އޯރަލް ކެންސަރ ނުވަތަ އަނގައިގެ ކެންސަރަށް އާއްމުން ހޭލުންތެރިކުރުމަށް ކެންސަރ ސޮސައިޓީ އޮފް މޯލްޑިވްސް އާއި، މޯލްޑިވިއަން ޑެންޓަލް އެސޯސިއޭޝަން ގުޅިގެން ޙާއްޞަ ކެމްޕޭނެއް ފަށައިފިއެވެ.
"ބީޓް ކެންސަރ" ނަމުގައި ކުރިޔަށްގެންދާ މި ކެމްޕެއިން ފަށްޓަވާދެއްވީ ހެލްތް މިނިސްޓަރު ޢަބްދުﷲ ނާޒިމްއެވެ. މި ކެމްޕެއިންގައި ކެންސަރ ސޮސައިޓީ އޮފް މޯލްޑިވްސް އާއި މޯލްޑިވިއަން ޑެންޓަލް އެސޯސިއޭޝަންގެ އިތުރުން އެސްޓިއޯވެސް ބައިވެރިވެއެވެ. މިކެމްޕެއިން ފެށުމުގެ ގޮތުން މިއަދު ބޭއްވި ރަސްމިއްޔާތުގައި ވާހަކަދައްކަވަމުން ކެންސަރ ސޮސައިޓީ އޮފް މޯލްޑިވްސްގެ ރައީސް ޖުވެއިރިޔާ ސައީދު ވިދާޅުވީ، އެއް އަހަރު ދުވަހުގެ މުއްދަތަކަށް ކުރިއަށްގެންދާ މި ކެމްޕޭނުގައި އަނގައިގެ ކެންސަރަށް އާއްމުން ހޭލުންތެރިކުރުމަށް އެކި ޕްރޮގްރާމްތައް މުޅި ރާއްޖޭގައި ކުރިއަށްގެންދާނޭކަމަށެވެ. މީގެ އިތުރުން އަނގައިގެ ކެންސަރަށް ސްކްރީންކުރުންވެސް ކުރިއަށްގެންދާނޭކަމަށް ޖުވެއިރިޔާ ވިދާޅުވިއެވެ.
img:http://s2.psmnews.mv/images/660x400/14918420011867.jpg|އޯރަލް ކެންސަރަށް ހޭލުންތެރިކުރުމުގެ ކެމްޕެއިން ހިންގުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގެ ތެރެއިން / ފޮޓޯ: ޕީއެސްއެމް
މި ރަސްމިއްޔާތުގައި ވާހަކަދައްކަވަމުން މޯލްޑިވިއަން ޑެންޓަލް އެސޯސިއޭޝަނުގެ ރައީސް ޑރ އަހުމަދު ސަލީމް ވިދާޅުވީ، ދިވެހިންގެ އާއްމު ދިރިއުޅުމުގެ ބައެއް އާދަތައް ހުންނަގޮތުން އަނގައިގެ ކެންސަރު ޖެހުމުގެ ފުރުސަތު ބޮޑުކަމަށެވެ. މިގޮތުން ދުންފަތުގެ އިސްތިއުމާލުކުރުމާއި ދުފުމަކީވެސް އަނގައިގެ ކެންސަރަށް މަގުފަހިވާކަމެއްކަމަށް ޑރ އަހުމަދު ސަލީމް ވިދާޅުވިއެވެ.
އަނގައިގެ ކެންސަރަށް އާއްމުން ހޭލުންތެރިކުރުމަށް ބީޓް ކެންސަރގެ ނަމުގައި ކުރިޔަށް ގެންދާ މި ކެމްޕޭނުގައި މާލޭގެ ދިހަ ޑެންޓަލް ކުލިނިކަކުން ބައިވެރިވެއެވެ. މި ކެމްޕޭނުގައި އެތަންތަނުން އަނގައިގެ ކެންސަރަށް ހިލޭ ސްކްރީންކުރުމުގެ ފުރުސަތު އާއްމުނަށް ހުޅުވާލާފައިވާކަމަށް މޯލްޑިވިއަން ޑެންޓަލް އެސޯސިއޭޝަނުން މައުލޫމާތުދެއެވެ.