ހޮސްޕިޓާލިޓީ ދާއިރާގައި ބޭނުންކުރާ ސޮފްޓްވެއާއެއް ކަމަށްވާ "އީޒީ" އާއިއެކު ގެސްޓްހައުސް މޯލްޑިވްސްއިން ޕާޓްނަރޝިޕް އެއްބަސްވުމުގައި ސޮއިކޮށްފިއެވެ.
މިކަމަށްޓަކައި މާބުލް ހޮޓަލުގައި ބޭއްވި ރަސްމިއްޔާތެއްގައި ގެސްޓްހައުސް މޯލްޑިވްސްގެ ފަރާތުން އެއްބަސްވުމުގައި ސޮއިކުރީ، އެޖަމްޢިއްޔާގެ ރައީސް އަޙުމަދު ކަރަމްއެވެ. އީޒީ ޓެކްނޯސީ ޕްރައިވެޓް ލިމިޓެޑްގެ ފަރާތުން އެއްބަސްވުމުގައި ސޮއިކުރީ، އެކުންފުނީގެ ފައުންޑަރ އަރުންކުމާރު ކަޕޫރުއެވެ.
ގެސްޓްހައުސް މޯލްޑިވްސް އާއި އީޒީ ޓެކްނޯސީ އާއި ދެމެދު ވެވުނު އެއްބަސްވުމުގެ ދަށުން ގެސްޓްހައުސް މޯލްޑިވްސްގެ މެމްބަރުންނަށް "އީޒީ" ބޭނުންކުރުމުގައި ޙާއްސަ އިނާޔަތްތަކެއް ލިބޭނެއެވެ. މި ސޮފްޓްވެއާގެ އެހީގައި ޚަރަދު ކުޑަގޮތެއްގައި ގެސްޓްހައުސް ހިންގުމާއި، މާކެޓްކުރުމުގެ އިތުރުން ބުކިންގެ މުޢާމަލާތްތަކުގައި ގެސްޓްހައުސްގެ ވިޔަފާރިކުރާ ފަރާތްތަކަށް ވަރަށްބޮޑު ފަސޭހަކަމެއް ލިބިގެންދާނޭކަމަށް ގެސްޓްހައުސް މޯލްޑިވްސްއިން ބުނެއެވެ.
"އީޒީ" ސޮފްޓްވެއާ އަކީ ދުނިޔޭގެ ގިނަ ޤައުމުތަކެއްގެ ހޮސްޕިޓާލިޓީ އިންޑަރސްޓްރީގައި ޙަރަކާތްތެރިވާ ކުންފުނިތަކުން ބޭނުންކުރަމުން އަންނަ ސޮފްޓްވެއާއެކެވެ. މިގޮތުން ރާއްޖޭގައިވެސް "އީޒީ" ބޭނުންކުރާ ކުންފުނިތައް އިތުރުވަމުން އަންނަކަމަށް އީޒީ ޓެކްނޯސީން ބުނެއެވެ.