އަދުގެ ސަރުކާރުން ދިވެހިރާއްޖޭގައި ޑިމޮކްރަސީ ހަރުދަނާކުރެއްވުމަށް ކުރައްވަމުން ގެންދަވާ މަސައްކަތްތަކުގައި، އިނގިރޭސި ސަރުކާރުގެ ފުރިހަމަ އެއްބާރުލެއްވުން ދޭނޭކަމުގެ ޔަޤީންކަން ދީފައިވާކަމަށް މިނިސްޓަރ އޮފް ފިޝަރީޒް އެންޑް އެގްރިކަލްޗަރ ޑރ. މުޙައްމަދު ޝައިނީ ވިދާޅުވެއްޖެއެވެ.
ޑރ. ޝައިނީ މިހެން ވިދާޅުވެފައިވަނީ އިނގިރޭސިވިލާތުން ދިވެހިރާއްޖެއަށް ކަނޑައަޅާފައި ހުންނަވާ ސަފީރު، ޖޭމްސް ދައުރިޒް އާއެކު ބޭއްވެވި ބައްދަލުވުމަށްފަހު ކުރެއްވި ޓްވީޓެއްގައެވެ.
tw:https://twitter.com/mshainee/status/849551496853192705
މި ޓްވީޓްގައި މިނިސްޓަރ ޑރ. ޝައިނީ ވިދާޅުވީ، އިނގިރޭސި ސަރުކާރުން ކުރީގެ ރައީސް ނަޝީދަށް ވަކި ޚާއްޞަ ޝައުޤުވެރިކަމެއް ނުދޭކަމަށާއި، ރާއްޖޭގައި ޑިމޮކްރަސީ ހަރުދަނާކުރެއްވުމަށް ސަރުކާރުން ކުރައްވަމުން ގެންދަވާ މަސައްކަތްތަކުގައި އިނގިރޭސިވިލާތުގެ ސަރުކާރުގެ ފުރިހަމަ އެއްބާރުލެއްވުން ދޭނޭކަމުގެ ޔަޤީންކަން އިނގިރޭސި ސަފީރު ދެއްވާފައިވާކަމަށެވެ.
tw:https://twitter.com/JamesDauris/status/849558109068697604
ދެ ބޭފުޅުންގެ ބައްދަލުވުމަށްފަހު އިނގިރޭސިވިލާތުގެ ސަފީރު ޖޭމްސް ދައުރިޒް ވިދާޅުވީ، މިނިސްޓަރު ޝައިނީއާއެކު ބޭއްވެވި ބައްދަލުވުމަކީ ވަރަށް މުހިއްމު ކަންތައްތަކެއްގެ މައްޗަށް މަޝްވަރާކުރެވިގެންދިޔަ ކާމިޔާބު ބައްދަލުވުމެއްކަމަށެވެ. މި ބައްދަލުވުމުގައި އިނގިރޭސި ސަފީރު ވަނީ އިނގިރޭސިވިލާތާއި ދިވެހިރާއްޖެއާ ދެމެދު އޮތް ބަދަހިގުޅުން ފާހަގަކުރައްވައި، ޑިމޮކްރަސީގެ މަގުގައި ދިވެހިރާއްޖެ ހޯދަމުންދާ ކާމިޔާބީތައް އެޤައުމުން އަބަދުވެސް ފާހަގަކުރާނޭކަމަށް ވިދާޅުވެފައެވެ.