ބޭންކް އޮފް މޯލްޑިވްސްއާއި ޓީއެފްޖީ ގުޅިގެން ކުޑަކުދިންގެ ދުވަހުގެ މުނާސަބަތުގައި ކޮންމެ އަހަރަކުވެސް ބާއްވަމުން އަންނަ "ބީއެމްއެލް ވައުވް ކިޑްސް ރަން"ގެ މިއަހަރުގެ އިވެންޓް އަންނަމަހުގެ ބާރަވަނަ ދުވަހު ބޭއްވުމަށް ނިންމައިފިއެވެ.
ބީއެމްއެލްއާއި ޓީއެފްޖީން މިހާރުވަނީ "ބީއެމްއެލް ވައުވް ކިޑްސް ރަން"ގައި ބައިވެރިވާން ބޭނުންވާ ކުޑަކުދިންނާއި އެކުދިންގެ ބެލެނިވެރިންނަށް ފުރުޞަތު ހުޅުވާލާފައެވެ. މި ޙަރަކާތާ ބެހޭގޮތުން ނޫސްވެރިންނަށް މަޢުލޫމާތުދެއްވަމުން ބީއެމްއެލްގެ މެނޭޖަރ ޕަބްލިކް ރިލޭޝަންސް، މުޙައްމަދު ސަޢީދު، ވިދާޅުވީ، މިއަހަރުގެ ދުވުމުގައި 600 ކުދިންނަށް އެކުދިންގެ ބެލެނިވެރިންނާއިއެކު ދުވުމުގެ ފުރުޞަތު ލިބިގެންދާނެކަމަށެވެ. ސަޢީދު ވިދާޅުވީ މިއީ ބީއެމްއެލްގެ އިޖުތިމާޢީ ޒިއްމާގެ ދަށުން ކުރިއަށްގެންދާ މުހިއްމު އިވެންޓެއްކަމަށެވެ.
ޓީއެފްޖީގެ ސީއީއޯ ޙުސެން ޒިނާން ވިދާޅުވީ 3 އުމުރު ފުރައަކަށް ބަހާލައިގެން ކުރިއަށްގެންދާ މި ޙަރަކާތުގައި 3 އަހަރާ 9 އަހަރާއި ދެމެދުގެ ކުޑަކުދިންނަށް ބައިވެރިވެވޭނޭކަމަށެވެ. ޓީއެފްޖީގެ ވެބްސައިޓް މެދުވެރިކޮށް ދުވުމުގައި ބައިވެރިވުމަށް ރަޖިސްޓަރވުމުގެ ފުރުޞަތު މާދަމާ ހުޅުވާލާނޭކަމަށްވެސް ޒިނާން ވިދާޅުވިއެވެ.
"ބީއެމްއެލް ވައުވް ކިޑްސް ރަން"ގެ މިއަހަރުގެ އިވެންޓް ފެށުމަށް ހަމަޖެހިފައިވަނީ އަންނަ މެއިމަހުގެ 12 ވަނަ ދުވަހުގެ ހެނދުނު، ބީއެމްއެލް ހެޑް އޮފީހުގެ ކުރިމަތިންނެވެ. ދުވުން ނިންމުމަށް ހަމަޖެހިފައިވަނީ ރަސްފަންނު ސަރަހައްދަށެވެ.