުންދާ ޤާނޫނުތަކާއި ޤަވާޢިދުތަކުގެ ދަށުން ދައުލަތަށް ލިބެންޖެހޭ ފައިސާއާއި، ދައުލަތުގެ އެހެނިހެން އިދާރާތަކާ ޢާއްމު ފަރާތްތަކާއެކުވެވޭ އެއްބަސްވުންތަކުގެ ދަށުން ދައުލަތަށް ލިބެންޖެހޭ ފައިސާގެ އަދަދާއި ޖޫރިމަނާ ކަނޑައެޅުއްވުމާއި އެފައިސާ ދައްކަންޖެހޭގޮތް ހަމަޖައްސުމުގެ ބާރު އޮންނަނީ ސީދާ އެ އިދާރާއަށްކަމަށެވެ. މީރާއިން ވިދާޅުވީ، ފައިސާ ހޯދުމުގައާއި އަޅަންޖެހޭ ފިޔަވަޅުތައް އެޅުމުގައި މީރާއިން ޢަމަލުކުރަނީ، ޓެކްސް ނެގުމާބެހޭ އިދާރީ ޤާނޫނާއި އެ ޤާނޫނުގެ ދަށުން ހެދިފައިވާ ގަވާއިދާއި އެންފޯސްމަންޓް ޕޮލިސީއާ އެއްގޮތަށްކަމަށެވެ.
އެންފޯސްމަންޓް ޕޮލިސީގެ ދަށުން މިއަހަރުގެ ޖެނުއަރީން މިހާތަނަށް އެއްހާސް އަށްސަތޭކަ ސައުވީސް ފަރާތަކަށް ފިޔަވަޅު އަޅުއްވާފައިވާއިރު، އޭގެތެރޭގައި ޓޫރިޒަމް ދާއިރާގައި ވިޔަފާރިކުރާ 270 ފަރާތް ހިމެނޭ. ދައުލަތުގެ ކަމާބެހޭ އިދާރާތަކާއެކު ވެފައިވާ އެއްބަސްވުމެއްގެ ދަށުން ދައްކަންޖެހި ނުދައްކައިވާ ޓޫރިޒަމް ދާއިރާގެ ބިމުކުއްޔާއި އެއާގުޅޭ ޖޫރިމަނާއާއި އެހެނިހެން ފައިސާ ދައްކައިފައި ނުވާތީވެ، 17 ފަރާތެއްގެ ބޭންކް އެކައުންޓުތައް މިހާތަނަށް ހިފަހަށްޓާފައިވާކަމަށް މިރާއިން ވިދާޅުވެއެވެ. އޭގެތެރޭގައި މިހާރު ހިންގަމުންގެންދާ 8 ރިޒޯޓާއި، ޓޫރިސްޓް ރިޒޯޓް ތަރައްޤީ ކުރުމަށް ދޫކޮށްފައިވާ ރަށްތަކުގެ ތެރެއިން މިހާރު އެއްބަސްވުން ބާތިލުކޮށްފައިވާ 9 ރަށެއް ހިންގާ ފަރާތްތަކުގެ ބޭންކު އެކައުންޓް ހިމެނެއެވެ. އަދި މީގެތެރޭގައި ޓޫރިޒަމް މިނިސްޓްރީއާއެކު ވެފައިވާ އެއްބަސްވުމެއްގެ ދަށުން ދައްކަންޖެހޭ ފައިސާއާއިގުޅޭ މައްސަލަތަކެއްގައި އެއޮތޯރިޓީން ފިޔަވަޅު އެޅުމުގައި ފުރިހަމަކުރާ އިޖުރާއަތުތައް ފުރިހަމަކޮށް ފިޔަވަޅު އެޅުމަށްފަހު، ސިވިލްކޯޓުގެ ހުކުމަކާ ގުޅިގެން އެފިޔަވަޅު ހުއްޓުމަކަށް ގެނެސްފައިވަނިކޮށް، ހައިކޯޓުން ސިވިލްކޯޓުގެ ނިންމުން ބަދަލުކުރުމާ ގުޅިގެން، އެއިދާރާއިން އަޅާފައިވާ ފިޔަވަޅު އަނބުރައި އިއާދަކޮށްފައިވާ ދެމައްސަލައެއް ހިމެނޭކަމަށް މީރާއިން ވިދާޅުވެއެވެ. ކޯޓު ޙުކުމާ ގުޅިގެން އިއާދަކުރެވުނު ފިޔަވަޅުތަކަކީ ވަކި ދުވަސްވަރަކަށް ބިނާކޮށް ވަކިފަރާތަކަށް އަމާޒުކޮށްގެން މި އޮތޯރިޓީން އަޅާފައިވާ ފިޔަވަޅުތަކެއް ނޫންކަމަށް މީރާއިން ވިދާޅުވެއެވެ.
މީރާގެ އެންފޯސްމަންޓް ޕޮލިސީގައި ވާގޮތުން ދައުލަތަށް ދައްކަންޖެހޭ ފައިސާ ހޯދުމަށްޓަކައި މިއޮތޯރިޓީން އަޅައިފައިވާ އެއްވެސް ފިޔަވަޅަކުން އެފަރާތެއް ވީއްލޭނީ އެފަރާތަކުން ދައުލަތަށް ދައްކަންޖެހޭ ފައިސާ ދެއްކުމުން ނުވަތަ އެފައިސާ ދައްކާނެ ގޮތަކާމެދު މީރާއާއެކު އެއްބަސްވުމަކަށް އައުމުން ނުވަތަ ކޯޓު ހުކުމެއްގެ ދަށުންނެވެ.
މީރާއިން މިހާތަނަށް އަމަލު ކޮށްފައިވަނީ އަދި ކުރިމަގުގައި ޢަމަލު ކުރަމުން ގެންދާނީވެސް ޓެކްސް ނެގުމާބެހޭ އިދާރީ ޤާނޫނާއި އެޤާނޫނުގެ ދަށުން ހެދިފައިވާ ޤަވާއިދާއި އެންފޯސްމަންޓް ޕޮލިސީއާ އެއްގޮތަށް، ޓެކްސްދައްކާ ފަރާތްތަކުގެ މެދުގައި އެއްވެސް ތަފާތު ކުރުމެއްނެތި، ހަމަހަމަކަމާއި، އިންސާފުވެރި ކަމާއެކުގައި ކަމުގެ ޔަޤީންކަން އަރުވާކަމަށް މީރާއިން ވިދާޅުވެއެވެ. އަދި މީރާގެ މިނިވަންކަމާއި މުސްތަޤިއްލުކަމާމެދު ޢާއްމުންގެ މެދުގައި ސުވާލު އުފެދޭފަދަ ޙަޤީޤަތާ ޚިލާފުވާހަކަ ނުފެތުރުމަށް އިލްތިމާސް ކުރައްވާކަމަށްވެސް މީރާއިން ނެރުނު ބަޔާނުގައި ވިދާޅުވެފައިވެއެވެ.